Bo ta haña nan den tur pais na mundu, den un mas ku e otro i hopi biaha nan ta un problema grandi pa komunidat. Mi ta refiriendo na esnan sin kas, sin kuido, sin un dak riba nan kabes. Nan problemanan ta diferente, drogadikto, alkohóliko, tiponan straño ets.
Elis Juliana ta konta nos den su obra Daklos, den Wazo riba Ròndu, di e situashon di nos hendenan den e tempu ei. “Na 1903, hopi hende, tantu muhé komo hòmber tabata biba riba kaya praktikamente. Anochi nan tabata bai drumi unda ku ta, riba un stupi, òf den un portada di un pakus.
Un Sosiedat Karitativo di Mazòn a laga traha dos afdak pa e infelisnan sin kas. Unu na Punda dilanti di e aktual edifisio di K.N.S.M. i e otro dilanti di e sementerio katoliko na Roodeweg, djis pariba di e palu grandi di indju. E afdaknan a haña nòmber di “Daklos”.
“Esun di Roodeweg tabatin tres muraya di piedra mas o ménos tres meter di haltura i su dak tabata di panchi. Su largura i hanchura mas o ménos shete pa kuater meter. Su entrada pa lado di kaya, tabata kompletamente habrí ku kuater pilá di piedra. Riba e flur di semènt tabatin un subida di tabla largu pa drumi ariba. Djis den besindario tabatin un warda di polis ku mester a tira bista riba Daklos”.
“Den dia hendenan di kunuku ku tabata bin bende nan fruta i bèrdura den stat, tabata sosegá o skonde áwaseru bou’i Daklos. Anochi pa banda di och’or nueb’or “daklosnan”ta pasa bai nan “penshon” kargando nan bònder, blek’i awa, karton i tur nan potoshi bou’i brasa pa drumi ariba, tapa kurpa o pa hinka bou’i kabes. I semper nan tabata pleita pa lugá komo esun ku yega promé tabata skohe e mihó sitio”.
Elis ta sigui konta den e obra ku tabatin un holó hopi stinki henter dia i e lugá tabata sushi i fis. Ta tras di e muraya mes tur hende tabata hasi nan nesesidat i tabata un porkeria di otro mundu. Tabata un bista masha penoso i ora di mal tempu, nan ta tur primí riba otro, nan tabata pasa anochi.
Elis ta konta nos ku Daklos tabatin su romantisismo tambe. Tabatin poko miembro masha fiel di Daklos: Ninia, Shon Bea Poron, Pa’Pipi, Zjil Kabuya, Zanzin Pèkèpèkè i Shon Kola.
Elis Juliana: “Mainta e sabínan tabata lanta bai mas tempran posibel komo seis or ora polisnan bin grita: “goeie mogge”vooruit opstaan!”, esnan ku a “pèrdè San Juan”mester a bai warda tuma basora ku awa pa laba flur di Daklos. Den kurso di aña 1938-39 a bin tumba Daklos pa a traha “schuilkelder” (refugio pa skonde durante Segundo Guera Mundial). Guera a kaba, “schuilkelder” tambe a disparsé. Ta e palu grandi di indju só a keda ta konta e chuchubinan ku tur dia ta bin kanta den su ramanan, e novela di Daklos”.
Na 1960 Pader L. Van der Vaart O.P a funda Stichting Thuislozenzorg. E meta prinsipal tabata pa nan por yuda esnan ku no tin un lugá pa keda na un kas, dunando nan kuido.
E promé kas pa hendenan daklos tabata Stella Maris situá na Penstraat 34. E nòmber ta e abitantenan mes a skohe pa nan kas.Despues na 1966 “Fundashon Yuda nan Tres” a tene un akshon grandi i a rekohé fondo pa por a kumpra e kas situá na Pietermaaiweg 152. Nan ta pidi i haña sèn di Landsloterij, nan mes a organisá loteria, bendementu di mata i tambe tabatin un Show grandi, organisá pa Rudy Plaate titulá “Gran Desfile Artístiko 1961”. E konosido lokutor, Luis Guillermo Puchi tabata maestro di seremonia i e show ei a produsí Nafl. 839,50
Pader Paul Brenneker i su grupo tambe tabata hopi aktivo riba e tereno akí, ku nan “Pan pa mi ruman” i “Kas pa mi ruman”.
Durante e promé 4 añanan di eksistensia di e kas den Penstraat, Stichting Thuislozenzorg no a haña ningun depchi di supsidio serka gobièrnu. Na 1965 gobièrnu a primintí di bai hasi algu na e situashon eksistente. Miéntras tantu e situashon a empeorá, paso te e momentu ei tabata trata di hende hòmber so, miéntras ku e situashon a bira meskos pa hende muhé.
Den relato anual 1978 di Thuislozenzorg ta menshoná: “het is onbegrijpelijk voor het Bestuur, dat tot de dag van vandaag aan de Stichting elk vorm van subsidie door de overheid geweigerd is. Vorige Besturen hebben tot drie maal toe officieel subsidie aangevraagd”.
Stichting Thuislozenzorg a sigui lucha pa ekspanshon di e kas na Pietermaaiweg i tambe a bringa pa haña un kas pa mucha muhé, i tabata te 1986 ku a habri “Kas Broeder Pius”. Mester destaká akí indudablemente e trabou duru i kontinuo di Broeder Pius. Por sierto ku esaki no ta e úniko proyekto òf organisashon den kua Broeder Pius a traha, pero mester menshoná su trabou komo:
- Presidente di Stichting Thuislozenzorg;
- Lider di grupo di patfender St. Tarcicius;
- Lider di grupo den GOG;
- Fundador di Buurtcentrum Groot Kwartier;
- Komisario Sosiedat di Siegu;
- Komisario den Pareho (Pa resosialisashon di Hóben);
- Komisario di Fesebako;
- Fundador “Kas Broeder Pius”.
Bruder Pius nasé dia 13 di mei 1917 na Ulanda, a muri dia 12 di mart 1991 na Kòrsou. Por sierto mi ta tin e honor di por a traha ku e persona akí den e.o Pareho.
Awendia, siglo 21, Kòrsou tin diferente internat i tambe diferente kas di kuido, pero te dia djawe nos tin bastante hende ku no tin un hogar.
U’n ta tur hende ku ta sin kas ta un drogadikto of mester di ayudo mental. Tin di nan ta hende normal manera abo i ami i ku bida a bati. Un ta nos tur a hasi mal eskoho den bida.– Sherrilyn Kenyon