Mira kon e asuntu di “Tio Percy” òf “Tante Polly” por trese un diskushon awendia. No ta tur hende gusta pa mucha yama nan tio òf tante. I tòg den pasado resien, na Tele Curaçao nos tabatin Tante Esther, Tante Shandra, Tante Stella, Tante Nèni, Tante Saida, Tante Irma i Tante Gerda. I na radio nos tabatin Tio Wancho i Òmpi Elis, ounke ku Òmpi ya tabata un denominashon pa un hende un tiki mas grandi. Mi a konosé kasi nan tur i tabatin relashon di trabou ku kasi nan tur. Pero den nan tin un, ku mi a kompartí mas aktividat ku tur otro: Tante Saida. Mi a traha komo stage-manager pa Saida, mi a entrevistá Saida na radio i mi a presensia diferente aktividat di Saida. Banda di esaki, komo hóben mi ta kòrda bishita na mi kas di Saida, pasobra e tabata mashá yega na mi mama.
Saida Lucilla Antonio Hernandez – Augustina a nasé dia 31 di òktober 1935 na Kòrsou. Saida a lanta den Consciëntiesteeg i su tata Nouel un konosido dentista tabata biba den Kaya Grandi di Otrobanda. Ya for di mucha, Saida tabatin nanishi pa hasi negoshi i for di chikí tabata kumpra kos na Mama ku Papa riba Dèmpel i bende esaki ku hendenan den su bario. El a hasi diferente negoshi, pero e mihó negoshi ku el a yega di hasi tabata, kompra di un lote di sèrbètè di 25 pa 35 cm. E tempu ei kotèks no tabata asina konosí pa hopi hende i nan tabata usa “paña chikí” òf waiki. Saida a bende su stòk kompletu ku hòspital i skolnan. Saida tabatin un feeling inkreibel pa negoshi; tur dia e tabata kumpra papel di krèp di koló, waya i bela di 8 ora, pa e traha flor ku su wela tabata bai bende tur dia pa 10 heldu den plasa di Punda. Saida tabata haña 7.50 i e wela tabata gana un dòlò.
Saida a hasi mashá hopi kos den su bida. Saida a bai St. Annaschool i despues el a bai Nijverheidschool patras di teater Brion. Pa motibu ku e tabata yu djafó e no por a bai skol di plaka. Despues di a risibí promé santa komunion, Saida no tabata un ferviente katóliko, pasobra e tabata sintié deskriminá komo mucha ku no por a bishitá skol di sùrnan.
Saida su risibimentu
Su promé trabou el a bai traha na Liberty den Heerenstraat. El a kasa i haña dos yu, un muhé i un hòmber. Despues di su divorsio el a bai biba 2 aña na Caracas. El a bin bèk i bolbe bai traha na Liberty. Djei el a bai traha na Hotèl Intercontinental.
Saida tabata hopi será ku Hermanos Heyer i un dia Carmelo a bai solisitá na Tele Curaçao i Saida a bai ku ne i e tambe a disidí di solisitá. E no a tende nada di su solisitut, te dia Eithel Hernandez mester a buska un mucha muhé no blanku i no koló skur. Diferente hende a rekomendá Saida i Eithel a tuma Saida den servisio, ku a bira e ‘primera dama’ di nos televishon. I djei tur sobra kos ta historia. “Kinderuurtje”, Obra di man, show di Pasku, programa di horoskop, Sita ku Saida, show di kushiná. Moda, dekorashon, Kateiba, e episodio di Saida ku 2 mucha chikí, Chepo, un seri kòrtiku, “kuida awe loke bo tin den bo kas pa e dura bo mas mayan” i klaro Kushina di Oro (el a produsí dos buki di reseta for di e programa akí). Segun mi Saida a kumpli sigur 30 aña na Tele Curaçao.
Ainda ta fresku den mi memoria, e propaganda ku Saida a graba na Tele Curaçao pa Palais Royal di e wasmashin Wringer. Den tempu rekòr tur wasmashin a kaba.
Kasá ku Eithel Hernandez, Saida a biaha pa New York (1970 – 1976), kaminda Eithel a haña trabou komo gerente di programashon di un kanal di televishon. Na Merka Saida a kuminsá traha na un negoshi ku ta bende paña. E pareha a bolbe Kòrsou i Eithel a kuminsá traha na Radio Caribe i su kasá a kuminsá ku dos programa na mesun radio: mainta “Romántiko i sentimental” i atardi “Kontentu riba bo dial”. Durante temporada di karnaval, Saida a traha tambe pa CUROM i na 1992, huntu ku su kasá Eithel Hernandez nan a kuminsá ku Radio Exito.
Durante un temporada relativamente kòrtiku, Saida tabata manager di De Tèmpel(1979), ku a rebibá un teater di sine den e aktual palasio di hustisia. Pero Saida a bolbe tambe na Tele Curaçao.
Despues Eithel Hernandez a haña trabou atrobe den eksterior, e biaha aki komo hefe di ofisina di Turismo na New York i Saida a bolbe sigui su kasá. Pero e biaha akí e tabata bin Kòrsou kada luna, pa bin graba Kushina di oro. Lamentablemente Saida no tin un biografia pa nos sa ku eksaktitut kiko el a hasi ki dia. Nos sa ku el a hasi hopi kos riba tereno di arte, i na edat di 40 aña, tempu ku e tabata na New York, el a kuminsá pinta i tabatin diferente eksposishon(entre otro na Museo di Kòrsou i tambe na Bloemhof) aki na Kòrsou.
Saida ta bisa te ainda: “no tin un kos ku mi man no por traha”, i su yu Kenneth ta konfirmá esei. “Mi mama ta mètslá, karpinté, e ta las i ta hasi tur trabou ku un hòmber ta hasi. Mi balustrada na kas, ta mi mama a trah’é”. Ku su 89 aña mi mama a traha un kashi di muraya na su kas. Saida no a bai ningun skol pa siña kose, pa siña lokutá, traha arte di man, pa pinta, pa a bira mètslá òf karpinté, pa siña bende, pero ta dominá tur e terenonan akí.
Ora mi a yama Saida pa mi a bai bebe un kòfi serka dje, mi mester a tende ku mi mester warda, pasobra e mester kaba un pintura. Ki dia e ta yama mi, mi no sa, pasobra e shon akí ta hopi drùk.
