“Hotèl Venezuela verrijst uit de as: Van Hoerenkast naar Scheepvaartmuseum(Amigoe 25 di mei 1994)”

E muhé ei ta tene kas (tin kas di bia)

Loke bo no tin na kas, bo ta buska afó

Skalo ta un bario ku yen di edifisio ku arkitektura mahestuoso I edifisionan masha bunita mes. E edifisionan akí ta hopi aña – siglo –  bieu. Kasi tur a pèrdè e funshon ku nan ta tin ántes i a krea i inventá funshon nobo pa nan..  No semper  bo ta di akuerdo ku e funshon nobo ku nan tin, pero den e kaso di esun ku mi ta bai deskribí, mi ta haña e funshon esun mas adekuá.

E edifisio situá na Van den Brandhofstraat 1 (Nicolaas Van den Brandhof  tabata gobernador di Kòrsou di 1882 pa 1890). For di 1746 e edifisio akí ta tin funshon di kas, di entre otro: sua di Almirante Pedro Luis Brion, Joseph Foulke. Pedro Luis Brion a muri den e kas akí dia 27 di sèptèmber 1821. Ta durante di restourashon, a bin haña un plaka ku Simon Bolívar a dediká na Pedro Luis Brion. E plaka akí ta kologá den e kushina abou di e edifisio.

Den e di 2 mitar di siglo 19 e lugá ta kas pa “Loge de Vergenoeging” pa un temporada relativamente kòrtiku. Di 1866 pa 1871 ta tin un skol sekundario “Collegium Neerlandicum” den e edifisio. Na aña 1885 e dentista David Ricardo a kumpra e kas. Entre 1889 pa 1989 e kas a kambia vários biaha di doño. Na 1889 David Ricardo a bende e propiedat akí ku famia Bethancourt e Hijos. Dòkter Ricardo t’esun ku a laga traha e edifisio “Villa Maria”situá un tiki mas pariba. Di 1911 pa 1923 dòkter Philip Frederik de Haseth  Möller a establesé un sanatorio den e edifisio. Despues ku a bende e kas un biaha mas, e edifisio a kai den man di  konosido Jaime A.J. Sprock, ku ta usa parti patras di e kas, komo depósito. Charles Gomes Casseres ta rekordá ku semper ta tin masha dushi holó di ròm ei banda. Despues un biaha mas e edifisio ta kambia di diferente doño i ta fungi komo hotèl 3 biaha: Hotèl Curaçao – Hotèl Majestic i Hotèl Venezuela. E último hotèl akí mi a konosé. Ariba ta tin un kas di pleizir i parti abou ta tin Bar La Rueda. Wikènt ta tin banda ta toka den e hotèl. Esei ta e final di un edifisio asina mahestuoso ku finalmente ta bira un kas di pleizir.

Final di aña 1988 un kandela ta pone fin na un periodo tumultoso pa e edifisio. Stichting Monumentenzorg Curaçao ta kumpra e edifisio na aña 1989 i 8 di desèmber 1998 ta habri su portanan bèk komo Curaçao Maritime Musem (CMM. Den e edifisio tin un konstrukshon parti paden ku ta laga bo rekordá temporada di Kòrsou su periodo marítimo, ku un butik abou i ariba bo tin Culture Deli Café kaminda bo por desayuná i lùnch.