Mi ta kuminsá hopi di mi blognan ku Mundu Nobo, pasobra esei ta mi bario di infansia, mi skol di bida, i lugá kaminda mi a haña mi promé bista riba mundu.
I entre tur talento ku Mundu Nobo a produsí, tabatin tambe un generashon di tènis ku masha poko hende ta papia di dje. Famia Phelipa, Roy, Karel i Rick, Kenneth Hennep , Glen Regales, Ruth Regales, Evita Cuales, Edsel Evertsz i Orlando Cuales. Weganan entre Edsel i Orlando semper tabata kandela.
Mundu Nobo a demostrá ku talento no ta nase for di klupnan karu, pero den bario ku ta karga su abitantenan; deporte tabata un hòbi, un posibilidat pa logra un soño chikitu, i krea un mundu pafó di bo bario i eventualmente bo pais.Esaki ta mi motivashon pa kontá e historia akí: pa honra mi bario i su deportistanan ku a hasi nòmber.
Deporte den bario
Mundu Nobo tin un kancha di tènis, ku posibilidat pa klaro tènis, basketbòl i tambe vòli i un tereno di bala ku den su tempu tabata hopi konosí i kaminda tabatin diferente partido grandi i timnan grandi ku a hunga riba tereno di bala di Mundu Nobo. Awor aki, un vèlt kompletamente deskuida.
Den Bernagiestraat 9, hanchi nèt dilanti vèlt, tabata biba famia Phelipa (7 ruman). Karel Phelipa, tata a nase 30 di yüli 1926 na Indonesia i tabata entrenadó di tènis na vèlt di Sithoc. Despues papai Phelipa a kuminsá duna tur 7 yu lès di tènis na kancha di Mundu Nobo. Karel Phelipa Sr. a ripará ku tènis di Kòrsou tabata birando internashonal i el a lanta Federashon di Umpire di Kòrsou(CATU). E mes tabata duna kurso i el a guia hopi tènista pa bira umpire. Karel Phelipa Sr. a kontribuí en grande ku desaroyo di tènis i umpirenan di Kòrsou.
Richard (Rick) Phelipa a nase dia 24 di mei 1952 i ku 8 aña Rick a kuminsá bai kancha ku su tata. E temporada di 1979 i 1980, Rick tabata orguyo di su famia, di Kòrsou i e tempu ei di Antia.
Ku dies aña Rick a bira miembro di R.C.C, ku e tempu ei tabata hunga i train na Mundu Nobo. Kenneth Hennep tabata kampeon di Kòrsou tempu Rick tabatin 14 aña. For di su 14 aña te 18 aña Kenneth Hennep tabata kampeon hubenil di Kòrsou. Ta tempu ku Rick a hasi 17 aña den final di Britania Cup ku Rick a gana Kenneth pa promé biaha i despues di esei e no a pèrdè mas di Kenneth. E mesun aña ei Rick a kue medaya di bròns den Koninkrijksspelen. Su siguiente aña Rick a bira kampeon di klase B senior enfrentando Bèto Bakhuis i den mesun aña el a topa ku Iyo Pimentel i den promé buèlta Iyo Pimentel a gana Rick 6-0 i 6-0. Na 1972 el a bolbe topa Iyo den promé buèlta i a bolbe pèrdè 6-0 i 6-1 i na ’73 el a ta topa Iyo un biaha mas i ta pèrdè e biaha akí den 5 sèt. Na 1966 Kenneth Hennep i Rick Phelipa a bira kampeon dòbel. Kenneth Hennep a yega di hunga meks dòbel ku Evita Cuales.
Su siguiente aña Iyo Pimentel no a partisipá i Rick Phelipa ta bira kampeon ganando di Richard Trapenberg. Den senior Rick a bira kampeon ’74-’75-‘76-‘77-‘79-‘80-‘83-‘84 i ’89. Su ruman Carl Phelipa a bira kampeon na ’78-’81-’82-’86 i ’87. Rick a bira kampeon di Antia na ’75-’76-’77 i ’79.
Rick a yega di hunga dòbel ku su rumannan Roy, Carl i Wendell i meks dòbel ku Amelia Salas. Entre ’74 i ’84 nan a gana kasi tur torneo i kampeonato di Kòrsou, Chumaceiro Cup, Venezuela Cup, Britania Cup, Asiento, R.C.C, C.S.C, Sithoc i Tenis Triangel Tournament.
Na ’76 i’77 Rick a bira tripel kampeon di Kòrsou i Antia, ganando den single, den dòbel i den meks, sin pèrdè niun torneo importante.
Na ’71 Rick a gana Copa Malta na Repúblika Dominikano i na ’68 i ’69 Rick a yega kuart final i semi final respektivamente na Altamira Tennis Club na Caracas. Na Weganan Sentro Amerikano i di Karibe, Rick ta e úniko ku a kita un sèt di e ganador Montaña di Méhiko. Den torneo di ALM Rick a gana e hulandesnan Martin Koek i Theo Gorter i tambe e oustraliano Johan Alexander.
E dos rumannan muhé, Sharon i Jeanine, tambe a sobresalí den tènis na Kòrsou i Antia. Nan a titulá kampion singel i dòbel durante diferente aña. E Phelipa mas yòn ta Michael ku tambe a sobresalí na Kòrsou, promé ku el a bai studia na Merka ku 18 aña. Na Merka el a hunga tènis pa su skol.
Mundu Nobo, manera mi a skirbi kaba, tabatin Ruth Regales i Glen Regales, Evita, Gonzalo i Orlando Cuales komo hungadónan ku a sobresalí, pero no manera Kenneth Hennep i Famia Phelipa. E temporada ei tabata tempu ku Iyo Pimentel i Humphrey Hose tabata den nan tempu di gloria.
Na 1975 Rick a bira mener di skol despues di a terminá su estudio na Akademia Pedagógiko. Rick a duna lès na skol na Kòrsou i despues di tempu el a sigui pasonan di su tata i a kuminsá duna lès di tènis. Klaro ku el a kuminsá duna lès den su bario, pero a duna lès tambe na su skol bieu Maria Inmaculata Lyceum, na Skol Don Sarto i Julianadorp. Rick a move pa Hulanda, kaminda el a duna lès di tènis i tabata coach na Hulanda tambe. Komo dirigente tékniko Rick a sigui diferente kurso i a logra diferente diploma International Tennis Federation (ITF).
Aktualmente Rick ta bibá na Hulanda i de bes en kuando ta dal bala. Famia Phelipa ta un kapítulo apart den e historia di tènis di Mundu Nobo. Roy, Karel i Rick ku disiplina, humor i persistensia a hiba tènis na un nivel mas haltu. Pero nan no tabata nan so. Kenneth Hennep, Glen i Ruth Regales, Michael Willem, Jereline Bryan, famia Cuales i Edsel Evertsz, tur ta forma parti di e famia grandi di tènis di Mundu Nobo.
Richard “Rick” Phelipa, un kandidato fiho pa Salon di Fama di Kòrsou.
Purcey hopi bon relato. Nos no ta para ketu ki nivel di deportista nos tin na nos dushi korsow. Fam. Phelipa pabien, y vooral Carel y Rick. Saludos di Eky Oleana y Juny Engelhardt. Dushi tempu.
Deporte ta kuminsa den barrio i no na klupnan sjiek. Un hende no por bisa miho, Percey. Bo palabra ta honra un generashon ku hopi hende a lubida, pero ku a lanta un kultura di talento den e mes medio di nos barionan. Bo rekordá nos ku grandesa no ta nasesé den klupskarunan, pero den lugá kaminda pasienshi, dedikashon i komunidat ta forma atleta i ser humano. Respeto pa Famia Phelipa, Hennep, Regales, Cuales, Evertsz — un bòlga di talento ku a pone Mundu Nobo na mapa. Danki pa keda konta nos e istoria-nan ku ta meresé luz; asina nos bario, nos pasado i nos deportistanan por i ta sigi biba den nos memorianan kolektivo.
Un bon ehempel pa hopi otro. Saludos pa famia Phelipa.
E dos ruman muhe nan Phelipa, Sharon i Jeanine, tambe a sobresali den tennis na Korsou i Antillas. Kampion single i doble durante diferente aña. Esun más joven ta Michael ku tambe a sobresali aki na Korsou, prome ku e bai studia na Merka ku 18 aña. Ayanan e a hunga tenis pa su skol. Tenis na mundu nobo tin un historia largu i riku. E a produsi hopi bon húngado di tenis mas manera Michael Willem i Jereline Bryan.
Roy masha danki i asina nos ta kompletá nos historia. Mi a update e artíkulo.
Percy, bunita relato. Mi ta apresia un mundu. Danki.
Mi a update e artíkulo.
Maasha masha danki pa e reportaje aki Percy. Dushi tempu di training, dedikashon i kampeonatonan ku a forma nos tur. Hopi orguyoso ku mi ta mucha di Mundu Nobo. Mi soño ta ku tin mas sport komplex den barionan pa muchanan por hasi deporte ku hendenan responsabel pa giánan.
Mi a update e artíkulo.
Great. Mi tambe a dal bala na e kancha di tènis na Mundo Nobo ku Rick, Roy, Carl, Kenneth, Evita i hopi mas manera Gerben i Age Brouwer. Tin biaha bula waya pa drenta e kompleho. Eks-miembro di RCC temporada di mener Vos. Mi a logra djoin aya hopi tambe ku e miembronan di PSV (polis) manera Broer, Ververs, Blom, Van de Barber, etc. Di nan mi tabata haña bala pa nos sigui trein.
Hopi bon relato.
Komo mucha di Charo,
ami tambe a eksperensiá
di aserka, desaroyo di e “patrimonio” ei di e deporte di tennis den Mundu Nobo.
Komo eks kolega alumno di Rick na Andreas College den añanan ’60, mi a konosé via dje, tantu su tata komo su rumannan. Komo mucha di Charo bario bisiña di Mundu Nobo, mi tabata konosé i tbtin interakshon sosial ku Kenneth Hennep, Edsel Evertsz, Glenn i Fèchi Regales i rumannan Cuales…!
Percy, mi ta kompletamente di akuerdo kubo.
Rick Phelipa ta kandidato fiho pa Salon di Fama di Deporte di Kòrsou. Mi ta sperra ku Federashon di Tennis di Kòrsou ta promové esaki serka FDOK.
Semper ta dushi refreska nos memoria.
Tremendo un biaha mas☀️
Tremendo mane semper Donle P