“Give thanks not just on Thanksgiving Day, but every day of your life. Appreciate and never take for granted all that you have.”- Catherine Pusifer

E selebrashon di Thanksgiving ta algu netamente merikano/kanades, kaminda nan ta selebrá i yama danki pa kosecha risibí. Paresido na nos fiesta di seú. Durante diferente aña mi a purba na radio pa hinka e fiesta aki den nos sistema aki na Kòrsou i purba saka e Halloween ei for di nos sistema òf e Black Friday ei. Mi sa ku El Tributo tin basta aña ta yama pueblo danki riba òf rondó di e fiesta akí.

Komo mucha den bario di Mundu Nobo, nos kas na Piscaderaweg 33, tabata pega na kas di famia Brazil i apénas un muraya tabata separá nos kasnan for di otro. Nos tabata kasi un famia i na diferente okashon nos tabata yega na kura i grita bisiña pa un tiki suku, un tiki manteka òf algu otro. Esei tabata algu masha normal i nos niun di dos tabata famia riku. Despues ku mi a bira grandi, mi a siña apresiá e gesto akí inmensamente. E ta un manera asina fásil pa kompartí.
Despues den mesun bario nos tabata yuda otro i huntu den bario nos tabata sali pa limpiesa i dekorashon di nos bario.

Despues na Hulanda, un temporada mi a bai traha riba un burderèi temporada ku tabata tin mal tempu, pa yuda e doñonan salba algu di nan kosecha. Esaki nos a hasi komo grupo di boluntario di mi akademia di Tilburg. I mas despues, mi a traha 3 aña largu komo boluntario na un emisora di radio den Hospital St. Elisabeth na Tilburg., kaminda mi tabata pasa serka pashèntnan i puntra nan kua piesa nan kier skucha i mi tabata toka esaki pa nan, sin lokutá,  i tabata algu ku nan tabata apresiá enormemente.
Bèk na Kòrsou den nos Fundashon “Bin Kontra mi” na Banda Ariba, nos tabata buska famianan den nesesidat i nos tabata yuda nan drecha nan kas, kumpra kosnan di nesesidat i regla kuminda pa fin di aña.

Kòrsou konosé ya pa diferente aña, diferente organisashon ku ta yuda diferente mucha ku desayuno tur dia, Fundashon Tur Mucha Mester Kome i Lions Club ta dos organisashon ku ta masha aktivo den esaki.  Klaro ku lo tin mas organisashon ku ta hasi esaki, pero e dos nan akí, ta esnan ku ta resaltá pa nan aktividatnan kontinuo.

Por lo general mi stima luna di desèmber, pasobra luna di desèmber t’asina  pega ku Thanksgiving day i tin selebrashon di San Nikolas i Pasku tambe den e luna akí. Anto luna di desèmber ta luna ku service club Lions tin nan akshon tradishonal di “Bon Bisiña” ku ta un proyekto ku mi tin na kurason ya pa hopi aña. Pasobra ta un proyekto di duna, ta un proyekto di union, ta un proyekto ku un grupo ta traha ku meta pa hasi vários hende di nos komunidat kontentu den fin di aña i ta un proyekto ku un bon amigu di mi Gibi Goilo ( Positivo) ta trèk pa hopi aña.

Lions Club ta un service club ku pa añanan largu ta trahando pa yuda komunidat na diferente manera. Nan a yega di yuda Fundashon Pro Bista, nan tin proyekto di desayuno pa mucha, nan ta yuda grupo di grandinan, nan a duna un man den enseñansa, akshon pa haña dunadó di sanger i asina nan a yuda riba diferente otro tereno i den diferente proyekto. Nan fundraising semper ta un éksito, pasobra Kòrsou ta reakshoná mashá bon mes riba nan yamada i nan aktividatnan ta úniko. Por ehèmpel den luna di mei, nan ta organisá un aktividat pa Senior Citizens, kaminda aproksimadamente un 700 hende ta bin huntu, den un ambiente festivo. Nan tabata organisá den temporada di karnaval un fiesta grandi ku un tema i esei tambe tabata un éksito rotundo semper ku mas o ménos 2500 hende biniendo e fiesta akí. Na diferente okashon karchi di entrada tabata kaba. Nan famoso “Haring Party” ta otro eksitoso evento i esaki ta netamente pa rekoudá fondo pa por duna 1500 pa 1800 mucha desayuno den e programa “Duna e mucha un man”.

I mi proyekto preferí ta e proyekto “Bon Bisiña” ku Lions ta organisá den fin di aña i ku nan ta organisando pa di 58 biaha si mi no ta kiboká.

Kon e proyekto aki ta organisá?

Den luna di desèmber Lions tabata start nan akshon i na tur supermarket nan ta pone nan boluntarionan para i ta pidi komunidat, ku ora nan bai kumpra komestibel, kòrda kumpra algu pa nan próhimo. Preferibel kosnan di bòter, paki i òf bleki ku no ta daña i depositá esaki den un buzon òf serka e boluntarionan ku ta pará na e supermarket bon identifiká. Tin supermarket ku ta kooperá tremendamente i ta pone den nan rèkinan kosnan ku ta fásil pa kumpra i regalá e akshon di “Bon Bisiña”. Den pasado, radio Curom tabata kompañá e proyekto aki, transmitiendo for di diferente supermarket. Asina mi mes tambe a kuminsá kooperá ku e proyekto.

E parti ku mas ami tabata gusta i ku awor kasi no tei mas, ta kaminda Lions a introdusí e proyekto na skolnan tambe i tabata siña i motivá hóbennan pa nan tambe aportá na e proyekto, konsientisando nos hóbennan pa nan tambe partisipá aktivamente den e proyekto. Ta duna un periodo durante kua por entregá tur donashon i despues ta inventarisá tur loke a haña i Lions mes ta tuma pa nan kuenta, pa kaba di kompletá e diferente pakinan ku nan ta yena pa repartí. Tur aña tin un kantidat di 3000 pa 4000 mil pakete ku Lions ta sera. Despues di a kolektá tur komestibel i a stiwa esaki na un lugá sigur, boluntarionan ta bin huntu pa forma e paketenan. Intenshon ta, pa yega na un pakete balansá.

Via di diferente kanal sosial ta repartí e paketenan i klaro, manera semper, tin hende ku ta probechá, ku ta mal usá e situashon i ta buska manera pa nan haña mas ku un pakete. Esaki ta algu ku bo no por hasi nada kontra di dje, pasobra semper tin un òf dos den tou ku ta purba daña kos.

Den mi programanan na radio bo mester skucha e jingle di “Bon Bisiña” ku ta un tremendo jingle grabá pa Gibi Doran. Skucha e jingle so, ya ta hasi mi hopi kontentu i mi ta sinti mi bon i ta anunsiá ku dianan bon ta yegando. Spera ku bo tambe haña chèns di kooperá ku e proyekto akí, òf kualke otro proyekto pa un bon kousa. Kere mi: dunando e satisfakshon ta muchu mas grandi ku ora bo risibí. Gibi Goilo mi ta ku bo un biaha mas.