Vi Coco den su buki “Kosnan di Bida” tomo 2 a skirbi un artíkulo: ”Futuro di nos Futbòl”. Den e artíkulo akí, Vi Coco ta kòmbersá ku Hector Rosario riba futbòl i problema den nos futbòl. Esaki ta parti di e kòmbersashon: …”En todo kaso, e kos di mas importante den futbòl na e momentunan akí ta inteligensia di kada hungador individual, i e armonía ku nan mester tin, pa por komprondé otro.
Tur hende mester obedesé, i sa kiko esun ku ta dirihí e partido ta spera di nan. Mi a puntr’é pakiko e ta kere ku aki na Kòrsou tabatin mihó futbolista tempunan ayá, i el a kontesta mi: “E tempunan aya tabatin Sint Vincentius, tabatin Sint Thomas”. Segun e hòmber akí, e skolnan aki a produsí e mihó futbolistanan, ku Kòrsou tabatin. E muchanan ku a bai e skolnan aki tabata komprondé futbòl bon, nan tabata mas obedesido i nan tabatin interes pa hunga bon. Kada hende tabata duna tur loke  tin pa su klup, pero nèt awor ku futbòl riba su mes a bira un kos di estudio, un kos di téknika, un kos ku mester siña hende pa e sa kiko e mester hasi, nèt awor e interes a baha i si kos sigui bai den den e direkshon ku e ta bayendo akí, anto aki sinku aña lo no tin futbòl mas aki na Kòrsou. “Bo por kòrda ta kon e paisnan di Sentro-Amerika i di Karibe tabata mira futbòl di Kòrsou? I bo por realisá ku na e momentunan akí ta mashá difísil pa Kòrsou gana for di e ekiponan tantu Sentro-Amerika komo di Karibe. Ke men ku nos no por sigui asina, nos mester buska un manera pa nos purba mehorá e situashon akí. Ami no sa kiko mester hasi, pero mi ta sigur ku tin hende ku si sa kiko mester hasi.”… (Kosnan di bida Vi Coco tomo 2 – 1985)

E tempu ei, ku nos muchanan formá pa fraternan, nos a marka historia na Helsinki i obligá rèspèt den Sentro Amérika i Karibe. Un siglo despues, nos diáspora na Hulanda ta pone nos nòmber den historia mundial.

Komo pueblo nos mester reflehá loke e logro aki ta nifiká. No ta trata solamente di un logro di deporte, ni di un resultado. Ta trata di identidat, di orguyo i di historia. Pa mi, dia 14 di yüni 2026 ta un di e dianan ei.

Mi a sinti esei ora mi a drenta den NRG Stadium na Houston. Mi a sinti esei ora mi a mira e bandera gigantesko di Kòrsou desplegá riba tereno. Mi a sinti esei ora nos himno a resoná den un stadion ku mas di 68.000 persona. Pero mas ku tur kos, mi a sinti esei ora mi a realisá ku nos isla chikí a logra algu ku ningun otro pais a logra promé.

Kòrsou a pone su nòmber den historia di mundu.

Dia 11 di yüni 2026, Kòrsou a risibí ofisialmente e sertifikado di Guinness World Records komo e pais mas chikí na tamaño di pais i di poblashon ku a logra klasifiká pa un Mundial di FIFA. E rekòr aki ta rekonosé ku ora Kòrsou a klasifiká na Kingston, Jamaica, dia 19 di novèmber 2025, nos tabatin solamente 156.115 habitante. Esaki a kibra e rekòr anterior ku tabata den man di Islandia. (Guinness World Records)

Djis pensa un ratu: Na mundu tin pais ku tin dies, binti, sinkuenta i shen biaha mas tantu habitante ku Kòrsou. Tin pais ku tin presupuesto ku nos ni por soña di dje. Tin pais ku futbòl ta un industria multimilionario. Sin embargo, tabata Kòrsou ku a yega.Tabata Kòrsou ku a klasifiká.Tabata Kòrsou ku a risibí e sertifikado mundial.I tabata Kòrsou ku a para dilanti di Alemania den su promé partido mundialista.

Nos Bandera

Ora e personal di FIFA a drenta ku e bandera gigantesko di nos isla i a desplegá esaki riba tereno, mi no tabata mira solamente un bandera. Mi tabata mira un pueblo. Mi tabata mira nos mayornan ku a lanta deporte den tempu ku no tabatin fasilidat. Mi tabata mira Ergilio Hato. Mi tabata mira hendenan ku a forma Jong Kòrsou, SUBT, Jong Holland, CRKSV Jong Colombia, Sithoc, Hubentut Fortuna, Scherpenheuvel i tantu otro klup.

Mi tabata mira e maestro, e frater, e entrenadó, e dirigente i e boluntario ku nunka no a sali den korant, pero ku a pone un piedra den e kaminda largu ku a trese nos aki. Mi tabata mira historia.

I talbes e parti mas bunita di e rekòr aki ta ku no ta trata solamente di un sifra. Ta trata di un pueblo chikí ku a demostrá ku tamaño no ta limitá bo soño.

Naturalmente, den teoria por kibra e rekòr aki algun dia. Pero si bo mira e realidat di nos region, probablemente solamente algun di nos rumannan di e antiguo Antia Hulandes por logra esei. Aruba, Boneiru, Sint Maarten, Saba òf Sint Eustatius tin poblashonnan mas chikí ku Kòrsou. Si algun dia un di nan logra klasifiká pa un Mundial, nan lo por kibra nos rekòr. I si esei sosodé algun dia, mi lo ta e promé persona pa aploudí, pasobra e lo nifiká ku otro isla karibeño chikí a logra un milager deportivo. Pero te ku e dia ei yega, e rekòr ta pertenesé na mi pais, Kòrsou. (Guinness World Records)

Despues nos himno.

Mi no sa si mi lo por deskribí e momento ei ku palabra. Tabatin mas o ménos 6.000 Yu di Kòrsou den stadion. Ora nos himno a kuminsá, mi a sinti ku e bos di nos pueblo a subi te den shelu. Mi a mira lágrima. Mi a mira sonrisa. Mi a mira i sinti orguyo. I mi a pensa riba tur generashon ku no a logra mira i biba e momento aki.

Despues Kòrsou a kuminsá su wega kontra Alemania. Nos sentimentu tabata ku Alemania lo bai gana e wega akí i klaro ku nos tabata spera ku skor mas abou posibel.

E promé gol di Kòrsou den un Mundial.

Un gol ku lo keda den historia pa semper. (SB Nation). Ta manera ora e gol di Kòrsou a kai, mundu no tabata eksistí i ta solamente Kòrsou tabata eksistí. Un gol ku a kai kontra e poderoso ekipo di Alemania.

Ora bo a kere ku bo a eksperensia tur kos a sigui otro momentu dushi. Despues di e partido, apesar di e resultado, e fanatikada no a laga su selekshon kai. Nan a sigui kanta. Nan a sigui grita. Nan a sigui mustra amor, eksigiendo e ekipo nashonal bin serka nan bin risibí gratitut di e fanatikada. Esei tabata otro momento ku a impreshoná mi.

Riba e anochi ei mi a mira ku e kos mas importante ku Kòrsou a gana no tabata un partido. No tabata un gol. No tabata un trofeo.Tabata algu mas grandi. Nos a gana un lugá den historia. Un lugá den Guinness World Records. Un lugá den memoria kolektivo di nos pueblo. I un lugá den kurason di tur Yu di Kòrsou ku a mira nos bandera hel ku blou riba e esenario mas grandi di futbòl mundial.

Kòrsou por ta chikí riba mapa.Pero ningun hende por bisa ku Kòrsou no ta grandi den historia.

Kòrsou Felis (Rignald Recordino)

Kòrsou no tin riba bo
semper bisá i rekonfirmá
No tin niun tera pa para band’i bo
Nò, no tin niun tera pa para band’i bo
Felis, felis
Felis ta nos maner’i bib’aki
Felis ta nos maner’i biba si
Felis, felis.

Material usá: Kosnan di Bida – Futuro di nos futbòl -Tomo 2 – Vi Coco- Rignald Recordino: Kòrsou Felis.