Promé ku Sine Trùk, Eilandelijke Filmdienst ta bai den bario i presentá pelíkula. Dos trahadó di Eilandelijke Filmdienst ta konta nos kon esei tabata bai.

Ta manera ayera e evento a tuma lugá, asina kla i bon mi ta kòrda nos anochinan di sine, ora ku huntu nos ta bai nos aventuranan, pa pasa sine den barionan di Kòrsou. Nos ta pasa Dokterstuin, Barber i Savonet riba ruta pa hiba nos Wespen. E karavana chikí di Eilandelijke Filmdienst a sali di Sentro Kultural Kòrsou (CCC) i ta konsistí di 2 outo. Den e outo di servisio D-265 tabata transportá e tékniko i aparatonan i un outo bieu, privá, Ford ku nos mester a revisá a fondo, promé di a kuminsá ku e ekspedishon akí pa Banda Bou. Bon por riska ku e outo ta para ku bo, anochi lat riba kaminda pa Banda Bou.

Awor, pa nos por hasi un presentashon asina di pelíkula den bario, nos mester ta sigur, ku tur kos ta funshoná manera mester ta. P’esei mes nos ta bai ku 2 proyèkter, un spiker èkstra, pasó nos ta traha den airu liber i tambe un transformatòr. Diferente kabel èkstra i tambe verlèngsnur. Bo por imaginá bo ku koriente por bai, p’esei nos ta bai ku un flèshlait tambe i diferente ladronchi. Nos ta bai ku un mat di rùber tambe,  i riba e mat akí e tékniko ta bai para ora ku e ta hinka e stèker den koriente, pa koriente no dal’é. Pero ya, despues nos ta usa e mat ei mas bien pa limpia pia.

Jackson Timmer i tékniko Sra Yolanda Olaria, ta forma un tremendo tim, ku ta bai pasa pelíkula na diferente parti di Kòrsou. Nan ta traha pa Eilandelijke Filmdienst. Huntu ku pastornan di diferente parokia, nan ta organisá anochi di pelíkula. Dor di hasi e trabou akí regularmente nan a haña hopi eksperensia, i nan ta interaktuá masha bon mes.
Mitar di ocho nan ta yega Wespen i ya públiko tei kaba i ta mustra nan kaminda nan mester ta. Dilanti di porta di plenchi di misa, bo ta mira e grandinan pará te patras, kasi manera un tiki skondí i e hóbennan te dilanti i ansioso pa e anochi bunita akí.

E outo di servisio ta subi plenchi di misa i ta pasa entre misa i pastorí i bai para den kurá di skol di mucha muhé. Pastor Paanakker di Wespen ta tin e pamflèt di e programa di e anochi ya pa un siman den su poder i e ta sòru p’asina e tim di Eilandelijke Filmdienst yega, pa kuminsá ku benta di karchi pa e funshon di e anochi ei. Entrada pa e anochi ta kosta dies plaka i despues ku e públiko paga na porta, nan ta buska un lugá pa sinta riba e bankinan di palu, ku algun boluntario a pone kla. Ku e eksperensia ku nan tin, nan ta pone tur kos kla den un  fregá di wowo, i e téknikonan ta indiká na pastor ku nan ta kla.

Tiki tiki e lugá ta yena i akí aya bo ta mira algun chabalitu, ku ta purba bula i drenta sin paga e dies plaka, algun ta logra, pero e gran mayoria tin ku paga nan dies plaka. E hóbennan ta sinta abou dilanti e bankinan, p’asina nan ta mas serka posibel di e pantaya. Nan ta ansioso pa wak kon e anochi aki lo bai. Nan ta kòmbersá mil i un kos ku otro, pero asina e promé rayo di lus kai riba e muraya, mesora ta reina un silensio. Pero e silensio ei no ta dura mashá, paso Andy Panda ta presentá riba pantaya ku su aventuranan mas inimaginabel ku su kachó i e aventuranan akí ta okashoná diferente reakshon. Esaki ta un pelíkula pa grandi i chikí. E programa ta un programa kultural i klaro ku tin un variashon di pelíkula. Despues ta sigui un kartun na koló di Walt Disney tokante motibu i konsekuensia di grip i kon pa kombatí grip, i esaki ta un pelíkula informativo, ku’n karakter humorístiko pa grandi i chikí. Kada biaha ku un “Hachí” kai, tur hende ta bou di harimentu.

Despues ta sigui e pelíkula “Aruba” ku ta duna un bista eséniko di e isla i Pastor Paanakker, ku konosé e isla bon, ta duna su komentario riba e esenanan ku e konosé di e isla. Despues ta sigui Polygoon Nieuws, i ta sigui un pousa kòrtiku. Esaki ta dura mas o ménos 5 minüt, nèt sufisiente pa rèk e pianan i pa téknikonan kambia e spulnan di e pelíkula.

E públiko ta biba ku presentashon di e dokumental riba bida di tiger i ta grita kada bes, “Hei”, i “kuidou”. Pero e parti kulminante di anochi ta e pelíkula Music and Dances of Curaçao, trahá pa e pareha Chumaceiro. Aki tambe e públiko ta tin su gritunan di atmirashon i apresio i a bati man na final di e pelíkula.

Ku Abbott i Costello a finalisá e anochi di un forma alegre i banda di mitar di dies, tur hende ta na kaminda pa kas.

Jackson Timmer i Yolanda Olaria ku yudansa di algun hóben, ku asina ta trata na prolongá nan estadia di e anochi ei un tiki mas, ta warda tur kos bèk den outo. Despues di un ratu ta ketu atrobe den kurá di skol. Nan kaminda pa bai bèk a kuminsá i kasi no ta tin outo ta bin den direkshon kontrali. Nan no a mira ningun alma di Dios di Wespen pa Julianadorp. Na kaminda pa kas, nan a kòmbersá di nan eksperensia di e anochi bunita akí di Banda Bou. Mayan nan ta bai Soto, kaminda lo inougurá e edifisio di bario, siguiente siman ta Sta. Rosa i despues ta Wilibròdus.