Dia 18 di febrüari 1916, Alfredo Capello a lanta e pakus La Bonanza na skina di Plasa Brion/Breedestraat Otrobanda. E edifisio aki tabata propiedat di otro hende i manera por a spera, un dia doño a pidi su lugá bèk. Mesora a kuminsá buska, i nan a bin haña e konosido La Bonanza den Otrobanda. Lamentablemente Alfredo Capello (tata) no a drenta e negoshi den Otrobanda nunka.
Ainda mi ta mira e edifisio aki mi dilanti, abou tabata e negoshi i ariba e kas di famia. Tabata na 1935, ku e konosido Alfredo Capello a drenta La Bonanza komo manager. Ekonómikamente kos no tabata dje bon ei pa e negoshi, pero tiki tiki kos a kuminsá drecha. Frater Candidus tabatin representashon di un fábrika di instrumènt di müzik, ku el a pasa pa La Bonanza ku un aña despues a kuminsá bende disko i diferente otro merkansia. Djei padilanti, La Bonanza a kuminsá krese i mi ta kòrda kon anochi nos ta keiru i pasa wak e trazjètnan.
Na desèmber 1960 e rumannan a lanta La Bonanza Punda i segun informashon, La Bonanza Punda a habri un sukursal na Aruba i na 1964 a habri unu den Winkelcentrum Colon, ku despues nan a sera na 1968 pa motibu ku e no a deha. Na 1986 La Bonanza Punda a stòp ku su aktividatnan i debí ku entre otro Lago a bandoná Aruba, mester a sera e sukursal di La Bonanza riba nos isla ruman.
Na 1970 e mama di e rumannan Capello, fundador di La Bonanza a muri i na 1989 e ruman Abram tambe a bai sosegá. Por sierto ku Abram Capello tabata tokadó di fió/akordeonista i huntu ku Pierre Lauffer i Luis Daal i tabata toka den Zakitó.
Komo mucha, sirbiendo misa na Coromoto, mi ta kòrda e kantika di misa “Oh Santu Altar”. Kada bes ku e zona na radio, ta pasobra risibimentu ta na kaminda i e kantika tabata optenibel komo disko 45 na La Bonanza. Banda di esei, La Bonanza tabata bende tur sorto di otro kos relashoná ku risibimentu, inkluso e beker i kuchara di plata riba ku ta graba bo nòmber i ku bo ta haña komo regalo dia bo risibí. Por sierto ku e regalonan akí tabata prònk den kashi. Tambe komo hóben den patfenderei, den La Bonanza bo tabata haña diferente artíkulo pa patfender.
Despues komo teenager mi bishitanan pa La Bonanza tabata bira mas frekuente, pa motibu ku mi mester a bai kumpra disko 45 ( 2,25 florin) pa mi rumannan muhé ku tabata keda serka mi wela i madushi den Kortijnweg. Tabata e tempu ei tambe, ku mi a deskubrí La Bonanza komo un di e promé lugánan kaminda bo por a bishitá un diskobar i bo por a skucha piesa via di “koptelefoon”. Semper pa mi tabata un fiesta, un plaser di drenta den La Bonanza i bai diskobar kaminda Edna Kirindongo tabata yuda mi i despues ku basta ratu mi a sinta skucha muzik, ta bisa mi ku ta basta i ku mi mester duna otro hende un chèns (e damanan akí a traha sigur mas ku 40 aña na La Bonanza).Te despues ku mi tabata traha na Radio Hoyer i despues CUROM, mi a keda fiel na La Bonanza i mi tabata riba nan lista di kliente ku tabata haña un yamada ora disko nobo drenta òf ora mi bestelling drenta. Serka amantenan di muzik, e dos damanan akí tabata bon konosí. Mi a haña spòt pa pasa den mi programanan i nan tabatin komo slogan: “La Bonanza, bo pakus di konfiansa”.
Julian Coco den La Bonanza – Foto Archivo Nashonal
Mi tabata bishitá La Bonanza tambe pa motibu ku e tabata bende instrumènt, no ku ami tabata toka ningun instrumènt, pero hóbennan tabata bishitá La Bonanza, spesialmente La Bonanza Punda ariba, kaminda tabatin diferente instrumènt di showcase i ku músikonan por tèst nan i toka riba e instrumèntnan. Semper bo tabata haña diferente integrante di bitbènt ku ta pasa i no ta realmente tèst, pero tabata simplemente satisfasé nan deseo di toka maske ta un ratu riba e òrgel/kitara/piano ku La Bonanza tabata ekshibí.
La Bonanza fuera di tur esaki tabata konosí tambe pa benta di angua pa tokadisko, e mihó anguanan ku bo por a haña tabata den kolekshon di La Bonanza i e mihó konosementu di e produktonan aki tambe.
Un hòmber ku kurason pa Otrobanda.
Alfredo Capello tabatin un amor spesial pa Otrobanda i tabata un berdadero tata pa personal di e negoshi. Na 1974 el a asta lanta un “Spaarfonds La Bonanza Otrobanda” ku e tabata finansiá kompletamente, depositando tur aña un suma pa empleadonan ku a yega 10 aña den servisio i e suma ta krese segun e kantidat di aña den servisio ta oumentá. 37 Aña largu e tabata miembro i presidente di SKO (Sosiedat di Komersiante di Otrobanda). El a bringa duru pa Otrobanda haña rekonosementu i tabata motor pa trese Pòstkantor, Banko i Eilandsontvanger den Otrobanda. Despues di 30 di mei 1969 el a bringa tenas pa rekonstruí Otrobanda.
Den febrüari 1991, den un forma grandi ku un tremendo fiesta a selebrá 75 aña di La Bonanza den Caribbean Hotel. (mira reportahe di Alex Alberto (https://www.youtube.com/watch?v=QrpH1X-j2Fc),
E trabounan di La Bonanza el a pasa pa su kasá, su yu muhé Louise i su yu hòmber Chris. Na 1992 Alfredo Capello a stòp ku su trabounan na SKO i 11 di yüni 1992 Alfredo Capello a bai sosegá. Ta manera a saka e kurason for di La Bonanza. Den aprel 2005 La Bonanza a sera su portanan definitivamente despues di 89 aña.Mi ta kòrda tambe, ku un tempu e kaya pegá ku La Bonanza tabata yama Kaya La Bonanza i a kambia esaki pa Boudewijn Hendriksteeg. Ken ta Boudewijn Hendrik?
Percy ya bo sa, bo tin mas trabow pa logra pa nan kambia e nomber dí e kaya hasïe Kaya La Bonanza bek.
Recordar es vivir! E señora Nena Quandus ku tabata traha na kassa tabata mi madrina.Aunke e tempu ei mi tabata mucha ahinda mi ta korda ku ora mi tabata bai Punda of Otrabanda mi no pora keda sin pasa kuminda mi madrina den La Bonanza. Mas ku klaro tambe pa sinta skucha musika na e diskobar bai gool.E personal i e doñonan di La Bonanza a tratami semper hopi bon. Dushi rekuerdo sigur!!!
Ami a traha na La Bonanza na 1966 un par di luna , pa pone na orden e magazijn . La verdad es que habia un montón de artículos que no estaban ni registrados . Un autentico desastre . Pero al final mi a queda satisfecho ku mi trabao y el señor Capello támbe.E magazijn a queda na orden completu.
Great. Mi ta Korda kon den December mi tin ku bai waak nan showcase ku mi mama prome mi skibi mi karta pa sanikolas.
Master hopi bunita pa lesa i saaa
Bunita nomber tmbLa Bonanza petje af pa bo
Bunita rekuerdo Percy. Segun mi den a ‘facade’ di La Bonanza tin/tabatin un plachi di bròns riba kua tin figura di un persona. E tei ainda?
Ik heb het niet kunnen lezen, maar La Bonanza Punda is in de jaren dat ik op Curaçao was mijn favorite grammofoonplaten supplyer met Gedul en Margriet achter de toonbank.
Mvg
André de Groot (oud medewerker Radio Hoyer 2)
Bunita rekuerdo, Percy a rebiba. Mi tabata bishita La Bonanza ku mi Mama ku regularidat.
Despues mi tambe a sigui hasi kompra einan.
Mi ta korda di a bai La Bonanza komo mucha, lesando, mi a bin realisa mi mes ku ta ku mi rumannan mi tabata bai, entre otro pa kumpra angua pa tokadisko pero tambe pa skucha muzik na music bar. Ei tabata prome biaha ku mi a maak e mee. Anto mi ta korda manera ta ayera kon mi a bai papia ku e headphone riba mi kabes, anto realisa despues ku tur hende a bira wak mi komo ku ta grita mi a grita. Dushi rekuerdo!
Hopi bunita
Hòmbu Percy bo ta ponemi korda kon nos ta bai test/toka kitara na la Bonanza. Mayoria di nos instrument di The Dragons tabata di La Bonanza. Dushi tempu🤗
Danki pe info. Interesante. Mi tambe a bsi bèk den tempu kon mi tabata bishita La Bonanza pa kumpra disko.
Ta ken por lubidá La Bonanza. Un di nos tesoronan. Bunita publikashon. Danki.
Ta trese recuerdonan bunita.
Hopi…. bunita historia di La Bonanza. Bo ta bai bek gewoon den tempu. Aunke mi ta un poko mas hoben e tempu ey, pero ku un bouwjaar ku ta rekonose un gran parti di bo historia. Masha Danki pa komparti i sigi Eduka nos.
Hopi great. Recordar es vivir!