Introdukshon
Kerido Lektor,
Resientemente mi a tuma riba mi pa buska informashon pa mi por yega na sufisiente material ku por resultá den un buki tokante “Nos Teaternan di Sine” di Kòrsou. Nos ta kòrda Ideal – Teater Nahr – Teater Brion – Roxy – Cinelandia – West-End – Caribe – Rex – Royal – Cine Rio i mas. Pero nos tabatin ademas dos filmliga na Kòrsou i tambe sine trùk.
Via korantnan bieu mi por a haña informashon tokante nos teaternan, pero ainda mi falta basta dato konkreto i mi sa ku tin hende aki na Kòrsou, ku ainda tin muchu mas informashon, potrèt i/òf dokumento di e teaternan aki. Hendenan ku konosé otronan ku por tin informashon i tambe di personanan ku a traha na teaternan di sine, sea bende karchi, operador di sine, tuma karchi na entrada, traha den bar òf bende kos den òf dilanti e teaternan aki, hendenan ku a biba den besindario di e teatronan aki, hendenan ku tabata den komishon pa kùr pelíkula, hendenan ku tabata den filmliga òf ku tabata den direktiva di filmliga, i hendenan ku nan ta famia di esnan ku tabata doño di e teaternan.
Lo mi bai na kompartí informashon ku bo(so) atrabes di mi blog “Hòrta Shòrt”, un tèrminologia ku ta usa ántes den presentashon di sine aki na Kòrsou na momentu ku durante presentashon di e pelíkula, nan saka un pida afó. Nos lo bin mas den ekstenso bèk riba e fenómeno akí.
Gustosamente mi ke drenta den kontakto ku e hendenan aki òf ku abo ku ta disponé di informashon tokante nos teaternan di sine, potrèt òf otro informashon di nos teaternan di sine. Mi kier a pidibo, si bo tin informashon òf bo konosé hende ku tin informashon ku por yuda mi den mi empeño pa kolektá mas tantu dato konkreto i relevante posibel, fabor mail mi na info@percpinedoblog.com òf yamami na 510-4946. Pa tiki ku e informashon por ta, mi lo apresiá bo tuma kontakto ku mi. Di antemano masha danki
0 Comments