Hòrta Shòrt

Resientemente mi a start mi blòg Hòrta Shòrt, ku a start direktamente ku un diskushon riba e nòmber Horta Shòrt. Si e nòmber ta korekto i si mi ta kier men Horta Shòt.

Komo mucha mi ta bai sine i mi teaternan preferí ta West End, Cinelandia I Roxy. Sine mitar di sinku pa mucha, sine mitar di shete pa esnan un tiki mas grandi i despues tambe sine di hende grandi (adulto). Promé ku kuminsá ku e pelíkula nan ta pasa e dia ei, bo ta haña un cartoon, Woody Pecker, Betty Boop, Tom and Jerry, Popeye, etc. Despues bo ta haña Polygoon nieuws i mas despues bo ta haña shòrt, loke ku awe nos ta yama “trailer”.  Esakinan ta e “coming soon” di e teater ei, pa keinta bo p’asina bo bin wak e pelíkula dia nan ta pas’é.

Pa motibu ku no ta tur kos por a pasa e tempu ei den pelíkula, a instituí riba ehèmpel di Ulanda un sorto di “Keuringscommissie” den kua ta tin representante di diferente religion i otro intelektualnan di nos isla. I nan ta bai kùr e pelíkula. Kaminda nan ta haña ku sierto pasashi no ta apto (kontra di moralidat) pa pasa di e pelíkula ei, nan ta duna òrdu, pa kòrta e pida ei saka afó.  Anto ora ta pasa e pelíkula pa públiko, bo ta ripara mesora ku nan a saka un pida (shòrt) afó i públiko ta bisa ku nan a hòrta shòrt. Esei ta loke ami a lanta tende i ta usa te dia djawe. Awor kiko t’abo opinion.