Dia 12 di yüni mi a publiká e artíkulo Banderita i mi a haña diferente reakshon riba e artíkulo ei i tambe vários sugerensia i otro rekomendashon. Mi ta haña asina grait e manera ku bosnan ta reakshoná riba mi artíkulonan i ta duna mi mas smak pa sigui indagá nos historia, nos kustumbernan ets. Reakshonando riba e artíkulo Banderita, mi a haña algun remarke di “paskin” ku tambe tabata un fenómeno di komunikashon di e tempu ei. Pa e motibu ei, e artíkulo akí. (lesa Banderita 12 di yüni 2023)

Banderita ta un pida papel, pegá na un pènch’i palu di Karawara òf un richi di koko por ehèmpel. Riba e papel ta plak un teksto imprimí sea na imprenta, òf skibí na mashin, òf nèchi skibí na man. E teksto por ta un puña, un istoria kompakto, un proverbio òf un ekspreshon idiomátiko ku a nase den pueblo, semper ku su toke di ironia, humorismo, o sarkasmo, ekspresá den dos òf kuater liña.

E banderitanan di puña tabata kuestioná komportashon di sierto persona di pueblo simpel i di hendenan di élite tambe, ku krítika i ekspreshon di resistensia pa mustra desaprobashon ku por ehèmpel a kibra un ke otro norma di bon komportashon. Banderita ta di siglo diesnuebe te i ku siglo binti te na añanan sinkuenta.

Na 2005 tabata delaster biaha ku nos a haña un atenshon masha speshal di banderita ku e agènda di e banderitanan ku Bernadette Heiligers a skibi ku pintura di Elis Juliana.

Esaki tabata un fenómeno literario bastante konosí akí na Kòrsou i ounke hopi biaha skibi anónimo, tabata aportá di un forma grandi na nos literatura. Mi no sa si na otro islanan di Antia banderita tabata eksistí.

Tabatin diferente otro manera pa komuniká, ku no tabata asina nèchi ni elegante. Den korant i na radio, tabatin oportunidat pa bosiferá opinion i manda remitido, i un tempu asta anónimo. Ta despues di tempu, tantu radio (Pueblo na Palabra) komo remitidonan den korant, a kuminsá eksigí pa pone nòmber (ounke por a pidi pa no publiká esaki). Pero aki tambe esun ku ta skibi den korant, por a skapa su kurpa, dor di usa un seudónimo.  Korantnan mes ta tin diferente rubriká ku tabata sali bou di un seudónimo. E nòmbernan di e rubriká tabata bisa tur kos: Torpedo – Basora – Snuf Snuf – Blet Blet – Vladap – Pimpel – Den Kareda – Bou Tapara – Micho den Bògt – Den Mi Awa – Dori Maco (lesa i mira Un sekreto bon wardá i Galeria Dori Maco) – Sòrti – Wito – Toonchi ku Monchi i e konosido Azijn Banana (Lorito Real) (lesa i mira Ai Ai Ai ta com t’asina i Galeria Azijn Banana). Awen dia nos konosé Bosina komo esun mas popular.

Otro fenómeno ku tabata usa hopi pa komuniká tabata (ta) e konosido pamflèt. Den dékada 70 i 80, espesialmente Aruba tabata den un gara inkreibel di pamflèt, hopi biaha anónimo i otro biaha atrobe skonde tras di seudónimo. Boneiru ni Kòrsou no tabata keda atras pa loke ta e fenómeno akí. Na tur 3 isla tabatin kasonan di investigashon, kasonan den korte, kondena ku kastigu i basta bochincha pa loke ta trata e pamflètnan akí. E Pamflètnan tabata kontené krítikanan fuerte durante temporada di elekshon. Den pamflèt nan tabata usa idioma skèrpi, i temanan hopi biaha tabata kritiká enseñansa, polítika i tur sorto di kuestion sosial. Na Kòrsou nos ta kòrda komo un di e último kasonan di pamflèt aña 1995, tempu ku PAR a hasi un keho kontra un pamflèt ku kontrinkantenan a usa kontra di nan. (Amigoe di Curacao – 15 di mei 1995). Na Aruba asta a será esun ku a imprimí e pamflèt.

Di mi grandinan mi a yega di tende di paskin, pero mi no a yega di mira ningun i solamente mi a lesa algu den korantnan bieu tokante paskin. Ounke ku mi ta kere ku tin kaminda ku a malinformá nos kiko ta paskin.
paskin (sustantivo): Karta anónimo, hopi biaha pa reda un relashon amoroso na e hende ku ta risibié. Ta un akto ku ta kousa hopi fèrdrit den relashon humano spesialmente den un komunidat chikitu manera di nos. Tantu na Aruba komo Boneiru e fenómeno akí tabata konosí.
Den prensa lokal, hopi biaha tabata papia di paskin, ora tabata trata di un karta anónimo, esaki no ta kuadra ku e nifikashon berdadero di paskin.

Den dos obra literario mi a topa ku e tema/palabra paskin: Den e obra di Pierre Lauffer, re – editá na 2006 titulá: “Diesocho flor Trinitaria”, den kua e deskribí daño ku paskin por hasi; i e di dos den e obra di Philip Rademaker “Mi lenga papiamentu” for di e buki Bos di Buriku publiká na 2000.

Na Islanan Ariba por ehèmpel tabatin algu semehante ku nan ta yama ‘dropletters’; kartanan anónimo (paskin) unda bo tabata ofendé un persona públikamente.

Will Johnson ta konta di e género akí: “Si bo tabata kier pa hendenan sa algu di un hende,bo ta skirbi un karta anónimo i laga esaki kai na un lugá den kaya. E promé persona ku haña e karta akí tabata lesa esaki i tabata laga e karta sirkulá den pueblo. E ora ei tur hende ta sa ku e persona a hasi algu ku no tabata permití.

Por último, karta kadena. Mi ta puntra mi mes, ta kua tipo di mente malu por tabata (ta) tras di skibimentu di e kartanan akí. Pa basta tempu mi no ta mirando e kartanan akí mas, pero si den e tempu ei bo tabatin e mala suerte di risibí un di e kartanan akí, bo mester a hasi purá di bai depositá e sèn pretu ku tin riba e karta na un misa den bo besindario, anto pa despues skibi e karta akí 7 biaha over òf kopia e karta akí 7 biaha i manda e karta akí pa 7 otro hende, preferiblemente hendenan ku ta biba den eksterior, esaki segun mi, ta pa duna un tiki mas kashèt na e karta. Si bo kumpli ku tur e instrukshonnan, e ora ei e santu menshoná den e karta, hopi biaha tabata San Antonio di Padua, despues di 7 dia lo bo gana premio mayó òf algun otro suerte. Si bo no kumpli, algu malu lo pasa abo òf bo famia. Tòg tabatin hopi hende ku ta kere den e pantomina akí. Klaro ku e kartanan akí no tabatin ni tin nada di aber ku religion. Danki Dios a baha man na manda tipo di kartanan asina, alomenos ami no ta mirando e kartanan akí mas.