Mi no tabata simplemente su fanátiko,pero nos tabata amigu. Mi a bishitá diferente di su aktuashonnan, mi a organisá diferente di su shownan, huntu ku Steven Martina nos a dun’é loke e meresé na 2008, ora ku Macario Prudencia su nòmber a prònk riba un kaya den Oost Jongbloed; mi a graba un disko “Makai n’ ta kai” i mi tabata un di e proménan den e homenahe na Makai riba Awasá. Kier men mi ta mas un amigu i banda di ta amigu, mi ta un super fanátiko di Makai. Mi slogan na radio semper ta:Miéntras mi ta na bida, Makai un ta muri.
E ta embahador di salsa antiano, un ritmo ku e mes a desaroyá. Na 1981 a proklamá Makai komo Tata di salsa antiano.

Macario Alejandro Prudencia, pa su amigunan Makai, a nanse dia 2 di yanüari 1934 na Kòrsou den bario di Buena Vista. Su ruman Emilio i su subrinanan Axel,  Erwin i Ruben tur ta músiko.
For di mucha el a mustra interes den músika i ku 15 aña el a kuminsá su karera den konhunto “Estrellas Nashonal” di Emilio Schoobaar na aña 1948. Den e banda aki el a toka raspu, kampana, bongo i konga i de bes en kuando e ta kue un koro. Despues el a move pa Konhunto “Alas del Casino” di Marco Atacho i na 1949 el a bai toka den “Sonora del Caribe” di Ewald Snijders. E agrupashon aki despues a kambia nòmber i bira “Lluvia Musical” bou di direkshon di e mesun Ewald Snijders. Despues na aña 1950 el a toka ku Konhunto “Jovenes Del Caribe” di Chal Atalita ku mas despues a kambia nòmber i bira “Rítmiko Televishon” di Romualdo Hanst. Macario a move for di e konhunto ei, pa bai toka ku konhunto “Líriko Antiano” bou di direkshon di maestro Juan Camelia, pa despues bolbe bai forma parti di otro konhunto di Ewald Snijders. Di 1954 pa 1956 el a militá den San Jose di Manuel “Shon Ma” Salsbach. Despues el a bai militá den banda di Juan Camelia atrobe, “Aristo Combo”. Den tur banda/konhunto ku Makai a toka e tabata konguero. Te na aña 1980.

Makai di Músiko pa Kompositor i Kantante

Na 1967 Makai a komponé un tumba pa Konhunto San Jose. Shon Ma Salsbach a areglá e piesa i Clovis Bazur a kanta i graba “Raspa Bil” riba disko 45 ku a bira un hit grandi. Den mesun temporada Makai a komponé un merengue “Antonio” pa Estrellas Del Caribe ku su amigu Idelco Coffie a kanta. Esaki tambe a bira un éksito.Ta e dos promé piesanan ku Macario a komponé i asina ripará su potensial komo kompositor.

Na aña 1969 Macario Prudencia a bai hasi un “try out” ku un grabashon di 2 piesa riba disko 45. El a graba “Super Jolly” i e otro banda el a graba “Mi Komèr”. Huntu ku su yunan i su ruman Emilio nan a pone Kòrsou ariba abou.Tabata na 1970 ku Makai a haña sa ku e tabatin talento pa komponé, kanta i deleitá pueblo di Antia.

Despues a sigui diferente grabashon i éksito tras di otro.Dor di su éksito, Macario Prudencia na aña 1972 a haña un kontrakt pa e por a toka den un diskotèk den Sentro Komersial Antia. E diskotèk aki tabata di Alfred Richardson i tabata yama ”El Nido”. Na momento ku Macario Prudencia a kuminsá toka tur wikènt den e diskotèk aki, kosnan a kuminsá kana masha bon mes pa e lugá.

Na 1973 e ta disidí graba “Bròs Bròs” i “Kadushi”. Ya pa e tempu ei el a forma e banda “Continental Combo”. Makai ta tin Kòrsou, Aruba i Boneiru den su gara. Makai tabata dje popular ei, ku e banda a kuminsá traha di djaluna pa djaluna. E temporada di 1974 pa 1977 Kòrsou tabata shete loko un belá pa baila Makai. No tabata importá nan ku kua banda Macario tabata toka, basta Makai ta tei anto tur shimaruku ta hechu. Pueblo di Kòrsou a duna Macario un apoyo inkreibel den e tempu ei. Ya barberia no tabata konta mas, pero farándula tabata Makai su fuente di entrada.

Na1974 Macario Prudencia a risibí un disko di Oro pa e superhit “Bròs Bròs”.  Esaki ta un opsekio di korant “Amigu di Kòrsou” i tambe el a risibí un disko di plata di Tik Tak (Angel Job) pa e disko 45 “Kadushi”. Esaki tabata huntu ku su banda “Continental Combo”. Na aña 1975 Makai ta bolbe risibí un disko di oro e biaha aki serka Spritzer and Furhman pa su piesa “Chumbala den bo Bèshi” e biaha aki huntu ku “Makai i Su Salsa Antiano”.

Na 1979 Makai ta bai Ulanda riba invitashon di Franklin De Windt di Divi Divi Promotions. E banda Salsa Antiano ta bou di direkshon di su sobrino, e gran músiko, Erwin Prudencia. Makai despues di a regresá for di Ulanda a kumpli ku algun kompromiso na Kòrsou i Aruba i despues di su último toka na aña 1980 na Aruba, Macario Prudencia a kibra e banda Salsa Antiano. El a keda 4 luna sin hasi masha kos, pa despues di 4 luna, bai forma parti di “La Gran Orquesta” di Boeis Mambi. Huntu ku e banda aki e la bai Sto. Domingo, kaminda e la graba dos piesa ku e banda, un salsa-antiano titulá “Keshi” i un simadan ku el a yama “Bon Bini”. Esaki tabata na 1980. Tabata un aña skur pa Macario. Ta aña tambe ku el a sufri un aksidente di outo i el a keda kasi 5 luna malu na kama.

Na 1981 Kòrsou a duna un homenahe grandi na e “Tata di salsa antiano”. Ta un di e biahanan ku prensa kompleto a duna un rekonosementu Masha bon mes na e gran Macario Prudencia. Esaki a tuma lugá den e sede di alegria, Hòfi Dèl. E dia ei a nominá Makai komo Embahador di Salsa Antiano. E tempu ei e programa di farándula di radio, Waya tambe a duna un rekonosementu na Macario Prudencia i di man di diputado di kultura di e tempu ei, Winston Lourens  el a haña rekonosementu di gobièrnu di Kòrsou. Pa motibu di su salú, Macario Prudencia no a hasi masha kos mas den e tempu ei i na novèmber, Macario Prudencia ta biaha pa Ulanda en buska di su salú.

Buskando su salú, Makai ta hañ’é ku Franklin de Windt un biaha mas, ku ta harma un banda p’e.Tambe na Ulanda Makai a aktua ku BESS.Ta temporada ku Macario Prudencia su “Wasmashin” ta dal masha duru mes, aki na Kòrsou ku Tunnel Miners i na Ulanda ku BESS. E éksito ta dje grandi ei, ku Trafassi ta kue e piesa i grab’é ,bisando ku ta nan komposishon.

Ku Tunnel Miners Makai ta bolbe skor un éksito sin presedente. Hitnan riba e LP aki ta, Wasmashin, Ba lagami bandoná; Wega di Spada, Ouwe Bok, Ora Bo ta Bou di Palu, Mi Rekuerdo, etcetera. Na Ulanda Macario Prudencia ta graba ku e seyo Dureco i aki e ta graba ku un elenko di músiko antiano bibá na Ulanda. Su LP “Ma Trese Lele” ta bira otro éksito grandi. Aki kisas ta kaminda Macario ta graba su piesanan ku e mihó orkesta ku el a logra graba ku ne. Joe Louis, Dim Dam, Mi Televishon, San Dom, Hiep Hiep Hoera etcetera. Macario Prudencia ta bin Kòrsou ku e éksitonan aki i e ta aktua ku Arnell i Orkesta. E éksito di su aktuashon aki na Kòrsou ta super.

Despues Makai ta bolbe Ulanda, kaminda e no ta hasi kasi nada mas i na 1993 e ta regresá Kòrsou, kaminda riba invitashon di Joe Black e ta graba ku ERA. Na Kòrsou ta kaminda Makai ta graba ku kisas e úniko eksponente antiano ku a tene e ritmo Salsa Antiano bibu, Rudsel “Little” Leito. Makai ta graba dos disko kompakto ku ERA i despues ta graba dos piesa ku GIO. Despues di esaki Percy Pinedo ta graba e siguiente disko di Makai, :Makai n’ ta kai” i finalmente 2014 Fundashon Bon Intenshon ta graba e CD, “Amigunan di Makai”, kaminda hóbennan ta graba piesanan di Macario Prudencia ku orkesta di Gregoy Colina.
Dia 24 di mart 2015 Macario Alejandro Prudencia a muri.

Homenahe na Makai Awasá