Ántes bo mester a kumpli ku kuaresma, pasobra si bo no a kumpli ku kuaresma, òf manera tambe tabata bisa: “marka buraku”, ta nifiká ku si bo mester muri no tin santana pa bo, p’esei mester marka buraku den tempu di Kuaresma, loke ta meskos ku “bai konfesá”. Iglesia Katóliko tabata husga, ku pa un hende por risibí dignamente, si e tin loke nan ta yama piká mortal, anto e mester konfesá promé ku e bai risibí. Komo ku mester  risibí den tempu di Pasku nan a yama e obligashon akí “kumpli ku kuaresma”(en bes di kumpli ku Pasku), pasobra ta den kuaresma generalmente hendenan tabata konfesá na gran kantidat. I pa por tabatin kòntròl,  tabata skirbi nòmber di hendenan ku bai konfesá. Den archivo di parokia, nos a haña bou di rubriká “paschantes” di Misa di Grootkwartier, lista di esnan ku a “kumpli ku kuaresma”. Awendia no tin e asuntu aki mas. Hendenan mashá poko ta konfesá i kasi bo no ta mira konfeshonario mas den misa. Hopi kos a kambia. En bes di apstinensia, e temporada di Kuaresma a para bira un temporada di goso, barbecue kant’i playa i tur otro sorto di fiesta.

Nos sa kaba ku kuaresma ta un tempu di preparashon. Preparashon pa e fiesta grandi ku ta Pasku di Resurekshon. E preparashon akí ta dura mas o ménos seis siman, ku ta basá riba kuarenta dia di Beibel. Ántes ayá tur dia den kuaresma hende grandi i salú tabata yuna, kier men un bia pa dia so nan tabata kome nan barika yen, anto tur djabièrnè nan tabatin dia di apstinensia, kier men nan no tabata kome karni. Esaki tabata un obligashon. Despues iglesia Katóliko a kita e lei pisá akí. Awor no tin obligashon mas, pero kada hende ta disidí pa nan mes kon nan ta prepará nan mes pa Pasku. Solamente djárason di Shinishi i Bièrnè Santu ta dianan di apstinensia obligatorio.

Komo sirbidó di misa mi ta kòrda e tempu aki na misa di Coromoto. Pastor Wim Ellis ta pinta e periodo akí, komo un periodo serio i ku penitensia den e temporada akí tabata indispensabel. Bida i e kaminda di krus di Kristu mester sirbi komo e guia den e periodo di Kuaresma. Tabata konosí ku asina bo a risibí Santa Komunion, bo tambe ta drenta grupo ku mester hasi penitensia.

Mi sa ku den temporada di Kuaresma, nos tabata kome ménos i ku por ehèmpel riba djabièrnè no tabata kome karni, sino piska, òf kome funchi ku yògùrt, funchi ku suku, kalmèki, bòkel, bakiou, sòpi tamarein, sòpi guyaba, etsera.  Awor na grandi ami ta kuestioná e sistema akí, ya ku mi ta gran fanátiko di kuminda di laman i pone preferensia riba kuminda di laman ta muchu mas atraktivo pa mi i e idea di apstinensia ta bai pèrdí. Den periodo di Kuaresma, hende ku gusta bebe bibida alkohóliko, ta bebe ménos, òf asta apstené di bibida alkohóliko. E tempu ei, bo no tabata haña fiesta den temporada di Kuaresma. Awor aki bo ta haña tur sorto di aktividat i diferente aktividat di seú den e temporada. Festival di Curaçao BlueSeas ta tuma lugá riba Bièrnè Santu.

E último siman di Kuaresma ta kuminsá ku Doming’i Rama. Ántes, i te ainda den algun parokia, bo tabata haña un rama di palma bendishoná. Hendenan tabata bai kas ku esaki i traha un krus ku ne i hopi biaha tabata kologá e krus riba porta. Djaweps Santu nos tabatin un sakrifisio di misa i pastor Wim Ellis tabata laba nos pia, meskos ku Kristu a laba pia di su disípulonan.Despues ta sigui segun mi e dia di mas importante den Semana Santa, ku ta Bièrnè Santu. Sigur ántes e tabata e dia mas signifikativo di e siman, kuminda di mèrdia tabata sobrio, i tabata un dia mashá ketu, no tabatin transmishon di radio, si tabatin mes tabata despues di 3or ku músika adaptá i kasi no tabatin tráfiko riba kaya. Komo sirbidó di misa nos tabatin un dia largu, ya komo pa 3or tabatin kaminda di krus i asta nos a tipifiká esaki komo un kaminda di krus solèm, ya ku e tabata dura bastante largu, pasando tur 14 stashi i resando na tur.
Kasi tur toko, supermarket i otro tiendanan tabata será. Awendia, Kòrsou su hendenan ta demostrá nan abilidat kulinario riba Bièrnè Santu i tur kaminda tin invitashon pa bin saboriá rikesa di laman. Nos hóbennan ta kant’i awa ku barbecue i muzik duru, tin diferente kòntèst di fli, otronan a subi laman i Dios sa ki otro aktividat tin riba e dia akí, ku tabata un dia di trankilidat i pas.

Elsa mi mama a siña nos, ku riba e dia akí nos no ta bai ningun aktividat, no ta bai landa, ni nada di den bario i ku nos ta keda kas i no ta sende radio na  kas tampoko. Por sierto ku riba e dia akí no tabatin bochincha na kas tampoko. E tabata bisa nos, wak lo boso ripará kuantu kos ta pasa ku hendenan “barika yen” ku ta hasi diferente aktividat i otro kos riba e dia akí. Por sierto ku kada aña di nobo bo ta tende despues di amigunan ku a kibra pia durante wega di bala, hogamentu, aksidente di outo i diferente otro insidente mas. Ami te dia djawe Bièrnè Santu ta un dia di reflekshoná, i mi ta sinta na kas, lesa i traha na kòmpiuter.  Mi no a bai ningun edishon di Curaçao BlueSeas festival riba Bièrnè Santu i mi a pèrdè un biahe pa Cuba pa konsierto di Rolling Stones pa motibu di mi prinsipio.

Despues di Bièrnè Santu ta sigui Sabadó Aleluya i parokianonan tabata bin misa ku un bòter i pastor tabata parti awa bendita. Despues di aña esaki tambe a kambia i bo mester a bin ku bo bòter ku awa aden anto pastor ta bendishoná e awa. Esaki tambe a bai pèrdí awendia.

Djadumingu Pasku di Resurekshon tabata un dia di famia, despues ku nos tabatin un selebrashon grandi Sábado Aleluya, pa bin kontra Pasku di resurekshon. E selebrashon tabata den famia, bebiendo sòpi i komiendo kabritu fresku. Awe, tur restorant i hotèl tin menú di Pasku di Resurekshon.

Durante aña, selebrashon di Kuaresma, bai kue Pasku di Resurekshon a kambia drástikamente. E sentimentu katóliko kasi no tei mas. Pa nos hóbennan prinsipalmente, ta bon pa nan ta na altura di e asuntunan akí. Ami no ta profesá fe katóliko, pero tin prinsipio ku mi a keda ku ne te dia djawe i ku mi no ta mira motibu pa desviá di nan.

Delaster biaha kisas ku hopi di nos a enfrentá silensio, tabata ku temporada di COVID. Pa algun hende esei tabata un bendishon i pa otronan un desaster. Mi kier invitá bo disfrutá di e silensio di Bièrnè Santu i ripará ku esei ta mas ku silensio.

Het schoonste geluid ter wereld is stilte (R.S. Hichens)