Mi ta kòrda ku mi grandinan tabata papia di “kachó sin banchi” refiriendo na un hende ku no tin famia, un yu ku no tin mama, etcetera. Pa straño ku ta parse mi no a haña e dicho aki den ningun buki òf dikshonario, pero mi ta sigur di a tende esaki na diferente okashon.

Un tempu na Kòrsou bo por a bisa muchu mas ku si e kachó tabata flaku, mansu òf agresivo. Si e tabatin un banchi bistí ku un “penning” chikí, di metal, ku un number grabá, komo prueba ku e kachó tin doño, i ku su doño a kumplí ku ordenansa di paga belasting pa e animal.

Dia promé di febrüari 1902 ofisialmente a introdusí na Kòrsou “Hondenbelastingverordening”. For di e momentu ei, tur hende ku tabatin kachó mester a paga un belasting anual. Despues di pago, e doño tabata risibí un “plaka di kachó”  ku mester a keda visibel riba banchi ku e kachó tabatin bistí. E tempu ayá, “plaka di kachó” tabatin nòmber di e doño riba dje, un lèter i tambe un number. Polis tabata kontrolá i konfiská tur kachó ku no tabatin “plaka di kachó”.

E idea tras di e lei akí tabata kla:
–           registrá kachónan;
–           fòrsa doño pa asumí su responsabilidat;
–           limitá kantidat di kachó sin doño riba kaya i naturalmente, pa haña un tiki entrada pa kaha di gobièrnu.

Polis tabatin outoridat pa hasi kòntròl riba kaya. Si nan topa un kachó sin “plaka di kachó”, i nan por a haña sa ken ta doño, e doño tabata haña un but. Den reglamentu original, e but máksimo tabata 10 florin, un suma ku pa e tempu ei tabata hopi sèn.
Pa hopi famia, esaki tabata un asuntu serio. No tabata solamente “mi tin un kachó”, pero “mi tin un kachó i e kachó tin banchi, refiriendo ku e kachó su belasting ta pagá.

Práktika diario: ontvanger,i kontrol

Tur aña, Amigoe di Curaçao tabata publiká anunsio ofishal, ku “plaka di kachó” tabata disponibel. Por a bai buska “plaka di kachó” na kantor di ontvanger òf na un kantor ouksiliar. Despues di un luna despues di anunsio, polis tabata kuminsá aktua. E “plaka di kachó” tabata un sorto di  “identidat” pa e kachó. Hopi hende ainda ta kòrda e zonido di e metal chikí ora e kachó tabata kore. E zonido ei mes tabata bisa: “E kachó akí ta legal.”

Pero no ta tur hende por a paga. Den bario mas pober, un kachó tabata mas un guardian, un kompañero. Apesar di e lei, tabatin hopi kachó sin “plaka di kachó”. Tin biaha polis tabata tolerá esaki i tin biaha no. Aplikashon di e lei tabata dependé di persona i situashon. E “hondenbelasting” no a eliminá e problema di kantidat di kachó riba kaya.

Na 1972, a stòp “Hondenbelastingverordening”. Sin masha buya, sin gran debate públiko. E plaka di kachó a disparsé, i obligashon legal di paga pa bo kachó a kaba. Dikon? Ounke no tin un motibu úniko den dokumentonan ku ta bisa “esaki ta e motibu”, mi por a komprendé e desishon den su konteksto:

• gastu atministrativo di kolektá belasting tabata grandi;
• entrada finansiero tabata relativamente chikí;
• No a resolvé problema di kachó sin doño.

Un problema ku no a disparsé

Despues di 1972, no tabatin “plaka di kachó”, pero kantidat di kachó sin doño a oumentá. Den añanan 80 i 90, problema di “zwerfhonden” a bira mas grandi. Kachó den skol, hòspital, i riba kaya grandi. Kachó ta morde hende i diferente otro aksidente di kachó.

Den 1991 a surgi diskushon pa re-introdusí “hondenbelasting”. E idea tabata: paga un montante chikí pa aña, ku un “plaka pa kachó”, pa finansa kòntròl i asilo. Pero e plan no a bira realidat.

Di belasting pa bienestar

Awor, e enfoke a kambia drástikamente. E diskushon no ta mas riba “kiko bo ta paga”, pero riba:

• sterilisashon;
• adopshon;
• kampaña di edukashon i konsientisashon;
• ròl di fundashon di kuido di animal;
• i responsabilidat moral di doño.

Un kachó awe no tin “plaka di kachó”mas, pero mester ta bakuná, mester haña kuido i atenshon. Polis no ta kore tras di kachó mas pa mira si tin plaka di kachó, pero komunidat ta buska solushon pa un problema ku ta durando ya pa vários generashon. Mira kon parlamento a aprobá “Lei Bienestar di Animal”, pero ainda nos no ta sinti nada di su efekto.

Analisando lei “plaka di kachó”, mi no ta mira solamente un lei bieu. Mi ta mira un spil di nos sosiedat. Un tempu kaminda a purba di pone órden via but i kòntròl. Awe, nos ta buskando mesun órden via konsenshi, edukashon i kuido.

E kachó (plaka di kachó), manera hopi kos riba Kòrsou, ta mustra nos kon lei, kultura i komunidat ta kambia, pero tambe kon algun problema ta sigui, sperando no un “plaka di kachó”, pero un kompromiso di nos tur.