Luna di yüni 2024, mi a dediká, den kuadro di selebrashon 70 aña Radio Hoyer, e programa Memoria di Pueblo, un luna largu na Pierre Lauffer, un hòmber ku su intenso amor pa “kara, kos i kaso” di su tera ta bisto den e ekstenso obra literario ku el a laga pa nos. Un hòmber ku semper tabata preokupá ku e rumbo ku papiamentu mester tuma. Di tantísimo programa ku mi a presentá, esaki a yena mi ku gran satisfakshon mashá grandi. Mi a haña hopi reakshon, i e reakshonnan akí tabata relashoná ku rekonosementu di e trabounan sin igual ku Pierre Lauffer a realisá pa su Kòrsou. Kiko a hasi pa Pierre, unda tin un kaminda, plenchi, hanchi, kaya dediká na e gran Yu di Kòrsou akí. Mi a keda debe tur un kontesta.
Basta siudadano a haña un kaya, un bulevar òf un plasa na nan nòmber, pero for di 1981 ku e poeta mas grandi ku papiamentu a konosé, Pierre Lauffer, a bai sosegá, gobièrnu no tin fin di dun’é e honor ku e meresé. Hopi hende ku awe ta skibi den i di papiamentu, ántes tabata alumno di Pierre Lauffer, òf danki na Pierre Lauffer a haña amor pa papiamentu.
Na yüni 1993, Stanley Cras a skirbi den su revista Independiente (página 23): “Asta Wilhelminaplein ta poko P’é”.
Na 1982, Direktiva di Skolnan Katóliko a disidí di kambia Mgr. Zwijssen College ETAO den Pierre Lauffer College. E skol aki awor yama Kolegio Pierre Lauffer i ta situá na Djónoramarthaweg.
Amsterdam a disidí di duna 27 kaya den un bario nobo (wijk Centrumeiland) nòmber di hendenan prosedente di Kòrsou, Antia, Sürnam i Indonesia. Entre e nòmbernan tin esun di Pierre Lauffer. E bario lo ta kla na 2026.
https://www.nhnieuws.nl/nieuws/248683/straten-van-nieuwe-wijk-in-amsterdam-worden-vernoemd-naar-strijders-tegen-de-slavernij
I miéntras tantu na Kòrsou, nada, ningun kaya, ningun plenchi, ni un busto (den Biblioteka Nashonal tabatin un busto di Pierre Lauffer),nada. Pierre Lauffer i famia a biba na Juan Domingo, Boerhaavestraat 7. (Herman Boerhave tabata un médiko Hulandes ku a biba di 1668 pa 1738).
Awor hustamente den e aña ku Pierre Lauffer a muri, 14 di yüni 1981, un par di luna despues, Gobièrnu di Kòrsou, a disidí di nombra e plenchi, djis algun meter for di Boerhaavestraat kaminda Pierre Lauffer a biba, plenchi Andres Bello i a prònk su busto riba dje.
Andres Bello tabata un persona hopi konosí den nos region i na mundu, poeta, eskritor, hurista, periodista Venezolano. Ku basta fanfare i ku un invershon di 300 mil florin prosedente di Venezuela a realisá e proyekto akí, kaminda na Brievengat ya kaba nos tabatin Andres Belloweg. Pero parse ku e venezolanonan a yega Kòrsou i nan a bai wak e plenchi na Brievengat i no a haña esaki adekuá pa e busto di Andres Bello.
Awor, kiko Andres Bello a hasi pa Kòrsou, pa meresé un plenchi ku su busto riba dje?No ta basta ku nos tin un Andres Belloweg kaba? Tambe nos tin (tabatin) un “Centro Cultural de Bolivar y Bello na Martin Luther King Boulevard. E lugá aki no tabata mas mihó pa e honra NOS Pierre Lauffer?
Si nos tira un bista den nos region, nos ta ripará kon den diferente pais ta honra nan héroenan. Aruba por ehèmpel: Plaza Henny Eman, Monumento 18 di mart, Plaza J.E. Irausquin, Plaza Libertador Betico Croes, Estatua di Boy Ecury i Plaza Daniel Leo. Fuera ku esaki ta un bunita bista, e ta hasi e konsenshi patriótiko di e pueblo krese tambe.
Na 1981, pa motibu di e busto di Andres Bello riba e plenchi banda di Grand Central, e Yu di Kòrsou a lanta un ratu for di e soño letárgiko ku e tabata aden i kuminsá reklamá su lugá. Tabatin basta protesta kontra di e desishon, pa pone e busto di Andres Bello na e plenchi ei. Pero banda di Pierre Lauffer, tin mas personahe di nos literatura ku tabata meresé un lugá promé ku Andres Bello.
Busto Andres Bello
Lamentablemente, despues di tur protesta nos a bin kustumbrá manera semper ku e plenchi Andres Bello, i despues na 2005 nos a haña un Plaza Hariri. Mesun pregunta: kiko Hariri a hasi pa Kòrsou, pa meresé un plaza na su nòmber? Atrobe tabatin basta protesta. Pero finalmente nada no a sosodé.
Komishon Nòmber di Kaya Kòrsou tin e tarea di duna tur kaya, plenchi/plaza, parke na Kòrsou un nòmber adekuá. Kiko ta mas bunita ora nos duna nos kayanan, plenchi/plaza i parkenan nòmber di baluartenan riba tereno di trabounan sosial, deporte, muzik, literatura òf un otro logro ku kua hendenan a destaká. Esaki ta un honor pa e baluarte i su famia, pero tambe pa e abitantenan ku ta biba den e kaya ku a haña nòmber di e baluarte.
Tin un kantidat di bario nobo i naturalmente un kantidat di kaya, plaza i plenchi ku no tin nòmber. Na 2008 Gobièrnu di Kòrsou den un tiru a duna 40 kaya den bario di Oost Jongbloed , Liverpool, Bonam, Zuid-Bonam i Kirindongo Abou un nòmber di músiko lokal ku a destaká. E akshon aki por ripití tòg? Anto mester mantené e kaya, plenchi/plaza i parke tambe.
Ta den tur komishon tin pifio. Komishon pa Krus di Merito ta duna krus na hende ku ta haña pagá pa nan trabou “boluntario”. Hende ku tatraha pa iglesia di 2000 hende. Un persona ku tin 30 aña ta traha ku drogadikto ya pa aña nan NO ta konsideré.
Klaro ku bo tin rason!
Tur rason Percy. Enberdad tinku kuminsa eduka mandatario nan y e komishon. Konose bo isla su pasado pa bo sa su presente y unda nos ke bai.
Danki Percy,
Esta un bèrguensa mi ta sinti, mara den e aña aki esan responsabel por haña un luga prominente pa honra Pierre Lauffer ku un plenchi í un busto..
Mester eduka e mandatarionan. Ja (si nos tin suèltu anto) nan ta bin kompronde dikon nan tin ku kambia e
diskripshon di tareanan pa e komishon di nombramentu mester wordu adapta. Danki pa komparti!!!
Hopi bon Pipo,e titulo di e tema ta papia pa su mes.Nos ta broma ku otronan,i laga nos mes hendenan afo.Nos mes no ta balora nos mes hendenan.Nos bibioteka nashonal mester jama Pierre Lauffer .Punto
Danki Percy🤗
Mi tambe ta hanja mas ku justu ku Pierre mester wordu rekonose komo un baluarte e himber simpel y honesto ku turhende.
Percy bo tin hopi anja ta pidi pa e rekonosementú nan ey.
Segun mi mester eduka e hendenan ku ta pone nomber ken ta ken y ken tbta ken na Korsou sino otro biaha nos ta hanja nos ku plasa of kaya Putin.
Bos di Buriku por tarda, pero e ta yega shelu!
Aki na Korsou (segun mi) ta karese di maatstafnan obhetivo pa balora esnan ku a nifika hopi pa pais. Kisas mester funda un organisashon ku ta dokumenta informashon obhetivo/kennisentrum pa informa ministerio di kultura i edukashonnan di turno kada tantu tempu por evalua i balorisa esfuersonan hasi pa personanan pa nan pais i balora esakinan ku simbolo nan ku ta indika esaki na pueblo permanentemente (tambe hinka e inforashonnan aki den kurikulum eskolar)..
100% di akwerdo ku bo Percy.
Ami mes ta biba den un bario nobo ku nn a duna e kayanan nòmber despues di mas ku 5 aña ku nos tbt kavel no … nòmber di region/suidat na Italia… ta Mr. Google a bisami esey pasó esun di mi mi no tbt konosé
Rason Percy
Tristu esun nan ku tin ku duna Kaya nomber no tin un idea kon ta honra nos baluarte nan .
Konosiendo abo lo bo no laga Los na e tema aki
Kiko e komishon ta warda? Lesando e post aki un duele a drenta mi kurason. Ami ta kere nos mester lanta e eksigi alomenos ku nos ke mira e kambo.
Tristu, tristu, tristu i inkreibel. Ta prediká patriotismo solamente ku boka.