“Pa mi, historia di álmanak no ta djis un tema di ántes; e ta literalmente parti di ken mi ta. Bo a yega di puntra bo mes dikon mi yama Plácido komo mi di tres nòmber? Esei no tabata simplemente un eskoho. Dia 5 di òktober ta dia di San Plácido. I unda mi mayornan a wak pa haña e informashon ei e tempu aya? Presis, den e famoso “Almanaque de Bristol”. Pues, mi nòmber ta bin direktamente for di blachinan di e famoso buki oraño ei. Komo prueba bibu di influensia di e álmanak aki, awe mi ke hiba boso bèk den tempu, na dianan di Bristol i Shon Wein Hoyer i su “Almanaque de Curazao.”
Den tempu kaminda nos por djis wak riba nos telefòn pa sa kon wer ta òf ki dia ta luna yen, ta difísil pa imaginá kon importante informashon imprimí tabata ántes. Pa pueblo di Kòrsou, tabatin un buki chikí ku tabata kasi sagrado den kada kas: Almanak di Bristol.
Pero kiko ta un álmanak? Básikamente, ta un publikashon anual ku ta kontené kalènder, pronóstiko di tempu, dato astronómiko (manera subida di awa i fase di luna) i hopi biaha tepnan práktiko. Pero pa Kòrsou, e buki aki tabata muchu mas ku esei; e tabata guia pa bida diario. Un di e álmanaknan mas bieu i konosí na mundu, ku tabata masha popular na Kòrsou, ta “Almanaque de Bristol” (Almanak di Bristol).
Dikon a traha almanak (Bristol)?
Almanak di Bristol no a kuminsá komo un obra di karidat, pero komo un hèrmènt sabí di merkadeo. E kompania merikano Lanman & Kemp (despues Lanman & Kemp-Barclay) di New York tabata publiká e álmanak. E kompania aki tabata traha remedi i produktonan di kuido, di kual e famoso Agua de Florida (Florida Water) ta esun mas konosí. E álmanak, ku a sali pa promé biaha na 1832, tabata optenibel grátis na botika i tiendanan pa promové nan produktonan. I klaro ku e merkadeo di e awa akí a pone ku Awa di Florida tabata bon konosí na Kòrsou.
E balor pa Kòrsou
Maske tabata propaganda, e balor pa yu di Kòrsou tabata inkreibel:
- Konosementu grátis: Pa hopi hende, e buki ku kaft oraño tabata un di e poko kosnan pa lesa den kas.
- Kunuku i Laman: E almanak tabata kontené informashon krusial tokante marea i fase di luna. Piskadónan tabata us’é pa sa ki ora bai laman, i grandinan den kunuku tabata wak luna pa sa ki dia planta òf kosechá.
- Literatura: banda di sifra, e buki tabata yen di chiste, poesia i kuenta kòrtiku. Tabatin eskritor kurasoleño ku tabata tradusí kuenta pa papiamentu for di Bristol.
Nos propio álmanak: Shon Wein Hoyer
Ounke Bristol tabata internashonal, Kòrsou tabatin mester di su propio informashon. Aki e figura di Willem Manuel Hoyer mihó konosí komo Shon Wein Hoyer (1862-1953), ta drenta historia.
Shon Wein tabata un intelektual, historiadó, músiko i eskritor ku a haña importante pa dokumentá nos propio kultura i historia. El a publiká vários álmanak lokal, manera:
- Almanaque gráfiko
- Almanaque Guia de Curazao
- Almanaque de Curazao
Kontenido i uso
Kontrali na Bristol (ku tabata general), e buki di Shon Wein tabata manera un ensiklopedia di Kòrsou. E álmanak tabata kontené:
- Orario di barkunan.
- Nòmber di funshonarionan di gobièrnu.
- Preis di diferente servisio.
- Estadístika di komèrsio.
- Fechanan históriko spesífiko di Kòrsou.
- Diferente otro informashon balioso pa komunidat.
- Aktividatnan di Kòrsou.
- Informashon di famia real i hopi informashon mas,
Shon Wein a nase 17 di yüni 1862 i a muri 30 di yüli 1953. Ademas di hopi obra istóriko ku el a produsí, el a redaktá e Almanak pa 35 aña.
Vários gremio di sosiedat tabata usa álmanak di Shon Wein: komersiante, élite, pero tambe siudadanonan ku kier a keda na altura di loke tabata pasa riba nos isla. E tabata e “Google” di e tempu aya: si bo kier a sa algu tokante gobièrnu òf historia, bo tabata kue álmanak di Shon Wein.
Fin di un époka?
Awendia álmanak di papel a bira algu skars. Almanak di Bristol te ainda ta eksistí i ta sali den sierto region(hopi biaha pa nostalgia òf tradishon), pero internèt a tuma funshon di informashon over. Tòg, rekuerdo di e buki oraño i obranan di Shon Wein ta keda un parti importante di identidat di Kòrsou: nan ta simbolisá un tempu di struktura, konekshon ku naturalesa i simplisidat.
“Tempu a kambia. Awendia nos ta kohe nos telefòn pa wak wer i nos ta buska nòmber pa yu riba Google. E álmanak di papel kisas a disparsé poko poko for di nos bida diario, pero tanten mi yama Placido, e tradishon bieu ei ta sigui biba den mi. Mi ta masha kurioso: tin mas hende bou di mi lektornan ku tin un ‘nòmber di Bristol’, òf boso konosé un hende ku a haña nòmber ‘segun fecha di e Bristol’? Laga mi sa bo historia!”
Bon dia Percy ! Atrobe un pida istoria interesante i ku datos verifiká ku bo ta trese pa nos ! Mi pregunta de fakto ta: unda mi por kore yega awe diasabra 7/2/26 i haña un Almanak di Bristol?
Lucky bon dia, bo sa ku mi ta kere ku awor’ki bo ta lat riba tur oloshi. Kaminda Bristol tabata optenibel nan a kaba i e úniko ku a keda bo ta, subi internèt i download bo Bristol digital.
Un historia hermoso i profundo. ❤️
Bo relato ta mustra kon algo ku parse chikí—un álmanak—por bira fundeshi di identidat, memoria i kontinuidat kultural. For di un nòmber propio -mi di dis nomber ku ta Veronica tambe a bin di e almanak- te na bida diario di pueblo di Kòrsou, bo a hasi e pasado bira algo bibu atrobe. E manera ku bo hiba nos for di blachi oraño di Bristol te na obranan di Shon Wein Hoyer ta rekordá nos ku informashon no ta solamente dato, pero direkshon, sabiduria i pertenensia. Den un mundu digital i lihé, historia manera esaki ta un yamada pa keda sinti e tempu, e luna, e laman i nos mes. Danki pa kompartí e alma di e álmanak ku nos.
Danki pa otro tremendo relato Percy.
Den mi kaso mi ta kòrda ku mi mama defuntu a kontami ku dia mi a nanse (16 augustus), promé kos ku nan a hasi ta bai buska un nòmber den Bristol..
Pero mi mama no a haña San Jacinto (Jacinto) bunita i a skohe Luis Alberto. Nomber di e abuelo di mi tata.
Danki pa mantené nos istoria bibu.
Bon dia Percy.
Den nos kas tambe semper tabatin un Bristol. Mi nomber di meimei (nomber Kristián) Crescencio…..naturalmente di Bristol!!
Bon dia Percy
Mi tio Luis Daal tambe su di dos nòmber ta Placido, mi no sa si ku “Leka” mi wela a hañé for di Bristol.
Si, Enrique Muller tambe. Di Enrique mi sa ku ta saka for di Bristol
Hopi interesante Percy. Ami ta yu di Wela i den kas di nunka no ta falta un Bristol. Awendia mi no ta korda ku tin Bristol ainda. Antes den tur botica bo por a haña un Bristol asina e sali. Un artikulo hopi interesante manera semper, lokual bo a presentá.
Sperando ku lo bo sigui ku e esfuerso pa publiká e artikulonan.
Hopi interesante,tur kas antes mester tabata tin un Bristol.Mi hendenan no tabata falta ub Bristol.Toni mi tio tabata bende number,anto einan e tabata wak e number faborito, i sera nan.Ami komo mucha ta wak ki dia ta bon pa piska.Hopi bon PiPo.
Antes tur nomber Christan tbta sali direktamente for di Bristol. Te ahinda mi ta tende hende informa pa un Bristol pa e nomber Cristian pa baby. Danki pa sigi tene e parti nan aki di ns historia na bida Percey.
Bon dia, Percy y demas lesado.
Pa complace e inkietud di Señor Rodney Daal, mi mester inform’e y demas lesado cu ta e di tres nomber di Luis tabata Plácido (CU accent!) (Luis Henrique Plácido Daal) y cu el a nace dia 5 di october 1919. Kiermen cu por bien ta cu “Leka” a mira e nomber den ‘Almanaque de Bristol’ di e aña ey. Mester informa cu na Aruba e Almanaque tabatin y ainda parcialmente tin e mesun funcion cu na Corsou. Hopi nomber extravagante di antes ta saca for di e Almanaque: Hipolito, Nepomuceno, Eustaquio, Buenaventura etc. Awendia tambe tin hopi nomber extravagante cu e mayornan di e baby ta traha door di tur sorto di combinacion di palabra of nomber.