Mira kon e asuntu di “Tio Percy” òf “Tante Polly” por trese un diskushon awendia. No ta tur hende gusta pa mucha yama nan tio òf tante. I tòg den pasado resien, na Tele Curaçao nos tabatin Tante Esther, Tante Shandra, Tante Stella, Tante Nèni, Tante Saida, Tante Irma i Tante Gerda. I na radio nos tabatin Tio Wancho i Òmpi Elis, ounke ku Òmpi ya tabata un denominashon pa un hende un tiki mas grandi. Mi a konosé kasi nan tur i tabatin relashon di trabou ku kasi nan tur. Pero den nan tin un, ku mi a kompartí mas aktividat ku tur otro: Tante Saida. Mi a traha komo stage-manager pa Saida, mi a entrevistá Saida na radio i mi a presensia diferente aktividat di Saida. Banda di esaki, komo hóben mi ta kòrda bishita na mi kas di Saida, pasobra e tabata mashá yega na mi mama.
Saida Lucilla Antonio Hernandez – Augustina a nasé dia 31 di òktober 1935 na Kòrsou. Saida a lanta den Consciëntiesteeg i su tata Nouel un konosido dentista tabata biba den Kaya Grandi di Otrobanda. Ya for di mucha, Saida tabatin nanishi pa hasi negoshi i for di chikí tabata kumpra kos na Mama ku Papa riba Dèmpel i bende esaki ku hendenan den su bario. El a hasi diferente negoshi, pero e mihó negoshi ku el a yega di hasi tabata, kompra di un lote di sèrbètè di 25 pa 35 cm. E tempu ei kotèks no tabata asina konosí pa hopi hende i nan tabata usa “paña chikí” òf waiki. Saida a bende su stòk kompletu ku hòspital i skolnan. Saida tabatin un feeling inkreibel pa negoshi; tur dia e tabata kumpra papel di krèp di koló, waya i bela di 8 ora, pa e traha flor ku su wela tabata bai bende tur dia pa 10 heldu den plasa di Punda. Saida tabata haña 7.50 i e wela tabata gana un dòlò.
Saida a hasi mashá hopi kos den su bida. Saida a bai St. Annaschool i despues el a bai Nijverheidschool patras di teater Brion. Pa motibu ku e tabata yu djafó e no por a bai skol di plaka. Despues di a risibí promé santa komunion, Saida no tabata un ferviente katóliko, pasobra e tabata sintié deskriminá komo mucha ku no por a bishitá skol di sùrnan.
Saida su risibimentu
Su promé trabou el a bai traha na Liberty den Heerenstraat. El a kasa i haña dos yu, un muhé i un hòmber. Despues di su divorsio el a bai biba 2 aña na Caracas. El a bin bèk i bolbe bai traha na Liberty. Djei el a bai traha na Hotèl Intercontinental.
Saida tabata hopi será ku Hermanos Heyer i un dia Carmelo a bai solisitá na Tele Curaçao i Saida a bai ku ne i e tambe a disidí di solisitá. E no a tende nada di su solisitut, te dia Eithel Hernandez mester a buska un mucha muhé no blanku i no koló skur. Diferente hende a rekomendá Saida i Eithel a tuma Saida den servisio, ku a bira e ‘primera dama’ di nos televishon. I djei tur sobra kos ta historia. “Kinderuurtje”, Obra di man, show di Pasku, programa di horoskop, Sita ku Saida, show di kushiná. Moda, dekorashon, Kateiba, e episodio di Saida ku 2 mucha chikí, Chepo, un seri kòrtiku, “kuida awe loke bo tin den bo kas pa e dura bo mas mayan” i klaro Kushina di Oro (el a produsí dos buki di reseta for di e programa akí). Segun mi Saida a kumpli sigur 30 aña na Tele Curaçao.
Ainda ta fresku den mi memoria, e propaganda ku Saida a graba na Tele Curaçao pa Palais Royal di e wasmashin Wringer. Den tempu rekòr tur wasmashin a kaba.
Kasá ku Eithel Hernandez, Saida a biaha pa New York (1970 – 1976), kaminda Eithel a haña trabou komo gerente di programashon di un kanal di televishon. Na Merka Saida a kuminsá traha na un negoshi ku ta bende paña. E pareha a bolbe Kòrsou i Eithel a kuminsá traha na Radio Caribe i su kasá a kuminsá ku dos programa na mesun radio: mainta “Romántiko i sentimental” i atardi “Kontentu riba bo dial”. Durante temporada di karnaval, Saida a traha tambe pa CUROM i na 1992, huntu ku su kasá Eithel Hernandez nan a kuminsá ku Radio Exito.
Durante un temporada relativamente kòrtiku, Saida tabata manager di De Tèmpel(1979), ku a rebibá un teater di sine den e aktual palasio di hustisia. Pero Saida a bolbe tambe na Tele Curaçao.
Despues Eithel Hernandez a haña trabou atrobe den eksterior, e biaha aki komo hefe di ofisina di Turismo na New York i Saida a bolbe sigui su kasá. Pero e biaha akí e tabata bin Kòrsou kada luna, pa bin graba Kushina di oro. Lamentablemente Saida no tin un biografia pa nos sa ku eksaktitut kiko el a hasi ki dia. Nos sa ku el a hasi hopi kos riba tereno di arte, i na edat di 40 aña, tempu ku e tabata na New York, el a kuminsá pinta i tabatin diferente eksposishon(entre otro na Museo di Kòrsou i tambe na Bloemhof) aki na Kòrsou.
Saida ta bisa te ainda: “no tin un kos ku mi man no por traha”, i su yu Kenneth ta konfirmá esei. “Mi mama ta mètslá, karpinté, e ta las i ta hasi tur trabou ku un hòmber ta hasi. Mi balustrada na kas, ta mi mama a trah’é”. Ku su 89 aña mi mama a traha un kashi di muraya na su kas. Saida no a bai ningun skol pa siña kose, pa siña lokutá, traha arte di man, pa pinta, pa a bira mètslá òf karpinté, pa siña bende, pero ta dominá tur e terenonan akí.
Ora mi a yama Saida pa mi a bai bebe un kòfi serka dje, mi mester a tende ku mi mester warda, pasobra e mester kaba un pintura. Ki dia e ta yama mi, mi no sa, pasobra e shon akí ta hopi drùk.
Esta dushi 3 kasi 4 generashon di tante Saida. Ma traha karnaval ku né awe mi ta kòrdá kon pa yama mi nami un tep. Ha ha 😂 Carlos Evertsz Saida I ami mucha pié tera
Sumamente interesante
Tante Saida un persona sumamente impreshonante. Danki pa pone den spotlight! Great!!!
Bunita pa lesa di e impresionante bida ku Tante Saida tabatin. Bunita rekuerdo pa mi tambe, ku komo mucha a sinta wak kinderuurtje tur dia. Tante Saida i Tante Gerda mi ta korda kla kla. E ultimo menshoná segun mi despues a bai traha na Tele Aruba.
What a woman, bijzonder!
Great pa sa kuantu kos ela hasi. Gana di wak un Kushina di Oro atrobe
Danki pa komparti ku nos Percy. Hesta bunita historia di sra. Saida.
Ta un gran ehempel pa damanan di awendia.
Lo ta great si Percy por graba un entrevista live kune. Mi tin sigur e entrevista ey lo dura por lo menos sinku hora. ❤️💯👌🏾👌🏾👌🏾👌🏾
Otrobanda tin hopi Prenda Presioso 💎
❤
Esta dushi rekuerdo. Mi a maak tante Saida mee ku mi mama. Nan tabata semper bezig ku asuntu di kushina i wissel informashon ku otro. Mi ta korda zeta di oro. Mi ruman muhe tin tur mi mama su krantenknipsels di e reseta nan
Tremendo di sa mas di un di e Damanan yu di Tera kumi a admira for di mucha
Danki Percey 👌🏿
Danki Percy; un personahe nobo pami!
Danki Percy,
Bunita rekuerdo i alabes mi a siña konose mas den profundidat un personahe ku mi a atmirá den mi infansia i adolesensia.
Mas atmirashon pa Tante Saida!
Mi tanta stimá ku ta bisá bo loke e ta pensá ku su lenga skèrpi. Un persona straight forward, multi-talentoso ku vishon, determinashon i perseveransia. Hopi hende por siña serka Saida kiko ta nifiká trahá pa lográ bo metanan ku kurashi. Saida ta un persona fuerte ku sa kiko e ke i no ta basilá pa lográ esei. Bo ta “the one and only”…Love you Tante Saida!!❤️❤️
Danki pa bolbe rebiba ns e dushi tempu di Tante Zaida na Tv8. Un all around woman. Ku su diferente programanan. Ahinda na kas di ns mama ns tin un korant ku tante Zaida su reseta di e dia ey. Mi ta bai buska e korant pa mi bolbe lesa.
Danki Percy pa otro rekeurdo Bunia di Tante Saida.
Tante saida .
For Di mucha wak programa tante saida un sra trabajador
Skerpi tambe
Percey, danki mi tbt sa hopi di Tante Saida
Memoria a refreska bek dushi mes.
Dushi hende
Tante Saida ☀️un di nos solo nan ku ta briya☀️💛🥂
Mare nan por ripiti su shownan di kushiná na televishon of riba youtube lo ta tremendo..
Percy mi a traha 12 aña ku Tante Saida na TC. Dushi tempu ku no ta bin bek nunka mas. Te ainda mi tin kontakto ku TS. i bai buskele zo nu en dan pa korda nos aña nan na/di TC. Un gèp tabatin pasobra ami a bai biba na ulanda pa 42 aña i 2 luna presis. Awor mi ta bek pa nunka mas bai laga mi dushi Korsou ni mi dushi Otrobanda! Slds, di tante Nèni di TC, manera te ainda hende ta yamami!💖🙋🏽♀️
Kompolaga, tante Nenny, yu di defuntuTida Evetsz. Un di e tante nn hopi dushi di Tele Curaçao.
Tante Saida tabata Amiga di mi mamá Aura Pinedo
Nan tabata kore baiskel denParis.HISTORIA DUSHI PA LESA
Esta great, Nos Tanta di tur tempu!
Danki pa rebiba Saida bèk den nos memoria.
Hopi kos mi no tbt sa pero tòg ta dushi pabo tende asina kosnan positivo i bon di un gran dama manera Doña Saida Hernandez
Percy, danki pa kompartí e artíkulo aki. Saida ta un pal’i muhé ku semper mi a atmirá pa su forsa, determinashon i forma di komuniká. Ansioso pa bishitá su próksimo exhibishon!
Mi ta kòrda ku tur hende tabata keda kas pa wak Sita ku Saida.
Un propaganda ku tambe a marka pauta tabata esum pa kuchú i skèr marka Hènckel, ku ta korta ku ta un smak.
Saida tabatin emisora di radio tambe. Den edifisio banda di La Ganga.
❤️
Great!!
Danki Percy pa laga nos konose Tante Saida. Hopi intersante.
Great pa a duna elogio na Saida na bida. Mi tbt enkantá ku su programa Kushina di Oro
Danki pa rebiba Saida bèk den nos memoria.
Hopi kos mi no tbt sa pero tòg ta dushi pabo tende asina kosnan positivo i bon di un gran dama manera Doña Saida Hernandez