Hol’é promé bo beb’é!
Beter di mas, lenga ta pèrdè kompas(Wini Poulo)
(Hende fuma ta papia pa loko)

Kerido Lektor

E bar di mas bieu den Otrobanda ta Netto Bar, kaminda ta bende  e famoso ròm bèrdè, ounke ku tin otro hende ku ta pretendé ku esaki no ta e ròm bèrdè original. Kòrsou ta òf tabata riku na bar rònt nos isla. Barnan ku ta karga poko nòmber masha apart mes (Langule Bar) i ku ta karga nòmber di santu tambe(Sta Clara Bar).

Nos barnan tin i ta tin nan kosnan úniko: nan djubòks, nan bebida apart, webu den zur i hopi otro kosnan apart. Tin asta bar(edifisio) ku ta riba lista di monumento aki na Kòrsou. I den 2021 tin diferente establesimento ku ta karga nòmber di bar i ku realmente no ta bar.

Lo mi bai na kompartí informashon ku bo(so) atrabes di mi blog “Hòrta Shòrt”, un tèrminologia ku ta usa ántes den presentashon di sine aki na Kòrsou na momentu ku durante presentashon di e pelíkula, nan saka un pida afó. Nos lo bin bèk mas den ekstenso riba e fenómeno akí.

Gustosamente mi ke drenta den kontakto ku e hendenan aki òf ku abo ku ta disponé di informashon òf potrèt di nos barnan. Mi kier a pidibo, si bo tin informashon òf bo konosé hende ku tin informashon ku por yuda mi den mi empeño pa kolektá mas tantu dato konkreto i relevante posibel, fabor mail mi na info@percypinedoblog.com òf yamami na 510-4946. Pa tiki ku e informashon por ta, mi lo apresiá bo tuma kontakto ku mi. Di antemano masha danki.

Percy Pinedo