Danki, masha danki!
2023 Tabata un tremendo aña pa mi, pa loke ta trata mi blog. Mi a kambia i laga Kuki + Ko, drecha i supervisá mi wèpsait. E kambio aki a yuda mi hopi i mi a haña mas konfiansa den skibimentu di mi artíkulonan. Mi ta gradesido na Centraal Historisch Archief i na Biblioteka Mongui Maduro, ku mi por a konta ku nan kooperashon. Mi ta hasi e trabou akí ku plaser i mi ta ansioso pa 2024.
Mas ku tur kos mi ta sumamente kontentu ku abo ku ta lesa mi artíkulonan, mi a analisá mi blog ku Google Analytics i mi a ripará ku Kòrsou, sobra islanan di Antia, Hulanda, Merka, Kroasia, Canada, China i na Australia tin hende ta lesa mi blog. Masha danki, sigui lesa, sigui kompartí mi artíkulonan i mi ta konta riba bo remarke, sugerensia i kritiká. Un Bon Pasku i felis 2024.
Kas tabata ariba abou, tur muebel, stul, mes i kosnan di den kas, tabata tapá bou di un laken. E holó penetrante di fèrf, bo por a sinti esaki for di momento ku bo drenta porta di kurá. E diferente pida sentebibu ku tabata bentá den adrei abou pa kita holó di fèrf. I tòg, ku tur e desórden akí, e situashon tabata masha normal pa e temporada di aña i ku e no ta molestiá ningun miembro di famia.
E úniko kos ku ta preokupá e miembronan tabata e tareanan ku nan tabata haña durante di dianan ku ta sigui; esta fèrf kurpa di kas, kurá di kas, dorá spil, vèrnisá stul i mesa i fèrf kozein ets. Esaki tabata e situashon den kasnan di Mundu Nobo. Den kura pafó bo tabata haña linoli òf kèn tail bieu pone pa tira afó. Si bo no tabata sa ku fin di aña ta yegando, e situashon akí ta rekordá bo ku fin di aña ta den kurpa.
Bo tabata yuda komo hóben, e trabounan akí tabata tuma lugá den temporada di fakansi di skol, pero tabata reina un situashon asina dushi na kas, diferente kos nobo pa kas, diferente paña i sapatu nobo i hopi kos di kome i bebe dushi.
Bo tabata traha pa drecha bo kas i pa bo kas keda tur afó. Nos no tabatin palu di Pasku nunka na kas ni e tempu ei no tabatin asuntu di lus ni na kurpa di kas, ni den palu ets. Sí nos tabatin tur nos pòstkart ku mi mama i rumannan mas grandi a haña, sea pone riba mesa den kas òf pega na frishidèr. Nos kas tabata simpel, bunita i tabata hole dushi.
Tampoko nos tabatin sena di Pasku, serka nos ta Pasku den dia i henter dia tabata kome e kosnan dushi ku mi mama a prepará. Nos no tabata kome kalakuna, pero tabatin sòpi i bestia chikí, ku aros piti pua, roibit i banana. Den dia tabatin chukulati pa bebe.
Nos mester a bai misa komo obligashon. Pa ami esaki no tabata problema, paso mi tabata sirbidó di misa i durante di dia di Pasku, mi mester a sirbi diferente misa na parokia di Coromoto. Despues di misa, bo ta keda ku bo paña nobo bisti i bo por a bai kana keiru ku amigunan i bishitá algun hende den bario. Serka nan bo tabata haña lèter, chukulati i serka bo “pepe”, tanta òf wela, bo tabata haña kisas un florin òf algu mas, pa bo por a kumpra vürwèrk mas lat den luna. Mas lat atardi/anochi bo por a asta haña un tiki ponche krema òf anis.
Birando mas grandi, e ambiente a kambia drástikamente pa loke tabata nos selebrashon di Pasku. Nos a haña nos grupo di amistat i nos tabata selebrá Pasku na nos estilo. Pa kuminsá nos tabata bai misa di Ourora 5or di mainta. Nos tabata bai Misa di Coromoto, pasobra einan Grupo di Aguinaldo Los Pajaros tabata toka den i pafó di Misa. E grupo akí tabata bou di direkshon di nos mener di skol di spañó, Sr. Frank Francisca. Den e grupo akí tabatin diferente di nos amigunan ta toka/kanta. Pa menshoná Sheila Gonet, fundadó di e grupo, i komo kantante di entre otro “Madrecita Mia” i “De Colores”. Despues di misa e tokamentu tabata sigui den kura di misa, miéntras ku nos por a saboriá un chukulati.
Ya den dianan anterior amigunan a reuní i nos a palabra ku nos ta organisá un komementu Pasku anochi na kas di un di nos miembronan. Kas di famia Gonet, fam Riera, Velder òf di fam. Cijntje. Kada miembro mester a sòru pa algu di e menú di komementu e anochi ei, i nèchi bistí nos tabata bini huntu i selebrá nos Pasku. Nos mes tabata kumpra loke nos tabatin mester, nos mes tabata kushiná i nos mes tabata sòru pa laba kos, limpia kas ets. Despues tabatin bailamentu te den oranan di mardugá. Klaro ku nos mes tabata DJ tambe, i kere mi esei nos tabata hasié den gran forma. Tantu Pasku, komo dos dia di Pasku nos tabata pasa huntu i selebrá huntu, mas komo famia, ku komo amigu.
Despues di Pasku, nos mester a yuda na kas ku limpia kas i prepará pa kambio di aña. Ya mayoria trabou tabata hasí pa Pasku kaba i úniko kos ku a keda tabata di move tur kos den kas atrobe, pa dia 31 dal kas un bon limpiá, drecha kas di nobo, ham, sùlt, pékele ,salmou i sòpi mondongo a bai kandela i den 10or pa 11or, ya tur kuminda tabata kla. Ta sera kas i tur hende a bai baña i bisti paña nobo. Nos no tabatin e tradishon di ni bisti paña di sierto koló, ni paña djabou ni djariba. Sí nos tabata bisti “bibòp”ku e pia karson abou doblá, mayoria biaha un T-shirt nobo, komo mucha bo tabata haña e T-shirtnan ku un indjan ariba i ku su dos wowonan di plèstik. E T-shirtnan ei ta un bistí i nan tabata kla pa usa pa limpia kos den kas ku nan, ya ku ora nan laba nan tabata trèk masha formal. Anto bo tabata haña bo kèts haltu tambe pa bisti bou di e bibòp. Awe hóben lo a yama esaki djins, anto e kèts nan lo a yama esei “sneaker”. Djis pa informashon, e tempu ei mamai ta drenta den “21” òf “La Confiansa” i sali ku paña pa tur yu. Abo ta un kos bo por a hasi, anto esei tabata di bisti nan.
Despues ku bo a bira mas grandi, tiner, bo por tabatin algu di bisa den loke bo tabata kier a bisti, esta si sèn yega, i tabata den moda e tempu ei, pa abo ku bo amigu bisti meskos. E tempu ei nos tabata bisa e kos ei ta “ròl”.
Mamai a sensia kas dia bieu, i e panchi ku sensia a pasa den tur skina di kas, pa eventualmente kore ku delaster fuku for di Piscaderaweg 33. Despues di e ritual akí, kas tabata keda será i nos ta warda tiru. Despues di tiru kas tabata keda sukú, duru será i mi mama ta lur dor di sùnsèt pa e skohe e hende ku e kier pa drenta komo promé hende straño den su kas. E mester ta un hende ku e ta kere lo trese suerte pa nos kas.
Atrobe komo mucha mas yòn, nos tabata tira vürwèrk i probechá bebe un tiki anis, ponche krema i birando mas grandi un tiki Cinzano. Mainta e tempu ei, nos tabata kana den bario ora ku kasi tur hende tabata drumi i buska klapchinan ku no a sende i nos tabata traha “Maria Porko Sushi” ku nan. Algu ku despues nos a realisá kon peligroso e kos akí tabata. Sende martin tira den awa pa nan rementá, hinka dònderbos den tubu, hinka klapchi den bòter i asina tabatin diferente kos fo’i sla, ku nos tabata hasi komo mucha.
Komo hóben mas grandi, e mesun grupo ku tabata selebrá Pasku anochi, e mesun grupo akí tabata organisá un fiesta despues di tiru. Despues ku bo a kaba di tende tiru na kas, i bebe i kome algu, bo ta bai e fiesta akí, ku ta kaba den kareda di 11or pa 12or di mèrdia. Bo ta bai kas bai drumi i anochi atrobe bo tabata ku bo amigunan.
E Paskunan di mas tristu/malu ku mi a pasa den mi bida i meskos kambionan di aña mas tristu/laf, tabata esnan ku mi a pasa na Hulanda. Mi di 2 aña na Hulanda, mi a disidí di kumpra un bòter di wiski barata, pa dof mi kurpa i lubidá ku tabata kambio di aña. Na Hulanda mi a kita di e kustumber, di kome i bebe asina hopi den e dianan ei.
Awor akí, mi ta selebrá Pasku i kambio di aña masha moderá, kas ta limpi, kisas un stèki di lus, por tin un pa dos ayaka, pida ham, un tiki salmou, de bes en kuando ta kumpra un baki di sùlt, i dia 31 di desèmber anochi, “por que yes” mi ta sensia mi kas i pa años mi ta lanta dia promé tempranito i baha pa playa di Wespen, bai tira un kabes. Despues mi ta pasa den kaya di Otrobanda wak ku brièchi di Kòrsou no tin nada pa mi kuminsá mi aña riba bon pia. Ta e momento ei mi tabata ripará, ku mi a usa e sensia robes e anochi promé.
