Mi a yega di kòmbersá ku Philip “Fifi” Rademaker tokante masoneria, despues di a lesa un artíkulo den Èkstra, kaminda a entrevistá Fifi.
Logia Igualdat di masoneria ta eksistí e aña aki 171 aña. Manera ya mi a skirbi, ta un grupo ku tin komo lema, e man drechi no mester sa loke e man robes ta hasi. Nan no ta propagá loke nan ta hasi. Nan meta no ta solamente karidat i klup sosial. Tur hende ku ke ta un mihó hende por bira miembro, ounke pa bira miembro ta hopi difísil. Kada miembro mester tin un bon nòmber. Nan no ta invitá ningun hende pa bira miembro. Esun ku ke bira miembro hopi biaha ta un ku konosé un miembro i ta aserka organisashon kaminda e tin ku pasa dor di un skrutinashon masha riguroso pa mira si e persona ei realmente ta su deseo pa forma parti di masoneria. E persona ei finalmente ta bai dilanti di un komishon kaminda ta hasi pregunta i e votashon mester ta kompletu pa e keda aseptá den masoneria.

Tur siman Logia Igualdat ta habrí pa su miembronan. Nan ta sinta kòmbersá, dal un kòfi i ta papia di tur tópiko, ku eksepshon di polítika i religion. Logia Igualdat no ta un religion. Nan ta respetá tur religion. Ounke esaki no ta tur ora mi ta ripará di tur miembro. Nan miembro por ta e religion ku nan ke ta. Tin katóliko.protestant, budista i mas religion.Nan ta boga pa miembro ta honesto ku su mes i ku su kreensia.

Segun dokumentonan di René Römer, ta konta ku presishon kon logia a move riba nos isla, “freemasonery” na Kòrsou ta un historia di mas ku dos siglo. Nan rais no ta hulandes; nan ta di orígen ingles, i ta kai bou di gran Lodge i ta kai direktamente bou di Lodge na Inglatera. Tabatin  logia den Karibe  ku a purba haña logia di Kòrsou bou di nan, pero nan no a logra.Esaki tabata tempu ora pueblo tabata chikí, pero Willemstad tabata un sentro di komèrsio internashonal: hulandes, sefardita, europeo, tur den mesun klima di buska bida.

Organisashon

Promé tabatin hopi logia masóniko rònt Europa i Inglatera. Na 1717 a yega na  union i adaptashon di prinsipio i reglamentashon ofisial i esei a resultá den kreashon di The United Grand Lodge of England(UGLE). E organisashon ku ta konsiderá esun mas dominante i outoritario den masoneria mundial. Na mundu tin mas o ménos 6 mion mazòn i 250 mil ta kai bou di United Grand Loge of England. Logia Igualdat No. 653 ta un di e 8 nan ku no ta kai bou di ningun otro sup outoridat, sino direktamente bou di UGLE, un posishon úniko i envidiabel ku nan ta kuida ku masha atenshon.
Na 1855 Logia Igualdat a permití hopi miembro hudiu, ingles i merikano drenta logia. For di siglo 18 tabata mira Logia Igualdat komo  un medio di emansipashon debí na su meta. Logia Igualdat tabata lucha hopi pa esnan di ménos rekurso. Hopi grupo di komunidat tabata bin den kontakto ku Logia Igualdat.

Nada di símbolo skur of kos straño. Nan tabata reuní pa papia, pa studia, pa diskutí bida i moral. Nan tabata kere ku kada ser humano por bira un “kubo”perfekto, un metáfora ku ta sali direktamente di símbolo di freemasonery.

E misterio ku hende di afó tabata sinti, segun dokumentonan, tabata mas pa motibu ku nan ritual tabata privá. No tabata un sekreto, sino privasidat. E mes manera ku henter pueblo no por drenta den un reunion di famia. Pero ora bo ta reuní porta será, hende ta pensa ku tin kos di skonde.

Iglesia katóliko no tabata kontentu ku e tipo di privasidat ei. Den e dokumentonan ta konta kon hopi pastor i obispu tabata mira freemasonery manera un “konkurensia spiritual.” No tantu paso nan tabata hasi malu, sino paso nan tabatin pensamentu liber i idea fraternal i igualdat. I temporada di régimen duru manera Franco i nazista, freemasonery tabata prohibí, pa motibu ku nan ta promové libertat di pensamentu.

Na Kòrsou tabatin katóliko ku tabata miembro den sekreto; no pa bai kontra iglesia, sino pa evitá problema.

Loke a keda atras di e legado di logia, ta poder sosial ku logia tabatin den siglo XIX, loke nan a laga atras ta: un manera di pensa mas habrí, mas humano, mas igual. Un pensamentu kaminda hende di diferente klase, kultura i religion por sinta huntu sin hopi regla divishon.

Logia ta simplemente un komunidat di hende ku ta kere den bondat, reflekshon i progreso humano.

Un parti di nos pasado ku, si nos wak trankil, ta mustra un isla ku semper a buska forma pa krea diálogo, pa krese, i pa yuda otro hende, ounke e diálogo no tabata semper públiko.

Algun famoso

Mi a tuma nota di algun miembro di masoneria ku tabata masha famoso., entre nan: Wolfgang Amadeus Mozart – Ludwig van Beethoven – Simon Bolivar – Jesse Jackson – Silvio Berlusconi – Sir Alexander Fleming – Steve Wozniak.

Mundu di masoneria no ta meskos ku ántes. Den hopi pais, (na Kòrsou tambe) kantidat di miembro ta baha, i hopi lo pensa ku e ta un institushon ku su tempu a pasa. Pero talbes no ta un fin, sino un kambio. Un transishon for di un forma antiguo pa un forma nobo, ku mester adaptá na un mundu ku ta move mas lihé i pensa diferente.

Talbes e pregunta no ta si masoneria ta muri, pero kon lo e logra sigui eksistí den nos era digital. I manera tur tradishon, su futuro lo dependé di kapasidat pa kambia sin pèrdè su alma.