Skirbiendo e artíkulo akí, mi a realisá ku mi bishita na kualkier hòfi na Kòrsou, tabata pa fiesta òf un òf otro enkuentro i no pa opservá i disfrutá di e bunitesa, i e trankilidat di naturalesa. Por sierto mi konosé un buki tokante hòfi di Kòrsou: Curaçaose Hofjes, Ruud A. Janknegt.
Den e buki akí a hasi un intento serio pa inventarisá nos hòfinan i konta algu di nan istoria i kiko a para di nan. Na tur nan a konta 36 hòfi den e buki. Nan a kategorisá hòfinan den:
– hòfi tradishonal;
– hòfi moderno; i
– hòfi pa fiesta.
Komo farandulero mi tabatin bastante kontakto ku diferente doño di hòfi, pero tur e hòfinan akí, tabata hòfi kaminda tabata òf ta organisá fiesta òf kualke otro evento ku ta reuní hende. Kasi mi por bisa ku nan tin e hòfi, pa un lugá komersial i no pa ambiente kultural, plantashon etcetera. Mashá poko di nan tin e hòfi komo un lugá úniko i komo lugá di nos herensia kultural, nos patrimonio kultural. Hopi biaha e doño di hòfi, pa yuda ku mantenshon di hòfi, a kuminsá hür e hòfi pa tur sorto di aktividat, p’asina yuda kubri su gastu. Mayoria biaha e doño a traha un flur di betòn, pone un afdak riba dje i hala e flur fini p’asina e bailadó por skùif mas fásil. Un tiki mas leu tin un òf mas bar trahá i tambe a sòru pa dos tres baño. Kon ku bo mir’é, e hòfinan akí, ta esnan mas popular, mas konosí, pasobra tur ora nan ta den notisia pa un òf otro evento ku ta organisá den e hòfinan akí.
Hopi biaha bo ta haña e hòfi serka di un lanthùis, un kunuku i asta serka un kas komun i koriente. Hòfi ta mas bien un hardin di fruta, kaminda tin diferente palu di fruta plantá i ku palunan grandi di mespel, koko i otro fruta, ku fuera di pari fruta, ta duna bon sombra tambe pa por sosegá i sinta bou di palu trankil i kòmbersá. Mas bieu e hòfi ta, mas tantu palu di fruta grandi i bieu bo ta haña. P’esei mes bo ta haña den e hòfi tradishonal hopi pal’i fruta grandi.
Tin hopi hòfi ku bo ta tende di nan, pa nan karakter mas sosial i kaminda regularmente tin un òf otro aktividat i tambe ku nan ta bin bishitá pa motibu di e hòfi mes, esta e hòfi tradishonal. Por ehèmpel hòfi Bloemhof, kaminda tin diferente aktividat ta tuma lugá i e hòfi ta mantené su karakter di hòfi tambe. Fuera di esaki tin diferente aktividat sosial ta tuma lugá den e hòfi akí. Hòfi Mango ku Jandino a desaroyá na un manera ku hende lokal i turista ta bishitá i disfrutá di e naturalesa úniko di e hòfi. Hòfi Pastor úniko den su sorto i tambe masha gustá pa su naturalesa.
For di kuminsamentu di siglo akí, a kuminsá hasi uso di hòfinan pa diferente evento sosial, familiy day, karioke, bingo, bon ku n’e, reunion di partido polítiko, dia di kushinamentu i tur otro sorto di aktividat ku bo por imaginá. Hopi di e hòfinan akí a stòp por sierto di fungi komo hòfi, pero mas bien tabata konosí i tabata usa e hòfinan akí simplemente pa lugá pa organisá evento i hopi di e eventonan akí tabata e popular fiesta di banda, fiesta di reflection, fiesta di kòmbèk etcetera. Bo por bisa ku esei a bira tambe e kanser pa diferente hòfi, pasobra e molèster di zonido pa bisiñanan a para bira ku ta difísil pa organisá fiesta den hòfi. Tuma por ehèmpel, Barbolina, Biesheuvel, Pachi Sprockel, Pieters, pa menshoná algun ku a haña nan regularmente ku reklamo di bisiña i ku bishita di polis ku a pone ku fiesta no por a sigui.
Den e buki Curaçaose Hofjes, mi a sinti falta di algun hòfi, kaminda mi sa ku diferente pachanga a tuma lugá. Hòfi Joonchi, Hòfi Dèl ku su sede Indju Country Club, Choloma, Agustin, Suares, Liverpool, Hòfi Cow, Fandjua, Nobrega òf Marconia, Nita. Anto ainda mi sa ku mi no a menshoná tur. Tin hòfi ku a haña sla pa susesonan desagradabel ku a tuma lugá na e sitio i ku a pone ku nunka mas nan a lanta kabes.
Hòfi Dèl den añanan 70/80 tabata un hòfi hopi aktivo.Tabata usa e hòfi pa diferente aktividat pa mucha, hende grandi, deporte, reunion i hopi mas.
Hòfi Dèl tabata organisá bastante aktividat pa nan miembro. Sr. Alvarino “Chòn” Faneyte tabata atministrá e hòfi. Komo promotor e tabata organisá fiesta baliabel. E hòfi por a karga mas o ménos 2000 bishitante. Hòfi Dèl tabata spònser diferente ekipo di sòfbòl.
Hòfi Dèl
Awor aki tin sierto hòfi ku a krea fama ku sierto aktividat i nan ta, bo por bisa sigurá di e aktividat ei tur aña. Por ehèmpel Hòfi Bill, ku tur aña ta e lugá kaminda diferente aktividat relashoná ku seú (maramentu di lensu i otro aktividatnan) i tambe ta e lugá ku bailadónan di kòmbèk gusta frekuentá pa un bon fiesta.
Rust & Burgh ainda ta gosa di fama komo un lugá kaminda riba fecha importante di aña diferente fiesta ta tuma lugá ku e mihó bandanan di Kòrsou. Tantu e hòfi komo e klup nan ta usa ainda pa fiesta i otro aktividatnan.
Na Banda Ariba, Hòfi Granviel ketu bai ta un hòfi kosi pa family party, bon ku n’e, bingo i karioki. No tin masha aktividat di fiesta, pasobra bisiñanan no ta mashá enkantá ku e idea di fiesta i tokamentu duru. Famia Granviel ta atministrá Biesheuvel tambe, ku sí tabatin hopi problema ku organisashon di fiesta ku banda, ku muzik duru i ku bisiñanan reklamando.
Barbolina tabatin su problema ku bisiña, pero tambe ku áwaseru ku tabata i ta kousa basta desaster na e hòfi pone ku doño di hòfi a manera disgustá den organisamentu di fiesta etcetera. Hopi biaha tabata pone ku fiesta mester a kaba pa 10 òf 11or i ningun organisadó di fiesta no ta bai laman ku un plan asina.
Hòfi Pachi Sprockel su aktividatnan a para, pa e konstante guera ku nan tabatin ku bisiña pa motibu di reklamo di zonido duru. E hòfi t’ei ainda, pero nada mas di organisashon di fiesta.
Hòfi Pieters, Pachi Wiwi, Hòfi Fidel ainda ta den tapara i organisadónan ta hasi uso di e hòfinan akí pa nan ambiente di fiesta.
Na Banda Abou, awor aki Hòfi Mango a haña un bida nobo, ku Jandino Asporaat komo doño i ta eksplotá e hòfi pa hende bin disfrutá di e naturalesa i su aktividatnan ei den. Hòfi Abou i Hòfi Pastor no tin aktividatnan ku nan tabatin ántes i ta riba un low profile.
Un tempu Hòfi Shon Ma Rooi tabata basta gustá pa su fiestanan, pero tin ratu kaba ku no tin moveshon na e hòfi ei. Hòfi Hooi tampoko tin masha aktividat, miéntras ku un hòfi ku a keda mantené su nòmber i ku te ainda tin diferente aktividat i ta gustá sigur pa loke ta trata aktividatnan kulinario i tambe aktividatnan polítiko, ta Hòfi Popo Rojer. Esaki ta e hòfi tambe ku mi a bishitá pa un kantidat di aktividat diferente. Fiesta ku banda internashonal i banda lokal, organisashon di seú, di karnaval, aktividat polítiko, aktividat religioso, filmashon di pelíkula, songfestival, feria, piknik i mi no sa kua aktividat mas. Famia Rojer a keda atministrá e hòfi te dia djawe. Parti pafó di e hòfi tin un lugá pa barbecue, miéntras ku tin tambe e konosido 4 of July Snack ku ta forma e totalidat.
Mi mester bisa ku den su totalidat nos hòfinan ta bastante deskuidá i doñonan ta man na kabes, pasobra nan no tin fondo (sufisiente) pa mantenshon di hòfi ku ta tuma hopi tempu, pero tambe hopi sèn pa mantenshon.
Tin un hòfi ku ta mashá bon mes mantené i ku no tin problema ku otro hòfinan tin, Hòfi Botelier, pero esei ta un lugá pa bo último baile.
