Tur aña, ora desèmber ta drenta su último simannan, tin algu spesial ta pasa riba nos islanan ABC. Ora ainda ta sukurito, hende ta lanta for di kama pa bai misa. No pa obligashon, sino pa fe, tradishon i kombibensia. E tradishon ei yama Misa di Ourora. Ta pone mi kòrda mesora riba Maria Diwan, ku pa añanan largu tabatin su programa “Den kibrá di Mardugá” na Z-86 (Radio CUROM) tur mainta mitar di seis. Den temporada di Misa di Ourora, Maria Diwan tabata organisá su mainta riba plenchi di Radio Z-86, na e mahestuoso edifisio den Roodeweg 64. Esaki semper tabata riba djadumingu durante, i tabata invitá públiko pa despues di Misa di Ourora, bin e plenchi i bin bebe un kòfi, te, chukulati òf un refresko di su kompania di limonada Curacao Beverage Bottling Company. E tabatin un tim kompletu ku ta sòru pa esnan ku yega haña algu di kome i bebe.Tabatin aktuashon di aguinaldo.Un bunita tradishon di Maria Diwan, ku mi ta sinti falta di dje.

Atrobe mi laso, komo sirbidó di misa, ku Misa di Coromoto den Mundu Nobo, ta hiba mi bèk den e temporada bunita akí. Komo hóben mi tabata lanta tempran i bai sirbi kasi tur misa di ourora ku tabata kuminsá 5or di mainta. Un tradishon ku tambe tin su raisnan profundo na Aruba i Boneiru, i ku pa hopi hende ta forma parti di nan preparashon spiritual pa Pasku.

Na grandi, ya komo tata di dos mucha hòmber, mi a trata di bai Misa di Ourora ku nan i despues bai plasa bai desayuná. Mi mester a konstatá ku e baimentu di plasa tabata na promé lugá i misa di ourora mes no tabata importante. Mi a stòp ku baimentu di misa di ourora i si Mgr. Ellis tabata na bida sigur e lo a para ariba ku mi a bira pagano.

Kiko ta Misa di Ourora?

E palabra ourora ta referí na e momentu spesial ora lus di dia ta kuminsá gana for di skuridat. Misa di Ourora ta misa ku ta selebrá hopi tempran, normalmente 5:00 di mainta, durante 9 dia promé ku Pasku, nuebe misa, den forma di un novena. Te ainda tin hende ku ta plania nan misa ku nan ta bai bishitá durante e nuebe dianan.

E misanan aki no ta misa normal. Tin un atmósfera diferente: mas silensio, mas konsentrashon, mas reflekshon. Ta misa ku mester invitá hende pa pensa riba e “lus” ku ta bini na mundu ku nasementu di Hesus Kristu, pero tambe riba lus ku kada hende ta buska den su propio bida.

Radio emisoranan a kuminsá transmití Misa di Ourora for di diferente bario di Kòrsou. Tabatin radio emisora ku a lanta nan propio kor/aguinaldo i bai toka na Misa di Ourora, ku a pone ku Misa di Ourora a krese mas ainda na popularidat.

Un tradishon ku a yega for di leu, pero a bira di nos!

Histórikamente, Misa di Ourora tin su orígen den e tradishon katóliko di Spaña i Amérika Latina, ku a yega Karibe durante e periodo kolonial. Na Kòrsou, Aruba i Boneiru, misa di mainta tempran aki a haña un lugá spesial den komunidat.

Den archivo i for di testimonio di antepasadonan ta mustra ku Misa di Ourora no tabata solamente pa resá, sino tambe pa reuní hende. Pa esklabonan liber i no liber, pa trahadó, pa mucha, pa hende grandi, pa trese tur hende huntu den misa, promé ku dia di trabou kuminsá.

Despues di misa: komé, papia i sosialisá!

Un parti importante di Misa di Aurora ta loke ta pasa despues di misa. Den hopi parokia, hende no ta kore bai kas mesora. Ta keda papia un tiki de kurá di misa, dal un chukulati i lèter i kòmbersá ku otro.

Misa di Coromoto tabata un dje misanan mas popular e tempu ei durante Misa di Ourora, ya ku nos tabatin un kor masha popular i Aguinaldo Los Pajaros, bou di direkshon di Frank Francisca tabata aktua durante i despues di misa. Un ambiente tur afó.

Despues di tempu Misa di Ourora a bira momentu sosial, un lugá kaminda ta topa, kòmbersá, diskutí i despues ta sigui ku e reunion i diskushon den plasa òf den un otro lokalidat. Tin diferente lokalidat ku ta habri mas tempran spesialmente pa e periodo aki. Pa hopi hende grandi, e ta un momentu di rekonosé kara ku nan no a mira for di un aña promé. Pa hóben, e ta un rekuerdo ku lo keda ku nan pa bida, pero hóben kasi no ta presentá na misa. Echo ta, ku tin mas hende grandi ta bishita Misa di Ourora ku hóben.

Mas ku religion, e ta memoria i identidat!

Misa di Ourora no ta solamente un akto religioso. E ta un tradishon kultural, un forma di memoria kolektivo. Algu ku ta pasa di generashon pa generashon, sin mester di palabrashon.
Tin hende ta bisa: “Mi mama tabata lanta mi tempran, pa bai misa.” Otro lo konta kon e ta hasi promesa, òf kon e ta buska un momentu di pas den mundu yen di preokupashon.
Den tempu kaminda kosnan ta bai asina rápido, Misa di Ourora ta obligá nos pa lanta tempran i pa wak kon di dia ta habri poko poko i disfrutá di naturalesa.

Un tradishon ku mester sigui biba!

Awe, ku teknologia, streaming, radio i televishon, hopi hende por sigui misa na kas. Esaki ta bunita i importante, spesialmente pa hende ku no por sali kas. Pero esensia di Misa di Ourora ta ketu bai mesun kos: kombibensia, silensio, fe i speransa.

Misa di Aurora ta un regalo ku nos a heredá. Un tradishon ku nos no mester pèrdè. Un rekordatorio ku Pasku no ta kuminsá ku regalo, sino ku lus. I nos no mester pèrdè meta di Misa di Ourora for di bista, i no mester konsentrá riba ambiente despues di misa na plasa, pero konsentrashon mester ta riba Misa di Ourora mes.