Inspirá riba e nesesidat di Fundashon Kura di Arte i nan búskeda pa un kas pa hóbennan dor di Sra. Omayra Leeflang, mi a bai buska informashon di e lanthùis akí, ku por sierto mi no a haña e kas akí bèk komo lanthùis den ningun fuente di informashon di kua mi ta disponé.

Parti di mi hubentut mi a pasa den Kortijn, bibando serka Shika (Bislick) i Eleonora (Tan Lu, mama di mi tata). E kas dilanti nan ta di Poyo i pegá ku n’e ta tin e tienda di Djen (Pe Djen), e tiendesita di bentana, kaminda bo mester a para ku masha kuidou den e kaya smal ei, ora bo bai kumpra kos serka Djen. Djen su tiendesita ta bende nèt e kosnan ku kada bes ta kaba den kas, suku, salu, aros, kòfi, manteka ets. i no lubidá bo bals, bazuka, mèridjain i dròp salu.
Skùin dilanti di e tiendesita ta tin un kasita kaminda ta tin un sapaté (segun mi su nòmber ta Ben)ta lora man ku drechamentu di sapatu i pariba pega di e kasita’ki Benny Prince ta tin su fábrika di eis ku el a tuma over di su suegro Shon Wichi van der Meulen i el a lanta un fábrika di limonada banda di e fábrika di eis. Loke ku e tienda di Djen no ta tin, bo ta yega na skina di hanchi di Kortijnweg i bo ta haña na toko Pancho.

Mas aleu mi ta bai paga Credit Union Sta. Famia pa mi wela den kura di Sint Tharsisius, mi ta haña un buki den su plèstik i un dòlò, mi ta entregá buki i sèn i mi ta haña un stèmpel den e buki komo prueba ku mi a paga. Mas lat den siman, mi mester bai ku tréyotin, pasa den kura di Shon Fil, pa mi bai na e seter den kura di Shon Fil. Te einan mi ta yega i nunka mi no a bai mas leu den Kortijnweg i sigur no den besindario di Lanthùis Kortijn.

Den un artíkulo den AD di 4 di yüli 2009, Norbert Hendrikse ta relatá ku Cortijn ta propiedat di kapitan di barku Elias Courtijn, i djei e nòmber Kortijn. Na 1851 a basha e lanthùis abou, ku ta situá kaminda awe e edifisio di Brasami ta. Herman van der Meulen a kumpra e tereno na findishi. E tereno ta yega te Vredeslust, kaminda awendia ta Kortijn. Shon Janchi van der Meulen ta bon na saku. E famia van der Meulen mes ta biba den lanthùis. Ruman di Shon Janchi, Shon Wichi ta un hòmber hopi tékniko i ta tin hopi konosementu di “koelmonteur” i na 1933 a lanta un fábrika di eis ku ta entregá eis na barkunan i otro hende ku kier a kumpra eis. No solamente Shon Wichi ta hopi tékniko, pero e ta un bon negoshante tambe. Huntu ku Shon Mi (Emiliano) de Jongh nan a kumpra un pida tereno na Mundu Nobo i ei nan a traha e famoso Recreation Park. Shon Mi ta bende eiskrim ku e mes tabata traha. E famoso eiskrim Rum Raisin.

Bella van der Meulen, yu di Shon Wichi van der Meulen a kasa ku Benny Prince ku a sigui ku e fábrika di eis i banda di e fábrika a konstruí un fábrika di limonada tambe. Finalmente despues di a pasa den man di diferente hende, e konosido Dean Rozier ta kumpra e fábrika di eis i te awe ta doño di e fábrika akí.

Despues di morto di Shon Janchi na 1939 nan a hür e kas ku diferente hende; un dòkter di gobièrnu di nashonalidat surinameño, Dr Erwin van de Kuyp.

Na 1951, famia Van der Meulen a bende e lanthùis ku e ekipo di deporte Sithoc, ku e intenshon di limpia e kurá, i pone un tereno di tènis i di basket. Nan a traha un kurá basta haltu pa sera e tereno, pero t’einan kosnan a keda.  Debe di hipotek altísimo a pone ku na 1964 a bende e lanthùis ku teritorio insular di Kòrsou. Shon We van Meeteren a restourá e edifisio. Inisialmente e intenshon tabata pa Eilandsraad lo a hasi uso di e edifisio, pero na 1987, La reina a hasi apertura di e edifisio restourá, kaminda Feffik su departamento di Horeca ta situá. 
Sentro di bario Otrobanda a pidi gobièrnu na 2019 pa restourá e edifisio pa nan por usa komo sentro di bario, pero gobièrnu di Kòrsou a kontestá ku nan no tin e 5 mion ei, pa restourá edifisio i na òktober 2021, Sra. Omayra Leeflang, komo presidente di Fundashon Kura di Arte a hasi petishon pa nan por hasi uso di e edifisio.