Establesé riba 8 yüni 1943, Café Santa Rosa ta e bar eksistente di mas bieu na Kòrsou. E bar ta keda den Santa Rosa i ta mihó konosí pa hopi hende di bario komo Martins Oranjeboom. Esaki pasombra e promé doño, Martins Mademilia tabata importá serbes di marka Oranjeboom ku e tempu ei tabata popular. José ‘Shon Ma’ Mademilia (yu di Martins) t’esun ku ta na kabes di Café Santa Rosa.

E bar a keda konstruí durante di e periodo mas intenso di e di Dos Guera mundial ku e meta pa ofresé algu di entretementu den un periodo skur ku no tabatin tin posibilidat pa rekreá kasi. Rápidamente e lugá a bira un sentro di enkuentro pa hendenan di Santa Rosa i alrededor. Tambe e tabata un lugá pa sosiegu di hendenan trafikando na pia, riba kabai òf buriku i tambe shofùrnan di bus.

Alex Rosaria ta konta: “Mi a lanta no muchu leu for di Café Santa Rosa. Mi tabata pasa su dilanti tur dia ora pa bai skol i kas despues. Drenta e bar si tabata algu estriktamente probibi pa mucha. Asta mi a lanta tende ku un hende muhé respetá no ta bishita tal lugá. Tempu a kambia sinembargo. Tòg nunka mi por a kombensé mi mama pa bishitá e bar dia mi tabata manehá esaki na aña 2012”.

Café Santa Rosa, un monumentu históriko kultural

“Tempu e bar a kumpli 65 aña na 2008, mi a kombensé e doño pa lagami start e proseso pa haña rekonosementu p’e bar komo monumentu. Ounke ku e proseso aki no tabata fasil, na 2011 ofisialmente Café Santa Rosa a keda designá un monumentu históriko kultural. Mi miedu ku e bar lo por a keda kombertí den un lugá di hasi kabei i uña òf algu ku no ta kuadra ku intenshon di su doño a keda kalmá. Por lo ménos asina mi a kere”. Ten a 2012 Alex a manehá Café Sta Rosa.

For di aña 2013 e bar a keda manehá pa hendenan ku no tabata tin interes òf sentimentu pa e tradishon i kustumbernan sosial importante di e bar. No por ta un sorpresa ku barnan tradishonal manera Montaña Bar, Welgelegen Bar, Semikòk Bar i Langulé Bar no ta eksistí mas netamente pasombra nos no a interesá pa konservá nan tradishon. Klientenan ku hinter nan bida a bin Café Santa Rosa no a sinti nan mes na kas den un ambiente ageno Ulandes Oropeo.

Nan a sinti nan mes menospresiá i kasi tur a bai i no a regresá. Ayó e ambiente di sùlt, tentalaria (probablemente esnan di mas sabroso na Kòrsou) i e fiestanan di djadumingu ku e tradishonal müsik di ka’i òrgel. Mas horendo ta e echo ku mobilario original i parti di e interior di e monumento a keda dañá i asta kibrá di tal manera ku esnan ku semper a bai Martins Oranjeboom lo no por kere nan wowonan

Sinembargo tin un lus na horizonte. Ya esnan ku tabata manehá e bar no tei mas. Banda di e destrukshon asta t’asina ku nan no a kumpli na tempu ku pago di hür. Despues di un periodo largu di drechamentu i renobashon, Café Santa Rosa a habri su portanan atrobe. Mas kontentu ainda mi ta ora mi a tuma nota ku tin algun kandidato ku sentimentu pa e balor históriko kultural di e bar ku ta dispuesto pa kuminsá un kapítulo nobo den e tradishon largu i glorioso di e bar di Santa Rosa. Meskos ku ami tin hopi hende ansioso pa dal un yoshi ròm bèrdè i ches riba poko sùlt.
(“Artíkulo modifiká di Alexdavidrosariablog”)