Mi kas tabata un kas yen di bida, un kas alegre, yen di karakternan úniko. Kresiendo den un famia di nuebe persona – mi mama i nos ocho ruman, den un kas di gobièrnu demasiado chikí pa nos tur na Mundu Nobo, tabata un eksperensia ku a forma i hasi mi ken mi ta awe. Nos kada un a keda ku nos rekuerdonan di nos kas na Mundu Nobo. Loke a keda, ta e dinámika entre nos. Tin biaha harmonioso, tin biaha eksplosivo. Ocho yu den un kas chikí, bo ta siña lihé unda bo lugá ta, òf bo ta lucha pa esei. Nos tabata kuater mucha hòmber i kuater mucha muhé, lantá pa un muhé: nos mama. Sin tata den kas, sin luho, pero ku un forsa inkreibel ku a tene nos riba pia.
Pero no tin duda ku e muchanan muhé tabata esnan ku tabata manda den kas. Mama, e pilar di nos famia, semper tabata esun ku tabata dirigí kas. E tabata e persona ku a tene nos tur huntu, pa motibu ku mi tata no tabata na kas.
Mamai tabata dirigí nos kas. E tabata traha duru i hopi biaha e no tabata na kas, pero ora e tabata tei, kas tabata otro. Den su ousensia, mi rumannan muhé tabata tuma rienda. Spesialmente e muchanan muhé tabata esnan ku tabata manda. Nan tabata yòn, pero determiná. Nan tabata regla kas manera muhénan adulto. Poppy, mi ruman muhé “bossy”, tabata e general di servisio. Ora e papia, nos tabata skucha, òf por lo ménos nos tabata hasi komo si fuera. Maria, esun di mas grandi, nos tabata yama Chichia, tabata e forsa suave, e diplomátiko, pero e tambe tabata manda.
Mi ta kòrda ainda kon komo mucha yòn mi mester a funshoná komo shaperon ora Chichia tabata sali ku su amigu, e hòmber ku despues a bira su kasá. Sin masha gana mi tabata kana nan tras, supuestamente pa protehá Chichia, pero en realidat mi tabata un testigu bibu di nan amor. Tabata un kos straño no? Pero den nos famia, e tipo di ròl aki tabata normal i tabata un eksigensia pa mi rumannan muhé sali kas.
Despues di nan kasamentu, mi tabata pasa hopi tempu serka nan, kome i skucha músika. No solamente pa kome, maske esei tambe tabata un bon motibu, pero prinsipalmente pa e kariño. E músika, kombersashon na mesa, e harimentu. Nan kas tabata un lugá di sosiegu. Serka su kasá Fiti mi amor pa bolero (Carlos Pizarro) a krese i mi resistensia kontra ranchera a bira mas grandi. Maria tabata esun ku tabata manda den e kas ei tambe, parse ku esaki tabata den su sanger. E momentonan ei, skuchando músika, kome dushi, tabata momentunan inolvidabel. Tabata un forma di keda konektá.
Nan a muda hopi komo famia. Promé nan a biba na Kortijnweg, despues nan a move pa Charo, i despues pa Brievengat. Kada mudansa tabata un kapítulo nobo den nos bida.
Manera hopi kurasoleño, mi tambe a tuma e desishon di muda pa Hulanda. Esei tabata un paso grandi, no solamente pa mi bida personal, sino tambe pa e konekshon ku mi rumannan. Honestamente, despues di mi salida, e kontakto ku nan a bira mas difísil. Tabata mas tantu ku mi mama ku mi tabatin kontakto. Nos rumannan durante mi temporada na Hulanda nos no tabatin kontakto ku otro. Ta via di mi mama mi tabata tende di mi rumannan.
Ora mi a regresá Kòrsou mi a purba konektá atrobe. Pero e tabata komo si fuera nos tur a kuminsá biba otro bida. Nos tabata rekonosé otro su bos ainda, pero e zonido a bira diferente. No hostil, pero tampoko spontáneo.Mi a spera ku e konekshon di ántes lo a bolbe, pero mi mester bisa ku no a bai asina fásil. Bida ta tuma su rumbo, i hende ta kambia.
Pèrdida di nos mama a trese nos huntu atrobe. Pa un ratu, por lo ménos. Despues a sigui mas pèrdida: nos tata, dos ruman hòmber, i dos ruman muhé. Kada despedida a trese nos atrobe huntu pa un ratu.
Den momentonan difísil di luto, nos a topa, kompartí tristesa, i rekordá huntu. Pero despues, manera ta kustumber, kada ken ta kue su kaminda atrobe. Manera ku kada despedida nèt no tabata sufisiente pa trese nos huntu. Mama e figura ku tabata tene nos huntu no tabata tei mas.
I tòg hopi biaha mi ta pensa bèk riba e tempu ei na Mundu Nobo. Riba e kas chikí ei yen bochincha. Riba e lucha, pero tambe riba e union. Riba e kariño ku tin biaha tabata skondí bou di kapa di bringamentu, pero ku semper tabata presente. Mi rumannan muhé a goberná, mi mama a guia, i ami, ami a wak, a skucha, i a siña.
Nos tur a keda formá pa e kas ei, e famia ei. Podisé nos no ta papia ku otro diariamente mas, podisé nos ta biba den diferente mundu. Pero den mi rekuerdo i spera tambe den esnan di mi rumannan, nos ta keda semper e kas ei na Mundu Nobo. Un kas yen di bos, yen di bida, yen di pasado, yen di amor. E eksperensianan ei a siña mi hopi. Mi rumannan, Maria (Chichia), Lucille (Chil) esun mas trankil, Marvis e mas chikí, i Poppy e boss, i tur mi otro rumannan, nan ta parti di mi historia. E no ta semper perfekto, pero ta di mi. I esei ta loke ta hasié asina úniko.
Awendia, mi ta mira tras i ta gradisidu pa e edukashon ei, pa e kas ei yen di amor. Si mi tin di akseptá, ku nos pilánan a kuminsá move.
