Dos siman pasá, Arthur Curiel a publiká riba su paginá di FaceBook “Shon nn Shon Elma+ (Mema) di bentana Kortijn (O) a bai sosegá. Kondoleer pa Famia i konosí nan. Sosegá na pas Mema ac”.

Lesando esaki, mesora m’a bira mucha atrobe. Mi a kòrda riba Djen i Mema. Mi a bai bèk den mi tempu den Kortijnweg. E konsepto “tienda den bario” ta hiba mi bèk na mi infansia. No e supermerkado grandi di awor, pero e tiendesitanan kaminda bo no tabata drenta ku bankomátiko. Den mayoria kaso, bo tabata para na bentana, bisa kiko bo kier, i bo tabata sali ku un saku di papel maron yen di rekuerdo.

Kada bario tabatin su tienda. Mi ta sigur ku abo tambe por sera bo wowo un momentu i mira e bentana di bo bario. E doño, e holó di pan kayente, e dròpnan den bòter di glas, e rekuerdo di mucha pidiendo “duna mi dos plaka di…” Tur esaki ta parti di nos memoria kolektivo.

Den e tempu ei e palabra “moratorio” no tabata eksistí. Apesar ku sèn no tabata hopi, tiendanan tabata floresé. Nan tabata biba di e muchanan ku tabata risibí un dies òf binti sèn di nan mama, tata, tanta òf bisiña. Bo ta keda asombrá kon asina tantu negoshi di kos dushi por a sobrebibí den un tempu ku sèn tabata skars.

Mundu Nobo: un paraiso chikí pa mucha

Mundu Nobo no tabata diferente. Kada bentana tabatin su spesialidat i kada doño tabatin su beinam.

Pega ku nos kas tabatin Moi i Chinè ku tabata konosí pa nan li. Li di lechi i di preimu, bo mester a para na porta di kurá pa kumpra. Un tiki skeins nan dilanti tabatin Yaya, yaya di Elis Juliana. Mi no sa su nòmber. Pa nos tur, e tabata simplemente Yaya. Serka dje bo tabata kumpra kuki i lèter.

Patras di nos kas tabatin Nia, kaminda bentana tabata un paraiso di mangel. Bazooka, Mary Jane, Blue Bird, zwip, dèps, mangel di tur koló, dròp den forma di pipa, bals kusinchi, i e bals ku karchi baseball aden. Esakinan no tabata solamente mangel; nan tabata entrada pa hopi weganan ku nos tabata hunga riba kaya.

Un tiki mas dilanti tabatin otro bentana kaminda nos tabata bai kumpra kos, pa mira, papia ku e bunita mucha muhé (Marsha) ku tabata bende kos. Manera hopi hóben di e tempu ei, bo por a kumpra un sigaria detayá. No tur hende por a kumpra un paki kompletu. I despues di huma, naturalmente bo mester a kumpra un bals PK pa kita holó di sigaria.

Mas pariba tabatin Zjalia Lep. Nos tabata yama asina pa motibu ku su lep tabata kologá. Aki bo tabata haña orea bròs-bròs, ko’i lechi, tentalaria, kokada, panseiku, papilon di suku i zjozjolí. Pa yega serka dje, bo mester habri un porta “saya ku djèki”, drenta den kurá, i mesora e konfó riba kandela ta saludá bo. E holó di kos dushi prepará na kas ta un kos ku ainda mi por sinti.

Dilanti vèlt tabatin Helena Bònbòn, ku tabata bende mangel i limonada. Na Jan Otzenstraat tabatin Deborita Regales, ku ademas di kos dushi tabata bende pan ku belèg pa e hendenan di Waterleiding. Esaki ya no tabata un bentana, pero un tienda berdadero ku tonbank i mas.

I si mama kier a kome kala, bo tabata bai serka Koti (Clotilda). Kala tabata mas pa hende grandi.

Rèspèt tabata parti di edukashon

Mundu Nobo tabatin tambe Shon Nani i Shon Keta. Mira bon: nos no tabata bisa simplemente nan nòmber. Nos tabata bisa Shon. E título ei tabata pa rèspèt.
Serka Shon Nani bo tabata kumpra pan kayente mainta i atardi. Serka Shon Keta bo tabata haña pan ku belèg i e famoso limonada “bòter pretu”.

Na Piscaderaweg tabatin e tienda di Akron, un di e promé arabirnan ku a habri tienda na Kòrsou. Mi ta kòrda un trahadó yu di Kòrsou muda ku tabata traha serka Akron. Nos muchanan tabata hasi tur esfuerso pa e por komprondé kiko nos tabata kier kumpra. Te awe e ta keda den mi memoria komo un hòmber ku tabata hopi gustá den bario.
Dilanti Akron tabatin Gunter, e makamba ku tabata spesialisá den tur kos eléktriko.

Pa Nèto i Mafita: un museo bibu di nos kultura

Pero si un tienda a laga un marka profundo den mi memoria, ta e tienda chikitu di Pa Nèto i Mafita. Bo mester drenta un pasashi smal pa yega na bentana. E kas tabata adaptá ku diferente kamber pa warda komestibel. Esaki no tabata solamente un tienda; esaki tabata un sentro sosial. Aki bo por a kumpra:

• dòria di keshi;
• dies kuater plaka di kòfi;
• dies plaka di manteka den papel maron;
• un kana di maishi;
• un pinchi di zeta;
• buskuchi “roi rònchi”;
• bakiou, karnisa i rabu, tur lorá den e papel maron ku tabata bini na ròl.

Na kaminda pa kas bo ta kanfuñá e bakiou. Tur mucha di e tempu ei sa di kiko mi ta papia. Saku di plèstik no tabata eksistí ainda.

I naturalmente tabatin e sistema di fia. Pa Nèto tabata skirbi tur kos den su skref. Fin di luna bo mama tabata pasa paga. Si e tabata mira ku e luna ta kaba, e ta bisa bo:“Bisa bo mama ku e tin di kòrda pasa.” Bo sa mesora ku e ora di paga a yega.

Kon tabata midi?
E tempu tabatin su propio sistema di midi. Bo tabata mira kon nan ta pone diferente peso riba balans pa yega na e peso eksakto. Kerozin i zeta tabata midi ku bleki. Un “blekero” lokal tabata traha e midínan usando bleki di zeta òf manteka di diferente grandura. Goi, Gregorio Elizabeth tabata bende su blekinan i midínan den marshe di Punda. Ku morto di Goi e fishi di blekero a pasa pa historia.
I nèt dilanti vèlt, den bar di Dris, ròm tabata midí ku yoshi òf mushi, dependé kuantu bo kier. Esaki no solamente tabata forma di bende. Esaki tabata un forma di biba.

Ons Hoekje… mi lugá preferí

Pero mi kurason semper ta bolbe na Ons Hoekje, e tienda di Tuyu i Maché Bloem den Goeroeboeroeweg. Mi tabata di kas serka famia Bloem pa motibu di mi amistat ku Reynault Bloem. Mi tabata konosé kasi tur loke tabata bende den e tienda. I sí… manera hopi mucha di e tempu ei, algun biaha nos tabata “fia” un bleki sosèshi, un bleki lechi kondèns, un tiki aros òf zeta, despues bula waya di kurá di famia Bloem i bai kamper den mondi, sintiendo nos mes pionero preparando nos propio kuminda. Awe mi ta hari ora mi pensa riba Ons Hoekje.

E bentananan a sera… pero e rekuerdonan no

Hopi di e tiendanan akí no ta eksistí mas. E bentananan a sera. E doñonan a bai sosegá. E muchanan di e tempu ei, awor ta tata, mama, abuelo i bisawelo. Pero den nos memoria, e bentananan ta habrí tur dia.

Pasobra e tiendanan di bario no tabata solamente negoshi. Nan tabata lugá kaminda hende tabata topa otro, papia, fia, paga, yora, hari i kompartí bida. Nan tabata e “Facebook” di nos bario promé ku Internet a eksistí.

Ons Hoekje ta e nòmber ku mi ta rekordá ku mas kariño. No solamente pasobra tabata mi tienda preferí, sino pasobra e nòmber ei ta resumí tur loke mi ta sinti awe. Pasobra, finalmente, kada bario tabatin su propio “Ons Hoekje”. Un huki chikí kaminda un pueblo a siña ku komunidat no ta midi den tamaño di un edifisio, pero den kalor di su hendenan. I kisas esei ta e kos ku nos ta sinta mas falta di dje den Kòrsou di awe.