Tin artíkulo ku mi ta tarda pa redaktá, pa motibu ku mi ke tin sigur di loke mi publiká ta bèrdat. E tópiko di awe “Ocho Dia”, pa motibu ku kasi e tradishon aki no tei mas, a tuma mi mas tempu pa analisá, i papia ku diferente hende promé di yega na informashonnan korekto pa publiká. Pero danki na informashon balioso di Sr. Edsel “Papi” Jesurun, informashon di Elis Juliana, Guia Etnológiko 2, Zo was Curaçao di John de Pool, Tempu di Chinchirinchi, Henry “Harry” Moen, “Ocho dia” òf novena. Triebels, L.F. i algun entrevista, ku mi a finalisá e artíkulo akí.
Ni Nicolaas van Meeteren (Volkskunde van Curaçao), ni John de Pool, no a demostrá mashá rèspèt pa e kustumber akí. Esaki ta keda bon kla demostrá den e buki di John de Pool, Zo was Curaçao, ku a yama nos “Ocho Dia”, ”het half-barbaarse ritueel”. E parti di tene rou i resa pa defuntu ta algu ku katólikonan a siña nos i otro partinan di kore ku spiritu i kibramentu di altá durante e último anochi di “ocho dia”, ta algu di ritual afrikano. Ami komo mucha a eksperensiá “ocho dia” di Tan Lu mi wela, pero mi no ta kòrda hopi di e kosnan ku mi a lesa òf tende.
“Ocho dia”: un ritual ku ta tene despues di morto di un hende, pues e último dia di resamentu pa deskanso di alma di e defuntu. En realidat “ocho dia” ta e di nuebe dia di resamentu. Segun un kustumber bieu katólikonan di Kòrsou ta resa nuebe dia largu pa deskanso di alma di un defuntu. Fuera di un “Ocho Dia”, tin un “Ocho Dia Jekán”, ocho dia solèm.
E di dos dia despues di entiero tabata kuminsá resa rosario na kas pa deskanso di alma dje defuntu. Mayoria biaha den oranan di atardi, pues ocho dia largu tabata resa un rosario normalmente segun misterionan di e dia, serio i simpel. Pero e di nuebe dia tabata kulminá ku un seremonia ku tres rosario kantá, un aktividat ku tabata kaba te den oranan di mardugá. Hendenan ku no por a kumpli na entiero ta probechá e último chèns akí.
E “ocho dia”, ta un dia di mashá aktividat i preparashon. Matamentu di kabritu, wea grandi di sòpi ta bai kandela i te na ora no tabatin wea grandi, anto ta bleki di kerozin mes di sòpi ta bai kandela. E dia resamentu tabata kuminsá un tiki mas lat, famia di defuntu ta bisti rou i tabata sinta den sala tur na pretu, ku lensu blanku steif striká na kabes.
Segun hendenan tabata yegando, nan ta pasa kumindá famia i ta manera ku kada “kumindamentu” ta manera un herida ta bolbe habri, pasobra ta gritu di yoramentu tabatin. Hende hòmbernan generalmente ta kuminda i sali bai sinta afó, den kurá, miéntras ku hende muhénan tabata keda sinta paden serka famia di defuntu. E hòmbernan tabata sinta pafó, diskutí ku otro, konta kuenta i hunga (spelchi) wega. Elis Juliana: “tabatin diferente wega pa dibertishon. Tabatin entre otro: zamana-ki-toki, wega di spelchi, wega di palu kombiná ku kontamentu di kuenta i tiramentu di charada. Den vários okashon dibertishonnan ei tabata dura te den oranan di mainta”.
Despues di un ratu e sakristán, ku ta e persona ku ta dirigí e “ocho dia” ta kuminsá ku e seremonia. E fishi di sakristán tabata pasa di tata pa yu i tabata un trabou di honor (fuente Edsel Jesurun), i klaro ku bo ta haña algu for di e trabou. Probablemente ta padernan spañó a introdusí e fishi di sakristán.
Sakristán ta gloria su kurpa promé i despues ta kuminsá ku orashonnan fo’i kabes i tabata kanta mei mei di resamentu, na mitar latin, mitar spañó bruá ku papiamentu. Despues di e di dos rosario, pasobra na ocho dia ta tres rosario kompletu tabata resa, sakristán ta bai drecha su kurpa patras den kushina ku’n beter di ròm òf sisti su kurpa ku’n kònchi di sòpi di bestia chikí. Klaro ku ta parti kòfi ku buskuchi pa hende muhé, miéntras ku ya e hòmbernan pafó sinta tabata dal nan beter ku ta un smak.
Sakristán ta reanudá su trabou i hopi biaha un “yoradó pagá” ta habri kaminda pa esnan ku tin gana di yora, i asina resamentu di e di tres rosario ta tuma lugá bou di mashá yoramentu. Despues di tres rosario ta yega e momentu solèm, ora ku tin di manda spiritu bai. Sakristán ta kuminsá kibra altá, kitando tur kos for di riba e altá. E altá tabata pegá ku’n bentana, komo ta na é bentana ei bientu di den kas tabata sali i ei alma di defuntu mester sali na fin di seremonia. Pues na final di seremonia ningun hende no por ta pará den bentana pa no stroba e alma bandoná kas (Elis Juliana). Tur porta i bentana di kas tabata hanchu abrí pa spiritu por sali sin nada strob’é. Yoramentu tabata un kos tremendo i ku “yoradó pagá” na kabes, kasi tur hende tabata yora i papia. Nan tabata papia kontando detayenan di nan bida relashoná ku e defuntu.
Miéntras tantu pafó den kurá, kontamentu di kuenta, sakamentu di charada i naturalmente dalmentu di beter tabata tuma lugá, kompañá ku gritu di harimentu manera ku ta na fiesta nan ta, sin tene kuenta mes ku sintimentu di hendenan den kas. Ya, kiko otro bo por kier, “ocho dia” a tuma un karakter di fiesta, pasobra hopi biaha ta start ku wega di dominó, miéntras ta parti sòpi i asta otro kuminda kompletu. “Ocho dia” tabata dura tin biaha te den oranan di mardugá.
Teniendo na kuenta ku baidónan di “ocho dia” tabata karga nan lampi bon kargá, un ta nada straño ku sa sosodé hopi desgrasia despues di “ocho dia”. Esun di mas grandi i trágiko ku Kòrsou a konosé tabata na aña 1939 na Yotin Kòrtá, kaminda sinku hende a pèrdè nan bida, despues di a sali di un “ocho dia” ku a para bira un paranda.(Informashon Edsel Jesurun i verifiká den Amigoe di Curaçao).
Un kambio grandi ku a presentá ta, ku hende hòmber tabata dirigí “ocho dia” i awor ta hende muhénan ta resa i apénas bo ta mira hende hòmber na e aktividat. Awor, despues di entiero ta hasi 3 misa, pero mashá dia a bira ku ta hasi un misa pa deskanso di alma di defuntu, apénas ta bisti rou i “ocho dia” kasi no ta eksistí mas.
Konkluyendo: tene rou i resa pa un defuntu durante ocho dia (nuebe) ta klaramente un kustumber katóliko, kombiná ku kustumbernan afrikano, i mashá tempu e kustumber akí no tei mas. Hopi di loke tabata sosodé na un “ocho dia” ta sosodé tambe na “labamentu di man”.
Elis Juliana: “Nos ekspreshon: “Laga kuenta pa ocho dia” ta originá di e echo ku na “ocho dia” semper tabatin kontamentu di kuenta i tiramentu di charada”.
Master atrobe Percy. I mi ta gusta lesa e interkambio entre tur ku ta buta bn Comment. Mi ta bisa atrobe ku bo mester traha riba e Buki, anto agrega algun datos di esnsn ku ta Comment. E historianan aki no por bai perdi. Bo ta buta ns tur bai den ns infansia. Danki i sigi komparti ku ns.
Percy bondia. Un otro kapituló ta “Bistimentu di ròw”. Algu uniko. Pa mama 2aña na pretu ku sombre ora ta sali ku e twil ta kai den Kara of lensu despues poko poko ta baha e koló pa blou skur- shinishi – blanku. Por
kita ròw awor. Pa tata ta 1 aña , pa wela mi ke ta 6 luna. Danki Dios e kosnan ei a bai for di moda, Anto den e kalor aki.
Percey Danki pa konparti
Lesando e artíkulo aki, mi ta kòrda e kuestion di ‘kuenta pa ocho dia’.
Si mi no ta kiboká, komo ku ta 8/9 anochi ta sinta huntu resa i hasi tur e seremonia nan, tabata tin hende ku tabata ‘spesialisá’ den konta storia, charada ètsetera.
Dimes ami ta supone ku mayoría di e storianan lo tabata puru fantasía.
Tambe tabata tin e storia nan ku tabata pasa di generashon pa generashon.
Awendia nos a duna un poko kambio na e nifikashon di e término : “laga e kuenta pa ocho dia”.
Awendia e ta nifika: si bo no ke tende, òf no ta mashá interesá den tende un vershon di algu ku kisas bo sa kaba, bo ta bisa esun ku ke konta bo : laga e kuenta ei pa ocho dia…
Danki pa komparti
Na diferente okashon nos komo mucha mester a atendé ocho dia pa motibu di fayesimentu di wela, tio o otro pariente. Tur primanan mester a bisti na blanku i sinta huntu. Pa nos tabata un kompetensha ken por a inventá mas palabra ku ta bai ku e pregon ‘ pidi pa el’. E tabata bira barika hel, Ismael, kome papel, mara bel, i mas ku mi no ta kòrda.
Ami ta di e período ku ta hende muhé tabata resa rosario 😉. I serka mi famia tabatin sufisiente hende ku tabata kampion den yoramentu i no mester a hür un yoradó. Komo mucha tabata spòrt pa nos wak ken por a yora mas duru.
Un biaha mi a yega di haña un bon sota serka mi mama después ku nos a yega kas pasombra mi no por a wanta mi harimentu.
Den tur fèdrit di a pèrdè un ser kerí, tabata un tempu tambe di hopi aktividat ku famia, preparando pa ocho dia
Lusette danki pa kompartí, komo sirbidó di misa nos tambe de bes en kuando tabata kontesta poko kos foí sla i si pader ripará, bo ta den. Personalmente mi tabata haña rosario tabata dura demasiado largu. Mi rumannan na kas tabata tenta otro meskos, ora ku mi mama tabata sigui rosario via di Radio Caribe e tempu ayá. Kere mi: ayera 8 di febrüari tabatin un “ocho dia”na kas di un hende yegá di nos. Tabatin kibramentu di altá i korementu ku spiritu.
Ami tabata gusta bai ora di resa rosario na kas. E tempu ey mi tabata mucha, i mi tabata gusta ora di parti letter ku chukulati i e dos snechi pan ku pikalili ku keshi of tin tabata pone ham. Esaki nan tabata parti pa ora ta bai kas.
Percy,
Ba ponemi rekorda un òf dos bia ku ma eksperensha un ocho dia komo mucha. Pues hoooopi aña pasá 😂
Pero tur dos bia tabata un hende muhé tabata dirigi hinter e proseso.
En bèrdad awendia ta misa ta pone i no tin “ocho” dia kasi mas.
Laga sobra kuenta pa ocho dia.
E fam ta Atimadora
Masha danki Percy!!
Ta promé biaha ku mi a tende/lesa di e “ocho día” !! Sumamente interesante!! Btw, e “vorlester” na un entierro tin algun relashon ku e persona ku tin e rol prinsipal día e di “nuebe día”?
Te asina leu ku ami sa, nò. forlestu su trabou ta kaba despues di entiero.
Den religion hudiu, nos ta sinta 7 dia despues di morto pa resa huntu ku e famia na kas. Ora ku kaba di resa tur hende, homber i muhe, ta keda un ratu ameno ta bebe I kome algu. Pa kompaña famianan di e defunto. Nos ta tapa spil den e temporada ei, pa e alma ku ta dualu rond den tempu ei, no wak su mes I spanta. E ritual an ta paresido, of no?
Manera bo di Michele nan ta paresido
Percy un bon refreskamentu. Den Sta Maria nos tabatin un resadó hende hòmber ku tabata yama Agustin Atimadora. Mi mes a buské hopi bia pa resa durante 8 dia.
Paresido sigur. Danki pa komparti
Nos ta katóliko, pero mi ta korda ku dia mi wela a fayesé (1962) na nos kas tambe e spilnan a keda tapá te despues di “ocho dia”.
Maggie esei mi tambe ta kòrda dia di morto di mi wela.
E parti di spil tapá ta bin fiá di Hudiwnan. Y nan tambe tin na versión di “Ocho dia”. Musulmanan y Hindunan tambe tin nan versión. Resamentu y luto ocho dia largu.
Laga mi ketu ora mi ta lesa
Hopi dushi ora bo sinja un kos manera bo ta skibi
I hasie komprendibel .
Danki
Mi ta agradedi di a lesa i siña mas di e selebrashon di ocho dia.
Percy, saludo.
Danki pa kompartí.
Ami ta kere ku Ocho dia tabata of ta un manera pa yuda den e proseso di rouw. “kasi e tradishon aki no tei mas”. Mi ta ansioso pa sa si e tradishon di Ocho dia” ta tuma luga ahinda. E ta un kustumber di aki na Korsou so? Tabatin e kustumber na islanan rond di den regio tambe? Tin komparashon ku otro kustumber otro kaminda. Komo mucha chiki mi a ekspensha di serka, pesey e artikulo ta interesante i ta trigger mi gana di sa.
Danki Percy.
Norbert e inter akshon akí. Mi a komprondé ku aki aya e kustumber akí t’ei ainda, pero mashá poko mes. Tantu Aruba i Boneiru konosé e kustumber akí i kasi di mes forma ku nos. Jamaica tin e kustumber aki duru i meskos ku nos, ku e úniko diferensia ku nan tin basta kanto tambe. Lesa e reakshon di Sra. Lucille Dolorita aki bou di e mucha, ku a bin dilanti tambe den otro relaronan ku mi a tende. Mi ta apresiá e interakshon.
Danki pa kompartí Percy!!!
Master,
Ami konose e vershon ku ta hende muhe ta resa e Rosario.
Mi ta kòrda klá kon na un di e Rosarionan ei un mucha chikitu di 2 aña a kuminsa dirigi su mes na un hende kaminda e altá tabataku niun otro hende presente no por a mira.
Tur hende a asumi ku ta spiritu di e defuntu.
Danki Percy.