Den mi di dos episodio mi ta relatá eksperensia di 5 diferente famia(amigu) ku a bai ku “buitenlands verlof”, di nan preparashon, nan biahe i nan estadia den diferente lugá ku nan a bishitá. E promé ta di mi amigu makamba ku komo mucha a eksperensia e biahe. Nada di preparashon, pero e biahe.

“Komo mucha bo no sa mashá di e fenómeno ‘buitenlands verlof’, si no ku tabata chèns di biaha ku bo mayornan. Komo polis mi tata tabata bini na remarke pa kada seis aña bai afó seis luna ku henter famia, sigui kobra su salario. Klaro ami a gosa pasobra nos a probechá di hasi bunita biahe na dos okashon: na 1961 i na 1968. Na ’61 nos a bula bai New York kaminda nos a subi e barku Rotterdam pa bai Rotterdam i ora ferlòf a kaba nos a bai Hamburg pa regresá Kòrsou riba e barku Perseus ku tabata kombiná karga i pasahero. Na ‘68 nos a biaha bai-bini ku nos bisiña di Mundo Nobo, famia Dikmoet. Nos a bai Europa ku e barku Verdi pa Napoli i sigui pa Hulanda ku nos mes outo ku tabata tambe na bordo. Ora di regreso atrobe mi tata i tata di Dikmoet a kore ku nos mes outo di Hulanda pa Lisboa kaminda nos a subi barku Santa Maria.

Ke men, nos a mira basta pais i siudat durante e dos okashonnan aki. Klaro, asina tambe mi a siña konosé mi famia na Hulanda – e tempu aya no tabata usual pa nan bishitá nos na Kòrsou. No kere ku e periodo tabata fakansi so. Tur dos biaha mi a bai skol pa algun luna. Na skol básiko no tabatin niun problema, pero na ’68 na skol avansá si mi mester a haña eksonerashon pa e materia ‘Aleman’, pasobra na Kòrsou mi a skohe ‘spañó’. E otro alumnonan tabata ke probechá di e situashon pa mi yuda nan durante prufwèrk, pero nan no a realisá ku mi no por a yuda nan komo mi tabata sa niun pataka di Aleman.

Ora mi a bai pa studia na Hulanda, ku mi mayornan ketu bai bibá na Kòrsou, e situashon aya no tabata kompletamente nobo pa mi, danki na e biahanan di ‘buitenlands verlof’.

Esaki e relato di un persona ku a biba momentunan ei komo mucha i awor na grandi ta rekordá e temporada.

Otro rekuerdo komo mucha, ta di un señora, ku a bai ku famia, mama, tata i rumannan Sürnam. Su tata tabata traha na Shell i komo hende ku a bin for di Sürnam i bin traha pa Shell, nan tambe tabatin posibilidat di biaha pa nan pais i selebrá nan fakansi ei nan. Manera Shell mes a deskribí esei, e “buitenlands verlof” tabata pa pasa tempu ku famia, pa rekargá energia, pensa riba futuro i kuminsá bo trabou atrobe ku hopi dedikashon. Shell no tabata mira “buitenlands verlof” komo fakansi, pero komo un derechi ku empleado a atkerí ku añanan di sirbishi na e kompania.
Shell tabata rekompensá sierto kategoria di empleado. Ounke mayoria ámtenar i empleado di Shell a biaha ku barku, tabatin posibilidat pa biaha ku avion tambe i tempu ku KLM a kuminsá bula pa i for di Costa Rica, sigur Shell a kuminsá promové e posibilidat aki tambe pa su empleadonan.

Kabes di boto ku tènker.

Hende semper ta masha inventivo i sigur pa yega nan destinashon na un preis rasonabel, tabatin hende ku tabata buska posibilidat di biaha ku tènker, na un preis barata i asta si por pòrnada pa yega Hulanda. Tantu Shell komo gobièrnu a pone un paro den esaki, prohibiendo nan trahadónan di biaha ku tènker pa bai ku “buitenlands verlof”. Tabatin un regla tambe ku bo mester a keda un kantidat di tempu den eksterior i si bo no kumpli ku esaki bo mester a duna sèn ku bo a haña òf aloménos parti di e sèn aki bèk.

Europe on 5 dollars a day.

E historia ku mas mi a gusta ta di un kabayero, e tempu ei di 26 pa 27 aña di edat, ku tabata traha den gobièrnu. El a haña e konseho pa sigui kurso di “adjunct commies”. Kaba di studia, no kasa promé ku e tempu ei i bai ku “buitenlands verlof”. E kabayero aki a konta ku esaki tabata e mihó kos ku e por a hasi. El a prepará su mes debidamente i a pasa un fakansi di kita sombré, konosiendo masha hopi hende i lugá. El a prepará su biahe debidamente. El a buska tur sorto di informashon serka hendenan ku a bai ku “buitenlands verlof” kaba. Na Boekhandel Salas el a kumpra e buki, “Europe on 5 dollar a day” di Arthur Frommer. E buki ta duna bo tur sorto di tep, kon pa haña lugá di keda barata, sitionan pa bishitá, sugerensia den idiomanan straño, etcetera.
El a bishitá Gein Isebia ku tabata traha e tempu ei na Curaçao Trading Company (CTC) ku tabata traha ku gobièrnu i ku tabata regla delaster un detaye pa esnan ku tabata kier a bai ku “buitenlands verlof”. Ku su buki  “Europe on 5 dollar a day” i su Interrail Pass, pa biaha ku trein durante un temporada, el a subi barku i a hasi e trep di su bida. Su di bon tabata tambe, ku e tabatin su ruman muhé bibando na Amsterdam, ku a hasi su trep mas barata i mas seif. Un kombinashon di biahe ku barku, trein i outo den un temporada di mas o ménos 4 luna pa Hulanda, Alemania, Portugal, Spaña, Fransia, Dinamarka, Bèlgika i algun otro pais ta su rekuerdo ku e tin awor akí. El a konta tambe, ku tantu barku komo trein tabata eksperensia inolvidabel. Su preokupashon hopi biaha tabata pa buska transporte i lugá di keda bon i mas barata posibel. Awe mas ku 50 aña despues lo e no kier a pèrdè e chèns akí pa nada di mundu.

Riba Paranda

Anto banda di e historianan ku mi a rekordá aki riba, tin tambe ámtenarnan (duanero) ku a disidí ku nan ta kue otro ruta; ku barku, bishitando paisnan den Sur Amérika. Nan a forma un grupo di 3 pareha kasá i dos amigu ku tabata soltero i a haña tur informashon serka amigunan ku ya a yega di biaha ku barku bishitando paisnan di Sur Amérika. E grupo akí tabata mas riba paranda i tabata disfrutá di ta huntu riba barku, huntu den hotèl i biahando den kompania di otro. Nan tabata hopi enbolbí ku hendenan di pais ku nan a bishitá. Interkambiando partinan kultural, kushinando kosnan di nos kushina lokal i siñando hopi biaha tambe kosnan di e pais ku nan a bishitá. Estando huntu kasi henter trep, tempu a bula pasa. Un miembro a bisa ku el a subi barku ku algu mas ku 4 mil dòler i ora el a yega Kòrsou bèk, ainda tabatin algu ku a sobra for di sèn ku el a biaha kuné. Chile tabata e pais ku mas nan a gusta i tabata e pais mas barata tambe. E pais ku a karga nan komo hende di koló mas tantu tambe.

Amistat te awe

Un señora ku a bai dos biaha ku “buitenlandsverlof” a konta mi su rekuerdo. Tur dos biaha el a biaha komo mucha i komo mucha tabatin mester di diferente otro trámite, pa akomodá i prepará pa biahe. Komo mucha di 9 aña (1963) mester a regla skol p’e na Hulanda, pasobra e no por a keda tantu tempu asina sin bai skol. Manera el a konta, ku mayoria di mayornan tabata pone nan yu(nan) den un internat. Su mayornan tabata keiru Europa/Hulanda miéntras e tabata na internat i den wikènt nan tabata keiru den Hulanda kuné.

Su di dos biaha ku nan a bai ku “buitenlands verlof” nan a bai ku henter famia, mama, tata i 5 yu. Esaki tabata na 1969 i el a konta e tristesa ku nan a sinti ora ku nan a sali nos haf i mira kon Kòrsou a keda despues di 30 di mei 1969. Mas aleu el a konta, kon su tata a spar 10 mil florin i ku e sèn ei, nan 7 a pasa un fakansi masha memorabel. E señora, fuera di tin asina bon rekuerdo di su biahe a konta ku amistat ku el a sera na internat, ku yunan di e doño di kas, te awe, 62 aña despues nan ta manera ruman ku otro. Ku e dos biahenan aki un mundu nobo a habri p’e.

Ora un hende bisa bo e tempu ei ku e ta bai ku “buitenlands verlof”, esei kier men e persona a yega un otro etapa den su bida. Na final di dékada 60 e sistema a kuminsá kambia i tabatin un periodo di transishon pa esnan ku tabata den sistema bieu, kaminda bo por a haña un suma di plaka pa kumpra e “buitenlands verlof”. E kambio a trese hopi diskushon i hopi tabata mira e derechi di “buitenlands verlof” komo un derechi atkerí.

Un rekuerdo ku ta biba.

Awe nos no ta papia mas di “buitenlands verlof” i e ta mas den nos memoria kolektivo. E ta nostalgia, esnan ku a pasa aden ta papia ku orguyo di dje i ta tópiko di kombersashon serka hopi di esnan ku a eksperensia esaki. Riba e trep den Karibe akí, mi a topa un pareha, ku a konta mi ku nan tambe a bai ku “buitenlands verlof” for di Kòrsou pa Sur Amérika i awor aki pa di tantísimo bia, a bin keiru den Karibe, pa motibu di e bon rekuerdo ku nan a keda kuné for di despues di nan “buitenlands verlof”.