Luis Benjamin “Luigi” Pinedo a nase dia 23 di yüli 1926 den Otrobanda. Luigi tabata úniko yu di Luis Bernardo Pinedo i Remigia Rosaria “Mai Chaya” de Lannoy. Su bida tabata un kombinashon remarkabel di ingenieria, ingeniosidat, i amor profundo pa arte i su isla natal.
Luigi tabata un persona semper aktivo ku un mente inkieto. Komo mucha, ora lès no tabata interesante e tabata gusta pinta kara di su maestro, i komo straf mester a keda skol te lat. Tambe e tabata subi muraya di kas di su prima manera Spiderman, i tabata orguyoso ora el a traha su mes radio transistor, ku pa e tempu ei tabata un nobedat. Un biaha, ora sirko tabata riba Ref, el a logra konvensé personal di sirko ku e tabata huérfano sin kaminda pa keda ni manera pa biba. Su mama a busk’e tur kaminda, te ora un bisiña a bis’é ku Luigi tabata traha den sirko komo si fuera e tabata parti di e tim. Ora Luigi a haña sa ku e bisiña a reda riba dje, el a hinka un batata den mòfel di su outo.
Luigi a kuminsá su trayekto artístiko for di yòn, risibiendo su promé lèsnan di pintamentu na Sint Thomas College i Hendrikschool. Ku añanan, el a sigui vários kurso pa korespondensia na L.O.I. Leiden, Famous Artists School New York, i Kachina School of Art na Merka. Tambe el a sigui kursonan na Puerto Rico, Venezuela, México i Colombia. Un gran parti di su eksperensia a bin di e konosido pintor Giel Hageldoorn, kende a yud’é hopi den su desaroyo artístiko. Su talento pa pinta, probablemente, a bin di famia, ya ku su tata tabata platé i su mama kosturera, i dos di su tionan tabata pintor i músiko.
Despues di a pasa algun aña na Venezuela ku su tata i gradua komo elèktrishèn, Luigi a regresá Kòrsou i kasá ku Aura A. Tweeboom na 1951. Huntu nan a lanta dos yu muhé, Muriel (1952) i Karin (1954). Tambe Luigi a optené su sertifikado di trahadó di instrumènt na skol tékniko di Shell, kuminsando su karera komo trahadó di instrumènt sertifiká, pa despues, ku su background komo elèktrishèn, suich pa instalashon i mantenshon di left na Kòrsou i Aruba. El a traha pa Shell Curaçao, St. Elisabeth Hospital i Antem/Elga.
Na kuminsamentu di su karera, Luigi a ekspresá su mes pa medio di pinturanan figurativo, mustrando su amor pa beyesa i splendor di Kòrsou, pintando paisahe, naturalesa, i sentro di Willemstad. E tabatin hopi atmiradó pa su estilo romántiko, i su kuadronan di “Tafelberg” i palu di Flamboyan tabata hopi apresiá. Hopi di su obranan a ser reprodusí i publiká riba tarheta postal, patrosiná pa e empresario Abraham Salas kende tabatin Boekhandel Salas.
For di 1965, Luigi Pinedo a eksponé su obranan regularmente. Ademas di su propio kreashon, el a dediká su bida na siña hopi mucha i adulto arte di pintamentu. Durante ocho aña, el a duna lès na Kòrsou na ‘Instituto Venezolano para la Cultura y Cooperación’.
For di dékada ochenta, Luigi a ampliá su arte ku kuadro apstrakto, eksplorando mundu di kubismo i pintando payaso apstrakto ku tambe tabata hopi gustá. Apesar di e metamorfósis den su estilo, un faktor konstante den su kuadronan tabata su amor pa paisahe di su isla natal, reflehá den kolónan típiko.
Su baimentu ku penshun a habri oportunidat pa kumpli ku un di su soñonan: organisá eksibishon pa su arte. El a tene dos eksibishon asina: “Clowns” na Maduro Plaza na 1992, i “Metamorphosis” na Huize Halman na Otrobanda na 1999. Un detaye importante ta ku 90% di su kuadronan tabata riba pedido, miéntras e 10% sobra tabata repartí igualmente entre trabou di karidat i “barter deal”; p’esei, kliente ku tabata drenta su tayer nunka lo a topa ku un piesa di arte kla pa kumpra.
Luigi Pinedo a risibí Medaya di Oro na 1982. Su lista di eksposishon ta largu, inkluyendo presentashon na Caracas, Venezuela (1965, 1966), Amsterdam, Hulanda (1968), Museum Rijswijk, Hulanda (1969), i Museo di Kòrsou (1969). Tambe el a eksponé na Puerto Rico (1980) i vários lugá na Kòrsou, inkluyendo Curaçao Seaquarium (1989), International Trade Center (1991), Maduro Plaza (1992), Gallery ’86 (1997), i Sentro di Bario Otrobanda (1999).
Pa su kontribushon artístiko na Kòrsou, su abitantenan i trabou di karidat, Luigi a ser dekorá pa Su Mahestat Reina di Hulanda dia 8 di aprel 1982 ku título di “Orde Van Oranje-Nassau in Goud”.
Pa konmemorá di 10 aniversario di su fayesimentu, a instalá un mosaiko ku potrèt di Luigi na skina di Sebastopolstraat i Breedestraat na Otrobanda dia 28 di mart 2017. E lo keda semper rekordá pa su simplesa.
Elis Juliana, un di e amigunan di Luigi i kolega artista, a dediká e siguiente poemanan na Luigi: “Hopi aña pasá” i “Bonochi ruman!”.
Hopi aña pasá
nos tabata kombersá
i bo a sigurámi
ku promé ku solo baha
lo bo pinta un La Birgui
nigrita di bo pueblo
ku dos flèktu di banana
ku un yuchi krioyo
kargá na su sei.
Bonochi ruman!
Djamanta no ke tende
ku ta di karbonstein
el a originá.
Luigi Pinedo a fayesé dia 28 di mart 2007 na Otrobanda. Su legado artístiko lo keda biba pa semper den kurason di Kòrsou.
Percy Pinedo: masha danki pa a trece mi primo Luigi Pinedo den spotlight. Aparte di ta un bon p[intor, e tabata hasi fiesta di mucha of jende grandi hopi agradabel ku su chistenan y su mimika. Ami tambe a sigui diferente kurso di pintamentu serka Luigi,principamente flor, Esey a bin yudami tambe despues den mi trabou di bolo y flornan di suku dunando les durante 63 anja largu. Luigi tabata asina precies den su trabou, ku for di un pipita di e fruta Dadel, ela traha un tetero pa Baby ku tur su strepinan ariba.
Percy, danki pa a tuma asina hopi tempu pa konta nos di e baluarte aki!
Bo teksto ta un homenaje digno i profundamente inspiradó pa un homber ku un bida riku di talento, kuriosidat i amor pa su isla. Luis Benjamin “Luigi” Pinedo no tabata solamente un artista, pero un símbolo di kreatividat, perseveransia i pasion sin límite.
Su bida ta mustra nos kiko ta posibel ora un hende sigui su pasion, meskos ku ta enfrenta obstákulo. Di un mucha ku ta pinta kara di su maestro pa aburrimentu, te un artista rekonosí internacionalmente ku Medaya di Oro i un Orde di Oranje-Nassau: esaki ta un rutu pa orguyo. Su traision kreativo — di figurativo te ku apstrakto — ta refleho di su evolución no solamente komo artista, sino komo ser humano.
E manera Luigi a logra kombina teknisidat ku arte, i siña otro hende sin tene nada kla riba ganashi, ta un legado ku maske ora e no ta físikamente mas ku nos, e ta kontinuá biba den kuadronan, den mosaiko di Otrobanda, i den e poemanan di Elis Juliana.
E frase “Luigi lo keda semper rekordá pa su simplesa” ta di un poder profundo. Pasobra den un mundo kaminda fam kueldé hende, Luigi a lagá tras un tipo di fam mas nobo: un ku ta krese for di respeto, kontribushon real i amor pa komunidat.
Bo testimonio ta un don na Kòrsou.
Un gran ‘masha danki’ pa partí e istoria di un alma tan riku ku nos tur. Luigi Pinedo ta i lo keda un inspirashon pa generashon di awor i di mañan.
#ArteKrioyo
#LegadoDiLuigi
#OtrabandaTaSkondiTesoro
#KòrsouTinHéroeRealis
Tremendo
Tremendo mi no tabata sa di e historia aki di luigui
Excelente contribushon di NOS kultura i historia
Hopi bon ku bo a dedika tempu na e pintor historiko aki. E meresé!!!
Great atrobe Percey. Danki pa komparti. Komo un persona ku ta stima arte i praktike tambe komo hobbi, bo a laga mi tur sobra konose Luigi mas mihor. Un Pintor di taye. Ku e R.i.p.
Ora mi ta lesa no strobami
Tío Boy BOBO manera nos tabata jame tin hopi mas
Un ku mi ta Korda ta
Laganga a bestel e prome
Roltrap ta Bobo a harme
Después Spritzer & furhman a bestel un Lift
Tambe e la hazme
Bobo tabata auto montuer
E la kumpra un auto
Marka Henry g
E la voerop e motor
Imaginaba mi kiersa ku mi tin un potret di e radio mi hanje mi ta mande pa bo
Danki TREMENDO Purcy
Mi ta kere ku Luigi tbt e uniko yu homber, Ami a konose 2 ruman muhe: Marieta ku tambe ta kosturera, trahando na Ackerman i ku tbt biba huntu ku May Chaya i su yunan, Betty i Ellie, e otro yu muhe ta Aura Pop ku ta Mama di Hubert Pop I su ruman nn.
Luigi tbt “gifted” ku su mannan.
Ami tambe ta Otrobandista I mi famia tbt hopi bon ku e famia .
Luigi lo keda biba pé here dia ku ela laga, su arte.
Luigi Pinedo, un amigu artista di kurason. Mi ta asina agradesido ku el a honrá mi asina tantu bes ku su bishita i asina mi a siña konos’é tambe komo un persona ku un espíritu hopi bibu ku a sirbié den tur su pasonan ku el a tuma den su riku bida. E no t’ei mas, pero lo keda semper den mi kurason.
Danki Percy Pinedo pa honra nos baluartenan
Veelzijdig personage. Groot kunstenaar.
Tremendo 👍👏🏽👏🏽