Den artíkulo aki, mi kier sigui bòrda riba e sekuestro di 40 aña pasá i su diferente kosnan ku a pasa durante i despues di e sekuestro. Te asina leu ku mi sa, no tin un buki publiká tokante e sekuestro akí, pero si “Editorial Aimee’s Atelier”,( Aimee de Lannoy) a kompilá un buki, un rekuento periodístiko di e sekuestro di vuelo 252 di Línea Aeropostal Venezolana, ku ta kontené rekorte di diferente korant lokal i internashonal. Título di e kompilashon: Aeropoker 252-84.
Aimee a kompará e sekuestro di 1984 ku e wega di poker. E wega di poker ku a kuminsá 29 di yüli 1984 entre 1or i 1.30 p.m. Apuesto tabata un kantidat grandi di arma, 82 pasahero di un avion di LAV biahando di Maiquetia pa Kòrsou.
Na e mesa tabatin na un banda, un hòmber yamá Hilerant Dominique, eksiliado haitiano, militar inaktivo, bibá na Venezuela, kondená na pena di morto pa gobièrnu di su pais Haiti. Un hòmber instabil i desesperá.
Komo su partner, Felix Segundo Castillo, dominikano, ménos vèrsá den e wega pero no ménos desesperá. Tur dos ku fe i speransa di: gana i kobra e premio fabuloso di $ 5  mion, un helikòpter, 50 mitrayur i 40 pistol.

Na e otro banda di mesa Gobièrnu di Antia Ulandes, representá pa su promé Minister ing. Don Martina, Minister pa Asuntunan Ekonómiko, Gilberto Thomas, sikólogo dr. Andrade, representando Gobièrnu di Venezuela, Gezaghèber Ronald Casseres, Kònsùl General venezolano Luis Ochoa de Terán, direktor di Departamento di Salubridat Públiko dr. Carol Elassaiss, i sikólogo drs. Harold Arends.
Nan interes tabata: gana i liberá e 82 pasaheronan a bordo di LV 252.

Hilerant Dominique i su partner a kuminsá e wega ku karta insignifikante den nan man, pero ku un aire di poder ku a obligá nan atversarionan aktua kuidadosamente pa no divulgá nan wega.

Por sierto ku kasi ningun hende no tabata sa di e sekuestro. “Van a dejar que los niños abandonen el avión en Margarita. Solamente los Niños. No quieren policías en la pista. Nadie debe acercarse al avión”.
E frasenan akí, pronunsiá den un komunikashon entre avion i toren di Maiquetia, a pone ku Yu di Kòrsou, afisionado di radio amatùr, Alex Alberto haña sa ku algu tabata pasando ku e avion DC 950 di Linea Aeropostal Venezolana ku mester a baha na Kòrsou riba djadumingu 29 di yüli 1984 pa 1.45 di mèrdia. Komo koresponsal el a pone R.C.T.V na altura i asina pueblo di Kòrsou tambe a haña sa ku tabatin algu straño tumando lugá abordo di e avion.

Tabatin hopi kòmbersashon, deliberashon entre e dos partidonan i tabatin diferente mediadó. E kapitan di e buelo tabata papia, sekuestradornan tabata papia, sekuestradornan tabata preshoná pasaheronan pa papia, partner di Hilerant Dominique a papia, (esaki parse tabata un “zèt” maestral di e sikólogo venezolano, tresiendo e señora di Dominique ku tabata na estado, pa distraí e sekuestradornan);  ing. Don Martina, Minister Gilberto Thomas i sikólogo dr. Andrade tabata papia. Durante e operashon akí di 36 ora, bo por komprondé ku kansansio tambe a hunga un ròl i na dado momento, kapitan di buelo a manda Minister Gilberto Thomas bai drumi.

Un otro movida poko chistoso tabata e intervenshon di Sr. Don Martina ora el a bisa e sekuestradornan: “estamos mandando awa i eis”.

Miéntras tantu medionan di komunikashon tabata hasi nan máksimo esfuerso pa informá Kòrsou i mundu di loke tabata sosodiendo na  nos aeropuerto. Salvo algun periodista, tur sobra periodista di Kòrsou tabata manera sekuestrá den sala di reunion di aeropuerto. Di otro banda, periodistanan di NBC si a haña servisio “red-carpet” di Kòrsou. Apesar di tur esaki, mester menshoná ku Radio Hoyer a skor masha haltu ku kobertura di e sekuestro akí. Medionan di komunikashon tabatin masha bon palabra pa nan koleganan di Radio Hoyer.

Chaco i Rosa Castro

Ku tur atenshon fihá riba nos aeropuerto, asina mes ALM a maniobrá baha dos Twinotter, sin lus na Hato. Tambe personal di ALM a hunga un ròl grandi den e desenlase di e drama akí. Por menshoná kon Srs. Carl Legrand i Papi Obiana ku a hiba kuminda i kos di bebe avion. Sr. Harold Fer, tata di Lesley Fer, ku aktualmente ta kordinadó di tim di krísis i desaster, tabata e persona ku di afó a habri e porta patras, pa fasilitá DISIP pa drenta avion. Hefe di seguridat di ALM, Sr. Brigitha, ta e persona ku a baha tayer di e avion i piloto Blanchard tabata e persona ku tabata interkambiá ku Dominique na franses.

Miéntras tantu un helikòpter di Diaro 2001 a yega Kòrsou i kier a baha na aeropuerto. Toren di Kòrsou a ninga nan pa baha na Hato i bisa nan ku nan no tin pèrmit pa bin Kòrsou mes. Mirando ku nan no tabatin bastante kombustibel pa bai bèk, a permití nan baha na Koral Tabak i ei polis lokal a sigui hèndel ku nan i nan por a tènk pa bolbe Venezuela.

Den avion sekuestrá, pasaheronan tabatin tur sorto di plan pa a lanta kontra di sekuestradornan, pero e manera deskabeyá ku sekuestradornan tabata aktua, bashando kerosin riba pasaheronan, menasando di kima avion a pone ku e plan di pasaheronan no a kristalisá.

Finalmente, den un akshon relámpago, kaminda e partner di Hilerant Dominique tabata papiando ku ne, DISIP, enkabesá pa Henry Lopez a probechá di e situashon akí, drenta avion i ku tirunan dirigí a mata tur dos sekuestrador i kasi tur pasahero a sali ileso for di e akshon aki.

Klaro ku despues a sigui diferente kaso di hendenan ku a keda ku trouma, momentunan di hubilo ku Kòrsou den sentro di atenshon i risibiendo masha felisitashon di rònt mundu pa e bon trabou realisá i tambe evaluashon di e suseso tantu lokal komo internashonal.

Rumannan di e dominikano Segundo Felix Castillo a bin Kòrsou pa regla entiero di nan ruman i a duna diferente deklarashon tokante e asuntu i di asesinato di nan ruman. Pa Hilerant Dominique no tabatin tantu atenshon i den un seremonia katóliko, ounke ku den promé instansia pastor di misa di Coromoto no tabata kier a hasi misa pa Hilerant Dominique, a tene rèspòns pa despues dera e dos sekuestradornan na santana di Brievengat. Despues tabatin un temporada relativamente largu, ku tabata sirkulá e idea ku spiritu di Dominique tabata terorisando Kòrsou. Tabata atribuí e ola di krímen di e tempu ei, na “e maldishon di Dominique”. Na diferente okashon, diferente hende tabata pretendé di mira spiritu di Hilerant Dominique na tur skina di hanchi di Brievengat i bisindario.

Siguiendo ku e wega di poker: Sin mustra bo kartanan, bo por gana wega. Basta bo sa di yama bo atversarionan afó ku sabiduria, inteligensia i fe den bo pasonan. Prueba ta e resultado ku Gobièrnu di Antia a logra dia 30 di yüli 1984, salbando bida di 82 pasahero den e avion LV252 di Linea Aeropostal Venezolana.