Hunga Sam

Den dékada 70, trahando na Parket Procureur Generaal i tambe na Departamento di Enseñansa di Gobièrnu Sentral, ta tin diferente aktividat finansiero ta tuma lugá na e ofisinanan aki. Bendementu di bièchi ku numbernan fiho i ora bo gana, den ofisina tur hende sa ku bo a gana, benta i kompra di lòt/number (sea bo ta kumpra bo so òf bo ta bai baka (kompartí e number ku un otro hende), bendementu di kuminda i kos di boka dushi, fondo di kontribushon pa eventonan sosial: fiesta, eventonan deportivo, hasimentu di aña, morto i tambe hungamentu di Sam.

Sam ta un wega finansiero ku nos ta hunga na Kòrsou pa yega na fondo i ta bon pa nos sa, ku te awe 2023, ainda tin wega di Sam na Kòrsou i tambe na otro islanan i na Ulanda.

Hunga Sam
Un grupo chikí ta depositá tur siman, òf tur luna un suma di plaka den un pòt i segun turno e partisipantenan ta haña e suma kompletu di e pòt. Mayoria biaha ta hendenan ku un suèldu chikí ta hunga Sam, paso e ta un sistema fásil pa yega na fondo, sigur muchu mas fásil ku bai banko bai buska un fiansa. Semper tin un hende den e grupo ta fungi komo banko, òf e “Kabes”. E Kabes ta wak pa tur partisipante kumpli ku e reglanan di e grupo, paga nan parti na tempu i tambe ta regla ken ta haña sèn ki ora. E Kabes mes no ta paga nada. Hopi biaha ta hunga Sam, pa diferente motibu: pa risibí e montante kompletu na okashon di un fiesta, risibimentu òf pa kasamentu, pa vakashon etc. Tin biaha tin hende ku tin mester di e sèn direpente i nan ta pidi e Kabes pa e regla ku nan por haña e sèn mas tempran. Pa su trabou e Kabes ta risibí un pòt i p’esei e partisipantenan mester paga un biaha èkstra. E wega di Sam ta dura algun siman, luna i maksimal un aña. Si bo ta partisipá bo ta obligá di hunga henter e periodo. Na momentu ku tur hende haña e pòt un biaha, e wega a kaba i por bolbe kuminsá di nobo. E krímen di mas grandi ku un hende por kometé ta, stòp di paga bo sam, despues ku bo a risibí e pòt. P’esei ta importante pa konosé e hendenan ku bo ta Hunga Sam ku ne. E palabra Sam ta derivá for di e konsepto ulandes “samsam”, ku ta nifiká hasi algu huntu[1].

Sam ta un wega kolektivo, den grupo chikí (sam, bon kuné i bingo), miéntras number/lòt i brièchi ta wega di plaka, wega di riesgo kombiná ku suèltu, siendo individual òf kolektivo. Mayoria biaha den Sam, tur partisipante ta konosí pa otro i ta hunga Sam den nan gruponan primario, famia. kolega i bisiña. E sistema ta un kombinashon di sparmentu i krédito  i ta eksigí hopi konfiansa i ta mustra (kontrali na e imágen konvenshonal) ku den komunidat tin tradishonnan di konfiansa, planiamentu pa tempu largu i komunikashon efektivo ku otro hende pa logra metanan individual i familiar. Meskos ku e sistema di Sam por funshoná bon e por faya tambe pa falta di konfiansa. Mas será e grupo ta, mas chikí e rísiko ta ku por bin problema.

Tur e aktividatnan finansiero akí tin aspekto kultural ku nan[2].
Mi a menshoná mas ariba, ki sorto di kontribushon nos ta tin na e ofisinanan ku mi ta traha den dékada 70. Pero hungamentu di Sam ta tei tambe den bario kaminda mi ta biba i mi mama mes ta un hende, ku pa rondia su bida, ta organisá wega di Sam i klaro e Kabes, ta risibí e pòt. I mas grupo di Sam e organisá komo Kabes, mas pòt e tabata risibí.

Mester bisa ku mayoria di Sam ta bai bon i sin problema. E sanshonnan sosial ta hunga un ròl masha grandi mes. Esun ku no kumpli ta pone su reputashon na duda i ta riska di pèrdè asta su famia den un komunidat chikí asina.

---