Si bo puntra kualke hende riba kaya kiko ta hasi Kòrsou úniko, nan lo bisa bo: nos músika, nos arte, nos idioma, nos kushina. Nos ta un isla ku ta respirá kreatividat. Pero, ora nos wak kon nos ta trata nos edukashon artístiko i maneho kultural den pasado i te dia djawe, nos mester bisa ku nos a trata nos kultura semper manera “yu djafó.”
Akademia di Arte: Posishon i Pleitu
Ban bèk den añanan 60. Si bo tabata ke siña arte, bo mester a bai tuma lès priva den un di e tayernan (galeria/atelier/gallery) di un artista. Ántes, muchanan ku tabata kier studia arte tabata bula di un galeria pa otro, sigui lès di un maestro aki, un pintor aya, sin un rumbo kla, sin un sistema.
Tabatin diferente galeria, tayer di artista, ku tabata duna lès/kurso di arte na tur sorto di hende. For di dékada 50 mi a mira nòmber di galeria den korant, pero hopi biaha tabata lugánan kaminda artista tabata bin eksponé nan obra i masha poko biaha tabata pa duna lès. Hopi biaha tambe, tabata artistanan djafó ku tabata eksponé nan obranan. Pa menshoná algun: Galeria Artis (1959), Galerie van Rossum, Galerie de Tèmpel, Galeria Bloemhof, Hart’s Gallery, S-Galerie, Galerie D’Oranjerie, The Studio di Stanley Braafheid, Fine Art Gallery,Galeria Kas di Kultura, Snip Gallery, Project 3 Gallery i e konosido Galeria Alma Blou, ku resientemente a sera su porta na Lanthùis Habaai.
Galeria Alma Blou i Lucette Verboom
Akademia di Arte mes a nase den tempunan di turbulensia. Eddie Ayubi i José María Capricorne tabata e promé direktornan. Dos visionario, dos hende ku tabata kere den hóbennan i den poder di arte pa forma un pueblo. Pero nan lucha no tabata fásil. Ayubi a retirá pa motibu di problema i pleitu, Capricorne a bai Hulanda despues ku no por a yega na akuerdo ku su kòntrakt i despues di basta lucha a yega na akuerdo, i asina nos Akademia di Arte a keda chambuká, sin stabilidat, sin direkshon fiho i mas ku tur kos, konstantemente mester a bringa pa fondonan nesesario pa por a organisá Akademia di Arte. Un lugá ku mester a bira kas di inspirashon, formashon i kreashon, pero ku, fuera di e artista mes, poko hende realmente tabata mira su balor. Jose Capricorne a keda direktor te mas o ménos 1988 i despues Elfried “Fifi”Allee, ku tabata dosente na Radulphus College a bira direktor.
Historia di Akademia di Arte ta un refleho perfekto di kon nos ta trata arte. E tabata yen di talento, pero rondoná pa konflikto i falta di rekurso. Nos a konosé figuranan ikóniko manera José Maria Capricorne i Eddie Ayubi komo direktor. Pero e lugá no a konosé pas i trankilidat.
E Edifisionan? Wèl esei tabata un tristesa. Akademia di Arte nunka no a haña un “kas” digno. Promé, a hinká Akademia di Arte den e edifisio di Quarantaine na Mundu Nobo (iróniko, tòg? Komo si fuera arte ta un malesa ku mester a isolá). Despues, Akademia di Arte a muda pa St. Thomas College bieu, banda di Sehos. Edifisionan kaminda kondishon tabata leu for di ideal pa inspirashon.
Deporte vs Kultura: Ken ta Gana?
Un otro doló di kabes históriko tabata sèn. Pa dékadanan largu, kultura i deporte tabata kai bou di mesun saku di plaka (supsidio). Pero ora parti e bolo, kasi semper deporte tabata haña pida grandi, i kultura mester a konformá ku wiriwiri.
Polítikamente, kultura no tabata trese voto, i p’esei no tabata haña atenshon. Tabata e artistanan so, “soñadónan,” ku tabata lucha pa e kousa. Niun hende otro, ni polítika, ni sektor privá ta parse di komprondé ku un pais sin kultura ta un pais sin alma.
Maneho Kultural
Na 1980, a parse ku nos lo a haña un apertura. A bin ku Manifiesto Kultural 1980. Palabranan bunita, promesanan grandi. Pero kiko a pasa kuné? E la keda te palabranan bunita.
Awe, mas ku 45 aña despues, situashon no a kambia masha. Nos ta na aña 2025 i ketu bai Kòrsou no tin un maneho kultural ofisial. I no ta pasobra no tin plan. Dr. Rose Mary Allen, un di nos baluartenan intelektual, a traha un konsepto di maneho kultural basta aña pasá kaba. Un plan bon hinká den otro. Pero, kiko a pasa ku e plan ei? E ta drumi den lachi. Dikon? Simplemente pasobra ta “e gobièrnu anterior” a pidi pa traha esaki. I na Kòrsou, nos tin e mal kustumber ku si un idea no ta bin di “mi partido” òf “mi ministerio,” nos ta benta e plan afó, maske kon bon e ta pa pueblo.
Ku seramentu di Akademia di Arte a keda un bashí enorme ku no a logra yena. Ophetivo di un Akademia ta mas amplio ku dunamentu di un kurso so. Tempu ku a sera Akademia di Arte Papy Adriana, pintor, a lanta un Akademia pa Arte Visual Adriana(awor: Adriana’s Academy of Art & sciences Foundation), ku e meta pa yena e bashí ku a keda. Su intenshon tabata pa duna kurso riba tur otro tereno di arte visual, entre otro fotografia, arte ku medionan digital, instalashon, bròns i klei. Pero último añanan Papy a konsentrá riba su kursonan di pintamentu. Durante 20 aña Papy su akademia a superá 1200 studiante. E akademia tabata situá primeramente na Seru Loraweg, banda di misa di Pietermaai i awor na Regina Pascis skol na Sta.Rosa. Bo por kasi bisa e úniko instituto ku ta respirá arte.
Konklushon
Nos ta broma ku nos artistanan ora nan triunfá den eksterior. Nos ta bati pechu pa nos kultura. Pero historia di Akademia di Arte i e plan maneho (skondí) di Rose Mary Allen ta siña nos un lès duru: Si nos no stòp di trata kultura komo un “hòbi”, nos lo sigui kana rònt manera un kurpa sin spiritu.Ta tempu pa saka plannan for di lachi i duna arte e rèspèt ku e meresé.