Ami a sera konosí ku “El Ideal” dor di “Djo Pishilingui” o sea Jose Maria Jacobus. E tabata bin bende number ku mi mama na kas i tabata rekomendá mi mama pa kumpra paña tantu pa hende hòmber komo hende muhé na “El Ideal” den Keukenstraat den Punda. I e biahanan ku mi a bishitá El Ideal, mi ta kòrda ku Shon Tony Prince tabatei, sintá den banda i opservando tur kos ku tabata pasa den su pakus. Manera e mes a bisa: “Tin hende ta kere ku ta pòrnada mi ta bin sinta den un huki den mi tienda, pero semper mi ta duna mi trahadónan tep.” Anto pena la bida bo yama su pakus “tienda” pasobra bo ta sa mesora kon awa ta drenta barika di koko. “Mi lugá ta un lugá distinguí.”
Antonio Marcelo (Tony) Prince a nase dia 13 di febrüari 1896 den Otrobanda. Manera el a Sali skol, el a bai wenkel di William “Shon Wiwi’ Vaseau, un sneiru franses ku tabatin Sastreria El Siglo XX den Breedestraat Punda. Tony Prince a traha 4 pa 5 aña komo sneiru, pero nunka a gusta e trabou ei.
Dia 6 di yanüari 1922 Shon Tony a lanta El Ideal.
El a kuminsá bende tur aksesorio pa hende hòmber. E tempu ei, mirando ku hendenan tabata gusta kose flus seka dje, el a pone komo kondishon ku nan mester kumpra tela seka dje, sino e no ta kose e flus. Asina el a konkistá e merkado den Punda.
El a sigui ku e sastreria te 1947, pero semper a sigui ku sneiru den su pakus, pa drecha flus i karson ora hendenan kumpra serka dje. Dado momentu Shon Tony Prince tabatin mas ku 10 sneiru ku tabata traha p’e. Den 1925 Shon Tony Prince a drenta su edifisio El Ideal den Keukenstraat.
Bon doño di trabou
Shon Tony Prince semper tabata un hende masha presis i tabata semper masha bon pa su trahadónan. Oswin Behilia: “Si Kòrsou tabatin 100 dunadó di trabou manera Shon Tony Prince, lo no tabatin mester di sindikato. “Ta konosí ku si un di su trahadónan bira malu i bai hòspital, gobièrnu tabata paga un parti i Shon Tony Prince tabata paga sobra. Un trahadó bira malu, e por a konta ku fin di luna su salario tabata kompletu sin ku a kita un depchi for di su sèn. Anochi e trahadó femenino tabata haña kompaño pa bai kas”.
Tony Prince tabatin diferente kas i tabata hür kas ku su empleadonan i tabata drecha e kasnan akí sin subi hür di kas. Shon Tony Prince tabatin empleado ku mas ku 30 – 40- 50- i 60 aña”(José Emerenciana ku mas di 65 aña) di sirbishi.
Otro punto remarkabel tabata, ku El Ideal no tabata sera mèrdia. Su trahadónan tabata traha shift i e pakus tabata keda habrí mèrdia.
Lio Capriles a bisa :Tony Prince nunka a aserka banko Maduro pa fiansa: Semper Shon Tony Prince tabata kumpra tur kos kèsh, pero e no tabata duna krédito tampoko”. El Ideal nunka tabatin baratio!
Lenga skèrpi!
Shon Tony Prince tabata konosí pa ekspreshonnan ku e tabata hasi, sin ningun klase di miedu: “e gobièrnu akí ta un desaster, sin ningun klase di konosementu; sindikatonan solamente ta instigá; gobièrnu no ta produsí sèn, pero ta pidi Hulanda plaka i Hulanda no por bisa nan nada’; tempu ku Kòrsou tabata un kolonia, no tabatin asina tantu problema, e tempu ei un makamba tabata chef di polis i Shell tabata na Kòrsou i kos tabata bon”.
Di trabou pa misa!
Tin un vershon ku mi a lesa den revista Independiente di Stanley Crats ku mi a gosa un mundu: “Na sesentipiku un atardi un hòmber a kana drenta El Ideal ku su saku di hèrmènt. El a bin kumpra un smoking, kamisa i dashi, paña djabou, mea i sapatu. Ora el a kaba el a bai patras, baña bisti paña, hinka tur paña bieu den un saku i f’e Keukenstraat el a sali kué un taki bai kasa na Mis’e Santa Famia. E dos únikonan ku a keda kuné te ora ku el a sali satisfecho for di El Ideal tabata shon Tony Prince i José Maria Jacobus.”
Tony Prince: “José Jacobus t’e mihó bendedó Punda a konosé. José nunka no ta bisa bo “no tin”. Ora bo kumpra algu seka José bo ta sali satisfecho. José a traha mas ku 58 aña serka Tony Prince.
Dia 26 di yüni 1995, na edat di 99 aña, Shon Tony Prince tabata presente ora ku ofishalmente a kambia Keukenstraat den Kaya A.M (Shon Toni) Prince.
For di prinsipio Shon Tony Prince a haña no solamente e resèpt pa sobrebibí, sino tambe pa konsolidá su posishon di pakus ku semper tabata sinónimo di kalidat. E tabata un di nos poko hendenan ku a dominá den e ramo ei.
Awendia ora nos pasa den Punda i mira por ehèmpel den Heerenstraat i kompará kalidat di ántes i awor, mi ta kasi mira i skucha Shon Tony Prince.
Den 1995, na edat di 99 aña, Shon Tony Prince a bai sosegá
Aparentemente bon conocí na Hulanda tambe. Algun anja pasá nos tabata na Hulanda na Rotterdam y nos tabata den un café. Mi casá ku ami a observá un caballero hopi strafalario bistí. Kurioso manera nos ta nos a aserké. A bin resultá ku e meneer aki tabata Jules Deelder.
Den kombersashon nos a puntré si e konosé Korsow. Su promé reakshon tabata menshoná nomber di Toni Prince. A bin resultá ku ora e ta na Korsow ta cerka Toni Prince e ta kose su flusnan. Hopi remarkabel.