Un bon amigu di mi a kòrda mi, despues di a lesa e artíkulo “Bristol”, ku mi a lubidá di menshoná ku hopi hende tabata usa Bristol tambe, pa wak kua number ta sali e dia ei. Mesora mi pensamentu a bai riba buki di soño, konvoi, Madam Luna, programa astrológiko na Radio Hoyer i San Cono.

Den Klipstraat tabatin un tienda di We Pampuna (Shon We Evertsz), i komo mucha nos konosé e tienda aki ku tabata bende tur sorto di chochoria, nos komo mucha tabata kumpra “stinkbom”pa tira den klas òf den konvoi. Tur sorto di kos bo por a kumpra serka We Pampuna.

Manera algun grandi a splika mi, mas ariba den Klipstraat tabatin un señora ta biba ku nan tabata yama Madam Luna. Sintá bou di un lus dòf na su mesa ku ta tapá ku un paña lila i ku un hòmber bon nèrvioso sintá su dilanti.
“skohe un number”, Madam Luna  ta bisa ku bos suave. E hòmber ta pensa un ratu i ta kontesta: “shete”. Madam Luna, serando su wowo i hungando un komedia ta kontesta: “shete, bo a soña ku awa, no ta asina?”. E hòmber ta habri dos bala di wowo asina grandi i ta kontesta: “Si!”.  “Awa ta kambio. Kambio ta fortuna. Bo dia di suerte ta serka,” Madam Luna ta kontestá.
E hòmber ta sali ku un sonrisa grandi, i ku su pòtmòni un tiki mas delegá. Pero e ta bai ku algu mas balioso ku plaka: speransa. I speransa, mi amigunan, ta negoshi di siglonan.

Ami solamente tabata konosé e buki di soño San Cono, interpretacion de los sueños y otras combinaciones para descubrir su suerte, ku mi mama i riferonan tabata usa. San Cono ta mas bien un manual popular ku ta bisa bo, ora bo tin sierto soño kiko e soño kier men i kua ta e number di suerte korespondiente. Pa kasi tur hende buskando nifikashon den San Cono, e number di suerte ta esun mas importante.
E buki a bira popular for di siglo 19 i 20 ora loteria a kuminsá ekspandé na Latinoamérika. Pero interpretashon di soño ta eksistí for di milenio. Antiguo Egipto, Gresia, tur tabata tin nan propio “buki di soño”. Diferensia ta ku na sierto momentu un hende inteligente a bisa:
“Si nos pone number serka e soño, nos por hasi un tiki negoshi.” I asina tradishon a para bira negoshi.

Pronto Kòrsou tambe a kuminsá produsí buki di soño, ounke mi mester bisa, ku ami no tabata na altura di eksistensia di e bukinan akí. Klaro te ora mi a bishitá Biblioteka Mongui Maduro. I asina mi a sera konosí ku: Luna i Strea, buki di soño ku nifikashon i su number korespondiente, (L.I.S),Predikshon di soño i su number di suerte, S.M. Koko, Nos boeki di soño i Suerte, no. 1 i 2 di Marcolino Monte.

Algun ehèmpel: “CARSON: ora den nos sonjo nos ta mira un carson o hopi carson, esaqui ta nifica cu nos lo haya descanso y confianza. Numero di e sonjo aqui ta 01561.

“Adulterio: Soña di a ser tentá pa comete es crimen aki y di resistencia triunfante, ta ta intima coe lo bo prospera gozosamente 13743. Pero, si bo soña di culpable di e vicio, ta nifica un muestra tristu di cercano problema, mientras coe desesperacion ta troce bo curazon coe angustia 15530”.

Por sierto mi a hari lesando e tepnan balioso for di e buki Luna i Strea:
1.            “Kada hende tin su ora di suerte ku e mester kumpra loteria. Sea ta ora solo sali, ora solo ta riba nos kabes, ora solo ta baha, i ora ta anochi. Ta bon pa bo sa ki ora di bo ta.
2.            Kada hende tin su temporada di bon i mala suerte. Hopi ta esunnan ku ta kere ku e dianan di mala suerte ta mas largu. Esei no ta bèrdat. Loke ta pasa ku ora drenta e dianan di mala suerte hopi ta esnan ku no ta respetá e dianan ei e nan ta keda insistí ku nan mester gana. Bo tabata sá ku kada un di e dianan ku bo ta insistí e dianan di bo di malu ta oumentá. Ora bo no insistí e di  malu por dura te ku tres siman. Ora bo insistí e ta dura mínimo tres luna.
3.            Ora bo soño nunka no konta bo soño promé ku diesdos’or.
4.            Ora bo drumi mèrdia i bo soña, ta mashá poko biaha e sifranan di bo soño por faya den un loteria. Semper nan tin éksito hasi bon uso di nan.
5.            Si un hende papia den soño, si bo por tende kiko ela bisa ta hopi on. Bo tabata sa ku loke el a papia por laga bo gana sumanan grandi di plaka, ora bo kumpra e number ku ta korespondé na loke ku el a papia!
6.            Nunka no rabia ora bo lanta mainta i bo no ta kòrda bo soño. Mayoria bes bo ta kòrda despues di diesdos’or di mèrdia. Si bo no kòrdé e ora ei no insistí no ta kos ku bo mester kòrda.
7.            Bisa hende bo soño òf un number i e gana i e no duna bo nada for di e sèn ku el a gana por kousa bo suerte. Kuidou.”

Konvoi

Konvoi ta un sistema ku nan ta usa, ku ora bo mira un number ku a sali, bo ta wak ta kua number esaki ta yama. Por ehèmpel riba un konvoi bo ta haña 05 – 63 – 00, si 05 sali, e ta yama 63 i 00. Bendedó di number ta trata na influensia kumpradó, dor di kologá konvoi den nan ofisina i tambe pone publikashon, si bo soña ku sierto bestia òf ofishi, ta kua number bo tin di kumpra.

Hasimentu di aña.

Por último: mi a presentá serka Madam Luna i splika Madam Luna ku dia 5 di òktober mi ta kumpli 75 aña i puntra Madam Luna kua number mi mester kumpra i Madam a duna mi e siguiente pronóstiko: mi mester kumpra 74; mi edat bieu, 75 mi edat nobo, 80( mi edat nobo plùs 5 di luna), mi mester kumpra 05 tambe i 10 number di luna, mi mester kumpra 91(dia di luna, edat nobo, luna di aña i un pa mi mes), no lubidá mi number di kas 12. Esaki ta e kombinashonnan di dos sifra i mi ta haña algun tep pa 4 sifra tambe: 0575 – 1075 – 0574 – 1074 – 4975 – 4974 – a lo largu mihó mi kumpra di 00 te 99.

E Formulá sekreto

E sistema ta simpel: Hende tin problema, hende ke milager, bo duna nan un number i bisa nan “bo suerte ta serka”, nan ta kere. Si e number no gana, bisa nan “Bo no a interpretá e soño bon.” “Ora bo soña ku tres pushi, no ta 13, ta 39.” Semper tin un èksküs. Pasobra speransa ta mas dushi ku realidat.

No lubidá fecha di nasementu di Boy Thode, di Andruw Jones, kòrda number di outo ku a dal den bo hanchi kas, Lionel “Paps” Capriles i Angel Job nan fecha di nasementu i morto no por keda afó. I kumpra number ku OB, pasobra sin OB ta trese mala suerte.

Kualkier kos, atardi promé bo kumpra number, pega bo sigá Coronita òf Velasquez i wak den shinishi di e sigá, kua ta e number ganadó.