Den kuadro di e akuerdo riba reforma konstitushonal di èks Antia Hulandes, a forma un union monetario di Kòrsou i Sint Maarten. For di 10 di `òktober 2010 esaki mester a tuma lugá, kaminda a stipulá ku e dos paisnan akí lo bai usa florin karibense na lugá di florin di Antia Hulandes (NAf.).
Na 1828 a instituí e promé banko akí na Kòrsou, ku nan a yama e tempu ei “E Banko” òf Banko di Gobièrnu di Kòrsou. Ta te 1907, kasi 100 aña despues a bin kambio den e situashon ei i e banko a haña nòmber: “De Curacaosche Bank”. Na yanüari 1962 Curacaosche Bank a kambia di nòmber i bira “Bank van de Nederlandse Antillen” (voorheen de Curacaosche bank). Na momento ku Aruba a sali for di konstelashon antiano, a kambia e nòmber ofisialmente i a laga e pida ku ta skirbí kursivo afó. Otro kambio tabata ku mester a bin un repartishon di bienes entre Aruba i Antia.
Banko Sentral di Antia tabata anteriormente den Fòrti, despues (1977) nan a muda bai den e edifisio di Hollandse Bank Unie (HBU), e edifisio kaminda miembronan di Staten ta sinta aktualmente i finalmente na 2002 Banko Sentral a move pa e mahestuoso edifisio na Scharloo.
For di 1827 bo por bisa tabatin e promé emishon di plaka di papel, ya ku promé ku institushon di e promé banko, tabatin plaka di papel di drùk kaba, ku nan a bin kuné for di Hulanda. Kier men ku ora “E Banko” a habri su porta na 1828, nan a sali ku biyete ku ta menshoná 1827 ariba. Tabatin biyete di 50 sèn, florin, 5 – 10- 25 – 50 i 100 florin. E biyetenan akí a dura te 1837.
Den nos historia di plaka di papel, e temporada di 1837 te 1855 a keda poko deskonosí, ya ku nos no tin nada nada di e tempu ei wardá ningun kaminda, ounke ku nos tin informashon kon nan tabata. Banko a drùk plaka di papel aki na Kòrsou na drukkerij Muller & Neuman i a drùk papel di 5 – 10 – 25 i 50 florin. E plaka di papel ei a dura te 1855. Despues tabatin emishon na 1855 ku a dura te 1879, a sigui otro emishon di 1879 ku a dura te 1892, otro emishon na 1892 ku a dura te 1902. Mas den dékada 40, a kuminsá drùk biyetenan di 250 i 500 florin. Tabata na 1942 ku a disidí di drùk biyete di un dòlò (2,50) i tambe e konosido florin Sobrekama (aparentemente nan a haña ku e tabata parse un sprei pa kama.)
Na 1948, tempu ku a kuminsá papia di outonomia (statüt) ya kaba a kuminsá poko poko introdusí “Nederlandse Antillen” riba biyetenan. Finalmente e emishon di 1958 tabata e último emishon ku e nòmber di “De Curacaosche Bank”. Na 1962 e emishon tabata menshoná “de Bank van de Nederlandse Antillen”. Na 1967 a pidi fotógrafo Fred Fischer pa e saka diferente potrèt ku mester a usa riba e biyetenan. Di 1967 te 1986 e monumento na Nieuwe Haven a aparesé riba tur biyete.
Un Para a bula bai!
Na 1986 Aruba a skohe pa status aparte i su propio banko sentral. Esei a trese kuné ku mester a kambia diseño di nos plaka di papel i ta e tempu ei a diseñá nos biyete ku e konosido paranan ariba, ku nos a keda kuné te 21 di mart 2025.
Fuera di falsifikashon di biyete bo no a haña mashá komentario riba nos biyetenan, klaro solamente ku e último biyete ku e para ariba, nan tabata manera bula bai.
Moneda di ántes!
Ántes, hopi di nos monedanan tabatin nòmber di kariño. Ami no tin splikashon pa e nòmbernan. Nos promé monedanan ta di 1821, miéntras ku e promé monedanan hulandes a bira forma di pago legal na 1826. Un kos ku no a kambia tampoko atrabes di aña ta e konstante skarsedat di “plaka chikí” sèn largá. Ántes nos hendenan no tabata duna mashá interes pa biyete, pero sí na plaka di metal, moneda. Nos tabata konosé sèn grandi(un sèn) i sèn chikí (mitar sèn). Despues di un sèn nos ta haña un plaka, ku tabata dos sèn i mei. Sepelin (firkant) tabata nos dòsplaka. Nos depchi ta bin di “dubbeltje”, ria di real, dòlò di dòler, chilin di “shilling”florin di florin, sèn di “cent” i plaka di plata, etcetera. Karamba nos ta tin nòmber pa nos sèn lòs: yotin kòrta – tres real – florin, heldu òf bubu pa un florin. Un yotin pa 50 sèn – kuater plaka pa un depchi ku ta 10 sèn. Patientje òf patin pa 2 florin. Ria pa 15 sèn. Dòria pa 30 sèn. Seis ria pa 90 sèn. Skapa depchi pa 5 sèn ku tabata nos stuiver firkant. Sobrekama pa un florin di papel. Un chilin pa 62 sèn i mei. Un wow’i baka òf un dòlò tabata 2 florin ku 50 sèn. Di tur e nòmbernan akí, esun ku mas mi ta kòrda, ta e chilin ku mi mester a paga pa wak mi pelíkula mitar di shete na West-End.
