Ántes Venezuela tabata tur dia asina serka di nos, miéntras awor dia pa dia e ta distansiando mas i mas. Nan loterianan prohibí, nan kareda di kabai i nan kanalnan di televishon i di radio: Radio Caracas Television, Venevision i nan radionan: Radio Caracas 750,Radio Continental, Radio Rumbo. YVKE Mundial, Radio Aeropuerto i diferente otro radio emisora.
Kòrsou tabatin su radionan ku nos tabata skucha, Radio Hoyer, komo emisora krioyo i Radio Curom (despues Z-86) komo radio mas internashonal. Banda di e radionan akí mi a komprondé ku nos hendenan tabata sigui un radio di Cuba, Radio 1010 (mesun frekuensia ku Radio Hoyer e tempu ei)ku tabata drenta kla kla serka nos i di unda músika kubano ta yega den nos kas).
Den e añanan promé ku 1960, muchu promé ku Tele Kòrsou a kuminsá, e bida kultural na Kòrsou tabata hopi influensia pa señalnan di Venezuela. Via radio i televishon, un mundu tabata habri pa nos ku notisia, drama, humor, ritmo. Medionan di Venezuela tabata habri e mundu akí pa nos, ku di otro manera lo tabata inalkansabel.
Radio Caracas Televisión i Observador Creole
Na 1953 Radio Caracas Televisión (RCTV) a kuminsá ku transmishon, i masha lihé nan señalnan a yega Kòrsou, danki na teknologia di e tempu ei, i asina satisfasé nos hamber kultural, sosial, informativo. Asina, abitantenan di Kòrsou por a gosa di programanan manera El Observador Creole, e notisiero ku nos tabata dependé di dje pa informashon di mundu. No manera awor akí ku nos tin CNN, FOX, NOS, Al Jazeera, Notisia di Dirèkt, di Tele Kòrsou i mi no sa kua mas. Pa despues deskansá ku Radio Rochela, e klásiko di komedia Venezolano ku tabata pone nos hari sin stòp.
Na 1960 Tele Kòrsou a bira realidat pa Kòrsou, e momento ei Kòrsou a bira mas los di señalnan di Venezuela, ounke e influensia a keda te den añanan ’60 i ’70. Den e tempu ei, nos tabata klabá kada anochi na Venezuela: e presentadónan di notisia i komediantenan no tabata djis konosí, pero tabata konektá ku nos bida diario i nos emoshon.
Músika novela i ídolonan venezolano
E mesun kanalnan ei a familiarisá nos ku streanan kultural di Caracas: orkestanan manera Los Darts, Los Impala, Supersónicos, Billo’s Caracas Boys, Jose Luis Rodrigues, Felipe Pirela i hopi mas. Nan melodia tabata yená nos dianan, zona den programanan di radio i den kompetensia ku nos medionan lokal.
E télenovela nan latinoamerikano, tabata dominá televishon i tabata un kompetensia kasi sin igual pa nos televishon lokal. Mi ta kòrda kon mi mama i rumannan muhé tabata sinta yora i hari sam sam ku e artistanan di novela. Nan tabata biba e pashon, e drama. Djis kòrda produkshonnan klásiko manera: El Derecho de Nacer: Raúl Amundaray, Zulma Sady (mama Dolores) i Conchita Obach. Renzo el gitano ku Oscar Martínez i Eva Moreno; La Usurpadora i vários otro novela. E novelanan aki a forma un parti importante di nos rekuerdo di infansia. Hopi di e novelanan aki tabata novela mehikano ku Venezuela a popularisá.
Presentadónan manera Renny Ottolina ku su show Lo de Hoy ku despues a bira El Show de Renny, kaminda Renny Ottolina ta kumindá tur mainta “¡Buenos días, mi gente!” , Amador Bendayán i Gilberto Correa diariamente tabata drenta nos kas: humor, karisma i bosnan konosí tabata dibertí nos .Un di e shownan mas popular tabata “Sábado Espectacular ku despues a bira Sábado Sensacional”, presentá pa e famoso Amador Bendayán. No por lubidá show 12or di mèrdia ku Victor Saumé. I tambe programanan ku profundidat manera “Valores Humanos” di Arturo Uslar Pietri.
Nos atenshon dediká na televishon venezolano tabata mas ku djis entretené. Nan a influensiá nos idioma. Segun estudionan lingwístiko, e idioma spañó via radio i televishon for di Venezuela a enrikesé i fortifiká nos vokabulario papiamentu. Término i ekspreshon for di novela, show i músika a bira parti di nos papiamentu diario, un echo di nos laso kultural ku Venezuela.
Pareu ku televishon venezolano, mi mester bisa, ku radio venezolano tabata forma parti esensial di mi hubentut. Via di Radio Caracas 750, Clemente Vargas Junior tabata un lokutor ídolo di nos hubentut. Artistanan venezolano i internashonal tabata zona na su radio i a sera nos konosí, banda di Hermanito Narvaez, ku e artistanan akí. Programanan di salsa di Phidias Danilo Escalona i Cesar Minguel Rondon i e konosido Hector Castillo(den su programa Caribe Son e tabata finalisá su programa: …”se les quiere de gratis”),nos a sera konosí ku salseronan di rònt mundu.
Radio i televishon venezolano: E influensia riba nos hubentut
No tabata solamente novela, Notisiero Creole, bòkseo, baseball, Radio Rochela, pero komo hóben nos a gosa hopi di bandanan di Rock, pòp i artistanan konosí di Venezuela, tantu na televishon komo na radio: Los Darts, Los Impala, Los Supersonicos, Los 007, Los Dangers, Henry Stephen, Los Tres Tristes Tigres, Los Terricolas, Trino Mora, Dimension Latina, Oscar de Leon, Nancy Ramos, Sexteto Juventud, Rudy La Scala i hopi mas.
Via di televishon venezolano, nos orkestanan, bandanan a haña chèns di bria internashonalmente (Estrellas del Caribe, San Hose, Three Voices, The Hornets, Doble R, i hopi mas). Nos eventonan reina di beyesa, karnaval i otro programanan tambe a bai internashonal. Tabatin interkambio hopi frekuente ku Venezuela. Laso di Mavis Albertina ku Venezuela, kaminda artistanan venezolano a bin Kòrsou i a aktua den novela di Kòrsou (Pentagrama di Mavis Albertina)
Hopi hende ta rekordá ku hopi nostalgia kon famia kompletu sintá den sala, mirando novela; òf nos hóbennan ku guitara den man imitando Los Impala. E ta un parti di nos historia kultural”?
Renny Ottolina: “Sólo aprendiendo y trabajando podremos salir de abajo porque (…) no conozco otra manera”.