“Bo por bai for di Otrobanda, pero Otrobanda ta keda den bo.”
Otrobanda ta mas ku un adrès!
Tin palabra ku ta karga mas ku su nòmber. Otrobandista ta un di nan. No ta simplemente un hende ku ta biba òf a biba den Otrobanda. Ta un nòmber kargá ku memoria, orguyo, lucha, nostalgia i tambe kontradikshon. Esun ku bisa ku e ta Otrobandista, tin un historia den su kurason: historia di tempu, di lugá, di famia, di loke a pasa i di loke ta menasa di bai pèrdí.
Segun investigashon i testimonionan den estudio hasi pa Liza de Laat, “Laga mi konta bu ‘n kos” (De Sociale Geschiedenis van de stadswijk Otrobanda op Curacao: 1920 – 2000) un kos ta resaltá: Otrobandista no tin un definishon kla.
Ken por yama su mes Otrobandista?
Pa hopi hende, tur kos ta kuminsá ku tempu. Ku e Otrobanda di antaño: trankilidat, konosementu, bisiña ku ta famia. Un bario kaminda hende tabata konosé otro, kaminda famianan tabata keda huntu pa generashonnan, kaminda rèspèt, solidaridat i toleransia tabata kos natural.
Hendenan mayor di edat, ku no ta biba mas den Otrobanda, ta papia ku un sonrisa melankóliko tokante nan bida den e bario. Nan kuenta di hanchi, di seru, di skol i misa, di wega riba kaya i di un komunidat ku tabata uní. Pa nan, Otrobandista ta: tene bo kurason pegá na Otrobanda, maske bo kas ta leu for di Otrobanda .
“Otrobandista ta un hende ku su sentimentu, su konosementu i su nostalgia ta ankrá den Otrobanda.”
Pero ken ta un ‘Otrobandista di bèrdat’?
Aki e diskushon ta kuminsá.
Tin hende ku ta bisa, basta si bo a nase, a krese i a forma den Otrobanda, bo ta Otrobandista. Pero tin otro ku ta insistí ku lugá ta desisivo. Pa nan, si bo no ta biba mas den Otrobanda, si bo no ta sinti e bario 24 ora pa dia, bo no por yama bo mes Otrobandista.
“Si bo ta Otrobandista, bo mester sa kiko ta pasa un or di mardugá den bo bario i esnan ku ta drumi den nan kas ku èrko leu den otro bario no ta sinti esei.”
E diskushon entre esnan ku a keda i esnan ku a bai for di Otrobanda ta sigui. Pa esnan ku a keda, nostalgia por parse manera luho; pa esnan ku a bai, e bario di awe por parse un doló.
Famianan i nòmber!
Un hende su fam ta un aspekto importante pa duna e persona(famia) un lugá den Otrobanda. Den Otrobanda, nòmber di famia no ta solamente un nòmber, sino un señal sosial. Un forma pa buska i haña sa: ken ta su tata, su wela, su antepasadonan. Famianan bieu manera De Lannoy, Lauffer, Maduro, Corsen, Palm, Römer i otronan (erfgenamen van de “oude families” van Otrobanda Sieder 1993) pa hopi hende ta forma e núkleo di identidat Otrobandista.
“Ántes bo por a investigá un hende; awor no mas.”
Otrobanda semper tabata un meskla di kultura i migrashon. Sin embargo, último ola di migrashon a lanta miedu i duda. No ta mira bisiñanan nobo komo parti di identidat Otrobandista. Hopi biaha ta kategorisá nan komo esnan ku no ta ligá ku bario.Pero Otrobanda semper a krese ku hendenan ku a bin biba den e bario. E pregunta ta keda: Otrobandista ta algu ku bo heredá, òf algu ku bo ta skohe?
Di un otro tempu!
Otrobanda ta konsistí di yen di nòmber ku no ta aparesé riba ningun mapa ofisial: Awasá, Paris, Kura di Shon Fil, Hanchi di Bientu, Seru di Trapi. Lugánan ku por a kambia físikamente, pero ku ta keda intakto den nos memoria.
E bario a transformá i reorganisá dor di desaroyo. Tin parti ku algun hende ta mira komo “Otrobanda di bèrdat” i otro no. Pero e diskushon mes ta mustra kon fuerte e identidat ta biba.
Un tempu Fundashon Plataforma Otrobanda a kuminsá ku un proyekto pa organisá bario di Otrobanda. Nan a hasi un repartishon di 7 supbario: Ref, Seru Otrobanda, Seru Dòmi, Dòmi Abou Juan Dumingu/Mundu Nobo, Kortijn i Baraltwijk. Pa diferente otro hende Otrobanda ta yega te misa Sta. Famia.
Pa mi personalmente a dura un tempu promé ku mi a yega na e konklushon ku kada hende tin nan propio definishon di ken ta Otrobandista. Mi a nase den Mundo Nobo, bai skol St. Thomas College den kurá di frater i Hoogstraat, biba komo mucha na Kortijnweg 38, traha 33 aña na CUROM den Otrobanda. Kisas abo no ta haña ku mi ta Otrobandista, pero bo no por kita for di mi ku Otrobanda a forma mi i esei ningun hende por kita for di mi!
“Otrobandista no ta un adrès, ta un sentimentu ku bo ta karga.”
Ai ora mi ta lesa
No papia ku mi
Tremendo Percy ora hende ta deskuti mi ta pone nan na RES skucha otrobanda
Ta sentro di korsow
Danki
Ami a nase de Reuzensteeg.
Super interesante. Danki pa info añadi.
No ta na Otrobanda so e relashon ku bisiña nan a kambia. Ta ront Korsou i re hasta ront mundu, hoy en dia mi no konose mi bisiña nan.
Hopi tristu😢
Tempu a kambia i famianan ku ta biba den otrobanda tambe a kambia. Ami konosé tur mi bisiñanan den Otrobanda paso mi ta hasi un eksfuerso pa konosénan.
Un teksto ku ta toka un nervio real den nos komunidat. Bo pone kla ku “Otrobandista” no ta un etiqueta simpel, sino un identidat vivo ku ta move entre memoria, pertenensia i realidat di awe. E manera ku bo presenta e tenshon entre esnan ku a keda i esnan ku a bai for di bario ta honesto—i nesesario—pasobra e diskushon aki no tin un kontesta úniko.
Mi ta gusta kon bo no ta romantisá Otrobanda sin kritiká, pero tambe no ta laga e kambio baha e balor di loke a forma e bario. E punto tokante famia i nòmber ta fuerte: ta mustra kon historia sosial i identidat ta entrelasa, pero bo ta habri tambe e pregunta importante si e identidat ei mester keda será òf si e por sigui inklusivo, manera Otrobanda semper a sido den su meskla.
E frase final ta pega: “Otrobandista no ta un adrès, ta un sentimentu ku bo ta karga.” Esaki ta bira un invitashon pa pensa mas profundo: no solamente ken tin derecho di yama su mes Otrobandista, pero tambe kon nos por mantene e alma di Otrobanda bibu den medio di kambio.
Un kontribushon ku ta balioso pa e diskurso riba identidat, herensia i futuro di nos bario.