Helma Maduro-Molhuizen, den “Archiefvriend di sèptèmber 2006, jaargang 12, nummer 3”, tabatin un artíkulo interesante tokante e prekursornan di Sentro Pro Arte. E historia di teater nashonal, kada bes di nobo ta lanta kabes.

Den su buki “Honderd jaar Muziekleven op Curaçao” Rudolf Boskaljon ta konta di e bida musikal di Kòrsou, di entre 1850 pa 1950. Mas ku un siglo promé ku Sentro Pro Arte a habri porta na 1968. Den edishonnan di korant mas bieu (1834) bo por lesa ku Kòrsou tabatin aktuashon di orkestanan djafó i tambe grupo di komedia tabata aktua riba nos isla. Mashá poko biaha mi a lesa na unda nan a aktua. Hopi biaha tabata grupo ku tabata di tránsito aki na Kòrsou. Rudolf Boskaljon ta papia di un konsierto na aña 1850 i komo ku no tabatin un teater òf un sala di konsierto, e grupo a aktua den Hotèl Concordia, ku tabata situá kaminda awe e ofisina di duana ta. Rudolf Boskaljon for di e tempu ei tabata papia di e nesesidat di un teater kaminda orkesta por a aktua i tambe gruponan di komedia. Den e buki Rudolf Boskaljon no ta papia mes di orkesta lokal moderno. Kier men ta papia mas tantu di músika klásiko i ópera.

Na 1860 a kuminsá formashon di diferente grupo musikal i tambe kapèl militar na Kòrsou.  Nos, den e tempu ei a haña bishita di hopi orkesta grandi i tambe Kòrsou a konosé su promé orkesta di instrumènt di arko.

1871 tabata un aña grandi pa bida kultural di Kòrsou ora ku Jacob J. Naar a traha un teater riba su propio kuenta. Tokante e lugá presis kaminda e teater aki tabata te ainda tin diskushon. Ántes e tabata den lugá kaminda ofisina bieu di finansa tabata. No tin adrès menshoná ningun kaminda. Orkan a destruí Teater Naar i despues a rekonstruí e teater i na 1921 e teater a kambia nòmber i bira Teater Americano, ku a haña funshon di teater di sine tambe. Ópera tabata hopi gustá e tempu ei i Teater Naar tabata lusi ku e presentashonnan akí.

10 di yüni 1882 tabatin apertura di “Buitensocieteit” na De Ruyterkade, skina Bakkerstraat. E klup aki na 1884 a kambia nòmber i bira “Salòn Capriles”. Den e temporada akí, e orkestanan musikal di garnizun i skùterei tabata aktua regularmente. Nan tabata aktua den e kiosko dilanti di kas di Gobernador. Na 1898 na okashon di un fiesta pa su mahestat Reina Wilhelmina a inougurá e kiosko riba Brionplein, dilanti di Hotèl Americano. Despues a konstruí un kiosko tambe na Concordia- i Wilhelminaplein. Despues di e atentado di Urbina, e kiosko dilanti kas di Gobernador a muda bai Otrobanda i algun aña despues, pa motibunan di tráfiko a kibra e kiosko dilanti Hotèl Americano. Na yanüari 1937, pa honra J.P. Boskaljon a traha un kiosko nobo i e kiosko aki despues nan a kita i poné den kura di Museo.
Te 1900 ainda tabatin diferente presentashon den Teater Naar, pero ku frekuensia tabata presentá aktuashon musikal i komedia den edifisio “Kransje” na Otrobanda. Tambe tabata hasi uso di salanan di “Club de Gezelligheid”, “Loge de Vergenoeging”i tambe den klup na airu liber di Salòn Habana, ku despues a bira Cinelandia. For di e tempu ei, tabata hasi uso di Kèrki Protestant pa algun konsierto chikí i te ainda esei ta e kaso.

Na 1895 bou di direkshon di Rebecca Cohen Henriquez a funda klup “Entre Nous”. E klup di dama akí, a bira konosí pa su suare. E klup tabata anunsia nan aktividatnan na franses i tabata presentá e obranan na spañó i hulandes.

Dianan di fiesta bandanan manera Harmonie Sta. Cecilia, Excelsior i esun di Skèrpènè tabata presentá repertorio musikal ku un konsierto (suare) na diferente parti di stat, pero parse e lugá ku mas ambiente tabata Awasá di Otrobanda, pa ser eksakto Plan Mulina (Molenplein). E tempu ei un aktividat ku tabata pone mas hende sali for di kas ku ningun otro tabata suare. Yònkumannan tabata usa e úniko okashon akí pa por mira e señoritanan ku nan tabatin bista riba dje. Pero e señoritanan semper tabata kompañá pa sea nan grandinan òf un shaperon, ku por a bai bisa tur kos ku e a mira, yònkumannan por a para mira so. E damanan tabata kana keiru na Awasá, opservando e kabayero ku nan ta atmirá, huntu ku nan amiganan.

Na 1921 klup “Asiento” ta habri su porta na Negropont i aki tabatin aktuashon di orkestanan ligá ku kompania di zeta, orkesta lokal i internashonal.

Teater Naar a bira chikí i no tabata adekuá mas pa orkesta i grupo di komedia grandi i ya na 1892 a nase e idea pa bin ku un Teater Nashonal. Ta despues di 26 aña (1918) nos a bolbe mira bida den e asuntu aki, ora ku un komishon a bolbe lanta e idea aki for di suela. “De Curaçaosche Schouwburg Maatschappij” tabata tras di e ideanan akí i porfin na 1930 a realisá e soño pa traha un teater nobo na e lugá kaminda ku Teater Naar tabata. Segun un diseño di e arkitekto Puerto Rikeño Luis Perrocier, riba 7 di novèmber 1931 e Teater Nashonal a bira realidat.
Pero promé ku esaki na 1930 a inougurá tras di Hotèl Americano den Otrobanda Teater Brion. E komité di Dama di e grupo di komedia “La Charite” a logra haña fondo pa kumpli ku e proyekto di Pader Koenen. E arkitekto tabata Werner.

Banda di evento kultural, tabata usa e teater aki tambe hopi pa evento sosial, manera reunion i otro aktividat. Teater Brion a resultá un teater di pueblo, ku tabatin un bon akohida, e teater tabatin un bon akústiko. Na 1949 orkesta Filarmóniko di Kòrsou a duna un presentashon den Teater Brion i tabatin splikashon na papiamentu. Tabatin bastante interes pa esaki, pero a keda na solamente un biaha, ya ku e teater mester a sera su porta, pa motibu di ekspanshon di e skolnan den besindario.

Miéntras tantu, Teater Naar ku a bira Roxy tambe a konosé su fin, pa motibu di un kandela. Nos mester a warda te 1968 ku Sentro Pro Arte a habri su porta.

Manera apuntá mas ariba, kasi nada mes a menshoná di nos banda i orkestanan popular lokal.

Den e siguiente artíkulo mi lo elaborá kon Dugo Schenker, Moi Galante, Eddy Pieters, Chu Thielman, Moi Borgschot i Romualdo Hanst tabata organisá nan eventonan i tambe kon Sentro Pro Arte a sera su porta i a kima i te awe 2024 e ruina t’ei pará.