Esaki ta kontinuashon di mi artíkulo di siman pasá. https://percypinedo.com/mikorsou/pidi-man/
“Esakinan a frei dies aña. dies añ’ largu. Fo’i skol nan a konosé otro; p’e hòmbu bai traha, p’ei e bira hòmber, p’e traha un kas, pe’i kasa; dies aña”.Tempu el a kasa, ora a yega ora, nan di: Porfin mucha òmbu ta bai kasa!’.
Elis Juliana: “Ma a yega di tin mashá problema k’e yònkuman ku tin un par’i aña ta frei, anto hende ku mal astusia a bis’é ku nan a tende k’e mucha n’ ta “mucha”mashá tempu … kuent’i gatu na saku… e or’ei sí e tin ku buska drechi. Parse tabatin mashá problema k‘e mayornan. Asta ku mama ku papa mester hiba e yu dòktu.
Si sea pa envidia o kalumnia a hinka duda o deskonfiansa den e yònkuman ku tabata namorá, ku su namorada no tabata señorita, e yònkuman asta lo por kibra freimentu, lokual lo a kousa mashá badabada entre ámbos famia. Mayornan di e mucha muhé, gravemente ofendí i humiliá, trastorná den nan fe ku nan yu muhé nunka lo por gaña nan, lo a hiba e mucha dòkter pa esaki samin’é. I despues ku dòkter a konstatá ku e mucha muhé no tabatin ningun pifio, pues dòkter a hañ’é intakto” o sea manera su mama a parié, e dòkter tabata entregá e mayornan un “pampel”(dokumento) riba kua e ta afirmá – felisitando e mayornan – ku nan yu muhé ta “shen por shen”. I ku e “pampel” ey e mayornan por a defendé nan yu su orguyo i su honor.”
Loke Elis no a konta ta, kon a sigui ku e konfiansa entre e pareha, ku a duda den birginidat di e muhé. Pero e kapítulo akí no ta kaba akinan. Mi lo amplia mas despues den e artíkulo di “Saka breit”.
Despues di a frei na kas pa un kantidat di tempu, e yònkuman i e dams tabata “komprometé” ofishalmente, esaki mayoria biaha tabata un seremonia chikitu den famia. Generalmente na kas di e dams. E hòmber tabata kumpra dos renchi di oro i ta laga graba su nòmber den e renchi pa e dams i nòmber di e dams den renchi pa e mes. Ta anunsiá mesora plan pa nan “drenta enlase matrimonial”. E kompromiso ei tabatin un nifikashon masha formal, partikularmente pa mayornan di e dams. E tabata un prueba di seriedat, prinsipalmente di parti di e kabayero. Despues di esei, nan por frei ku un tiki mas libertat i mas frekuente, debí ku mayornan tin mas konfiansa.
Mientrastantu e kabayero tabata traha su kas i e dams tambe tabata prepará kos pa kas: e tabata bòrda òf hak paña di kama, slopi pa kusinchi. Tambe nan por a stèns riba regalo di famia, pepe,yaya, madrina i demas konosínan. Regalonan tabata: kòpi, tayó, sèrbètè, klechi di kama wea, sèt di sèrvis etc.
Komo sirbidó di misa mi ta kòrda ku tabatin “amonestashon di kasamentu” i esaki ta kore tres siman largu, pues henter bario tabata na altura di e kasamentu. Durante sakrifisio di misa pastor tabata anunsiá nòmbernan di e pareha i e fecha di kasamentu, pues si akaso kualkier parokiano por tabatin reklamo kontra e kasamentu pa e por pone esei na konosementu di pastor; por ehèmpel si e kabayero por tabatin kualkier otro mucha muhé ku e tabata “debe” (primintí kasamentu) òf sea ku el a saka na barika i bai laga pa su kuenta.
Tabata sigui anunsio den diferente korant i mi ta kòrda ku den Curaçaose Courant tabatin un rubriká di esnan ku ta bai kasa. Mas aleu Kranshi tabata publiká un lista, pafó di nan edifisio di esnan ku ta bai kasa i tabata un “happening” total pa bo mira hendenan ku tabata akudí na Kranshi ku e úniko propósito pa mira i lesa ken a komprometé ku ken!
Preparashonnan ta sigui: e kabayero tabata buska padrino ku testigu i e mucha muhé tabata buska madrina, kompañando di brùit; diskushon kuantu hende hòmber i hende muhé ta kana tras di brùit; kuantu stroisto, kargadó di kusinchi di renchi, kargadó di kola, kon largu e kola mester ta; kuantu ‘bruidsmeisje” i kuantu “bruidsjongen”; testigu pa kasa na “rat”. Mester a buska outo pa kore bruit, madrina, padrino ku tur testigu ku otro partisipantenan na e kasamentu.
E dama ta bishitá kosedó di su bistí pa e pas shimis di brùit. Durante tur e preparashonnan akí, e pareha tabata bishitá pastor di nan parokia pa haña preparashon nesesario, tokante aspektonan kristian, den bida matrimonial. Tambe nan tabata bishitá famia, konosí i amigunan, pa hiba tarheta di invitashon na nan kasamentu. Esnan ku no tabatin nada material, tabata duna sèn kèsh. Despues di tempu a kuminsá pone mesa na negoshi i ei e pareha tabata pone kiko ta e kosnan ku nan lo tin gana di risibí komo regalo. I mas despues a bin asuntu di “ènvelòp”.
Miéntras dianan ta bai pasando, e pareha tabata bai bishitá kas di famia i konosínan pa invitá nan personalmente, entregando un tarheta di kasamentu i tabata hinka basta tempu den e bishitanan akí, ya ku kada kas ku nan bishitá nan mester a sinta kòmbersá maske ta un ratu.
Otro siman: Saka breit!
Material usá: Matrimonio i parto – Elis Juliana desèmber 1988 – AAINA – Pierre Laufer Pidi – Man – Kwenta pa Kaminda 1964
Hopi…. leuk mes. Lesando e artikulo aki mi ta bai bek na Modista Catharina Fabias di den Wecoewaweg, Flavia Phelipa den St. Helena i Nènè Heronimus di Seru Pretu. Kosedonan di bande ns barionan. Anto tur hende sa for di trempan i tey para wak na misa di Wishi. Dushi tempu.