Na Kòrsou nos ta gusta “kasa plaka”(pusta plaka) Sapaté, na bo sapatu! – Reginald V. Römer.
Kòrsou tabatin un relashon “komersial” masha apart ku Venezuela. Diariamente nos tabata ligá i en espera di notisia for di Venezuela. Di djaluna pa djaluna. Igual ku mayoria di otro pueblo nos tambe gusta purba nos suerte, i si no ta tur dia, maske ta djadumingu òf fin di luna nos ta riska nos heldu. Masha hopi hende ta gana nan pan di kada dia ku bendementu di number i otro nan tabata gana òf drecha nan nan entrada bendiendo karchi òf saka un papel bai sait. Na tur kantor di gobièrnu tin hendenan ku ta “parti nan karchinan” pa fin di luna tan pronto ku un luna nobo kuminsá. I klaro ku tabatin i te ainda tin e “big wheel” den e lukrativo forma di entrada ku bendementu di number. Esaki ta un bisio ku ya no por sali mas di nos pueblo. Pero wega di number ta sigui gewon i ni maske gobièrnu a lanta Wega di Number Kòrsou, loteria ilegal a sigui mesun kos. No for di Venezuela ni Santo Domingo so, pero awor mas serka di kas, di Aruba Boneiru i St. Maarten.
Laga nos ta franko, korant i radio a kuminsá publiká numbernan ilegal ku sali i tabata rekomendá kua number (liña) ta sali i Ced Ride den su kansion ta kombidá tur hende “ban Punda” pa band’i marshe nos por kumpra number. Tur polis konosé tur bendedó di number. Ningun polis no ta kèns ni e bendedó di number tampoko ta kèns.
Desaroyo wega di number!
Na Kòrsou nos tabata konosé wega di number di djaluna pa djaluna. E benta di wega di number tabata den diferente forma. Mi ta kòrda komo mucha den nos kas na Mundu Nobo, kon Djo Pishilingui (Mi no sa su nòmber ofisial te dia djawe) tabata pasa na kas i tabata bende mi mama number, mi mama tabata kumpra su number di kas (33) i su number faborito tabata 55. I Djo tabata puntra mi mama, pone bo “kos” pa bo? Despues mas den siman òf wikènt, Djo tabata pasa kobra. Mi mama tabata paga òf tabata bisa Djo: lag’e bai numa, pasobra awe krus ta bou, indikando ku e no tin sèn pa paga e number i tabata entregá e number(nan) bèk. Por sierto ku Djo Pishilingui tabata un di e riferonan konosí i serio i ora bo number sali bo tabata garantisá di bo sèn. Djo tabata bende number riba papel. Numerá di 00 te 99. Hopi biaha nan no tabata bende 00. Un detaye masha importante tabata, ku e úniko prueba ku mi mama tabatin ta e echo ku el a paga i e prueba ku te tin sierto number, ta solamente Djo Pishilingui tabatin esaki, pasobra e papel ei ta Djo so tabatin.
Seshi (mihó konosí komo Seshi kayon bòm) en kambio tabata bende number pa tersera persona i tabata bende number riba un karchi chikí. Bo por a kumpra e number kompletu pa 1,50, òf bo por a bai baka, kitando un orea di e karchi, indikando ku ta mitar di e karchi so bo a kumpra (Ban baka ku un òf mas hende( Laga nos kumpra un number òf bièchi huntu; si e gana nos lo parti e ganashi (Sapaté, na bo sapatu! Reginald V. Römer). Seshi ta yega nos kas di porta patras, pasobra ta un bisiña bon konosí di nos e ta i ta puntra mi mama: “Elsa, bon ke mi awe? Ta Oriente mi tin, ku ta hunga te lat i bo tin chèns di paga te mas lat”. Òf: Elsa mi tin ko’i mayan, kiko mi pone pa bo?”
Tantu Seshi (wela di Sonny) komo Elsa(mama di Sonny) tabata bisiña di hopi aña di nos den Mundu Nobo i ora nan bin bende number nan tabata kana drenta nos kas, manera ta nan kas nan a yega.
E bendementu di number tabata e tempu ei na kas i bendedónan tabata pasa na kas pa bende i kobra i si a gana pa entregá premio. Ora ku premio kai bo tabata tende mesora e gritu di: “Oh, baka tin sebu ( bo tin moda (hopi plaka)(Sapaté, na bo sapatu! – Reginald V. Romer). E proseso aki tabata un proseso diario, ya ku tur santu dia tabatin otro wega di number, tur di Venezuela – loteria di Caracas – Loteria Zulia – Loteria Maracaibo, Loteria Táchira i Loteria di Oriente. Tur wega tabata hunga den kareda di 8 pa 9or i solamente Oriente tabata hunga den kareda di 10or di anochi. Kasi bo no tabatin kòntròl i ta esnan ku posibilidat di radio i tabata sa e frekuensia por a averiguá kua number a sali. Mayoria biaha tabata wega di number di dos sifra tabatin. Ahan, anto bo por a gana dilanti i patras (back and front). E úniko dia ku bendedó i kumpradó tabata bira shete loko un belá, tabata djadumingu ku wega di Sto. Domingo, ku ta un wega ku tabata riba djadumingu so i tabata hunga de oranan lat di mainta bai kue mèrdia. E wega akí, for di djasabra henter dia, te banda di 11or di mainta djadumingu tabatin Kòrsou den su gara. Na diferente kas, nan tabata skucha resultado via radio.
Tabatin e sistema tambe, ku na boka di trabou bo tabata haña personanan ku tabata bende number riba pakete di fin di aña (ponche krema, kaha di serbes, ham pa herebé, etcetera). Lòt riba muebel, paña di mesa bòrdá i otro artíkulo. Asina diferente hende tabata rondia nan bida.
Despues wega di number a bai un nivel mas haltu, kaminda a kuminsá hunga number di tres i 4 sifra. Bo tabata por a bai kantor di number bai kumpra number i esaki tabata konsistí di bukinan ku tabatin riba un mesa, kaminda bo por a ranka e number deseá i paga esaki serka e persona den ofisina. Premionan a bira mas haltu (mas atraktivo) i number a bira mas karu, pero por a diferensia mas tantu tambe, kumprando number di depchi, dies plaka, un yotin, florin i mas ku’n florin.
Tabata temporada tambe ku yen di kos straño tabata pasa den kompra i benta di number. Numbernan tabata hunga masha straño i e resultado tabata laga hopi hende zonzá. Doble R su komposishon den esaki a papia palabra kla: Wak’ é di tur banda, kaminda nan ta kanta kon 00 tabata sali regularmente i ta riferonan so tabata gana. Kòrsou a drenta despues den un gara di rifa riba outo, i kasi tur fin di luna tabatin lòt riba un outo. Tambe Kòrsou a drenta un drive di rifa kasi tur fin di luna un suma di 100 mil florin. Esaki tabata wega di riferonan mes. Nos no por lubidá “ Radio Hoyer Car Club” kaminda trahadónan a kai será, pa motibu ku delantá algun hende tabata sa kua number lo a sali e anochi.
E siguiente kapítulo tabata lòt riba kas: “ Beautiful Homes”, ku mi no sa na kuantu okashon a rifa e kas i nunka un hende a gana e kas, òf bo a tende ku ta un hende di e famia mes a gana e kas. Tabatin mas kaso di ganamentu di kas i nunka e ganadó a risibí su premio. Kasonan kaminda a lòt outo, sakando potrèt di e outo den showcase i despues tampoko ganadó a risibí su outo.
Miéntras tantu nos a yega na e siguiente nivel. Kaminda rònt Kòrsou tin ofisina di number di 5 pa 6 rifero i ku wega di number ta regulá pa gobièrnu. Esta Wega di number Kòrsou. Pasobra banda di esaki tin, St. Maarten, tin Philipsburg, tin Diario, tin Flamingo tin Super 4, tin Caribeña. Bo tin posibilidat di kumpra Lotto, Powerball, Mega Millions, tur sorto di “ scratch cards” , Fantasy Five, Jackpot, Euro Millions, i Dios sa kuantu otro posibilidat tin riba loteria ilegal aki na Kòrsou. Bai de wei, si bo no a logra kumpra bo number, legal òf ilegal na un di e miles di ofisina di number, chèk bo suerte na e chines pegá ku bo kas, den su toko òf minimarket. Ei tambe bo por kumpra number.
Awe nochi tin tur sorto di wega atrobe, kiko mi pone pa bo?