‘ku e kas akí por keda eksistí, te ora vruminga bebe tur awa di laman i turtuga kana mundu rònt’. (saká for di Jubileumboek 1855-2005- 150 aña di kuido ku amor).

Para dilanti di porta di Hospital St. Elisabeth un hende lo no ta dun’é kuenta ku e ta na punto di drenta un ambiente históriko. Asina bo drenta e hal prestigioso, bo no ta skapa di e realidat ei. Literalmente bo ta pasa di presente pa pasado, pasobra bo ta haña bo den un monumento, den un museo riba su mes. Komo tur rònt di bo tin, tantu opheto di un pasado asina leu, eseinan ta yama pregunta serka bo. Ta pregunta riba kua bo no ta haña kontesta mes ora. Pero no ta ophetonan so. Denter di e murayanan di e edifisio akí tin historia wardá di hopi bida di hende, un pasado riku ku ta bai bèk 150 aña.
Dia 3 di desèmber 2002 Hospital St. Elisabeth a kumpli 150  aña i e ta e Hospital mas bieu di Antia Hulandes i di e region  akí. (Nolda C. Römer-Kenepa- Jubileumboek 1855-2005- 150 aña di kuido ku amor).

Tin edifisio ku tin nan doño, pero tin edifisio ku, pa motibu di tur loke a sosodé den nan muraya, a bira parti di memoria di un pueblo. Ora mi a tende ku a bende St Elisabeth Hospital, mi no a pensa promé riba plaka, tereno òf plan di konstrukshon. Mi a pensa riba e kantidat di hende ku a nase ei den. Riba mama ku a tene su yu pa promé biaha den su brasa. Riba famia ku tabata resa pa un tata, mama, ruman òf yu malu. Riba hende ku a kura, pero tambe riba esnan ku a tuma despedida di bida ei den.
P’esei SEHOS no ta simplemente un edifisio ku a haña un doño nobo. E ta un parti importante di nos historia i di nos identidat.

Mas ku 170 aña di kuido

St. Elisabeth Gasthuis a habri su portanan dia 3 di desèmber 1855. E instituto a nase for di e mishon katóliko pa kuida hende malu, pober i vulnerabel. Loke a kuminsá chikí, a krese bira e hospital general di Kòrsou. Remarkabel ta, ku e promé “gasthuiszuster” ku fuera di sùrnan Hulandes ku tabata traha den hospital, tabata un sùr di Boneiru, Gertruda Martis, ku a drenta servisio dia 16 di febrüari 1857 i tabata konosí komo Sùr Elizabeth. El a fayesé 28 di ougùstùs 1862.

Durante mas ku un siglo i mei, SEHOS a krese huntu ku nos isla. El a pasa den vários epidemia, aña di guera, kresementu di poblashon, yegada di industria petrolero i hopi progreso médiko.

Te na momentu ku kuido hospitalario a muda pa Curaçao Medical Center na 2019, SEHOS tabata un di e institutonan mas importante di nos pais. Ta difísil pa haña un famia kurasoleño ku no tin un konekshon ku SEHOS. Kasi tur hende konosé un persona ku a nase, tratá, operá òf kuidá den hospital St. Elisabeth. Hopi di nos por bisa: “Mi a nase na SEHOS.” E simpel frase aki ta mustra ku e hospital ta hopi mas ku piedra i betòn. SEHOS ta biba den historia di nos famianan.

E sùrnan ku a karga tur kos

Den historia di SEHOS nos no por lubidá e sùrnan religioso. Mas ku dos shen sùr a traha den e hospital durante e añanan. Nan no tabata solamente kuida pashènt. Nan tabata kushiná, limpia, tene atministrashon i hasi tur loke tabata nesesario pa laga e hospital funshoná. Nan tabata traha bou di kondishon difísil i ku poko medio. Nan trabou no tabata un empleo normal.Tabata un yamada.

Mi ta yama nan e “Madre Teresa-nan” di siglo pasá. No pasobra nan tabata famoso, pero pasobra nan a pone gran parti di nan bida na servisio di hende malu i pober. Nan no ta solamente parti di historia religioso di Kòrsou. Nan ta pionero di nos kuido di salú i parti di nos patrimonio sosial i moral. Nan nòmber i nan aporte no por disparsé ora e edifisio haña un destino nobo.

No solamente di Kòrsou

SEHOS no tabata importante solamente pa Kòrsou. Den tempu di Antia Hulandes, e hospital tabatin un funshon regional importante. Pashèntnan for di Aruba, Boneiru, St. Maarten, Saba i St. Eustatius tabata bin Kòrsou pa tratamentu, operashon i kuido spesialisá.

Pa hopi famia di otro islanan, un biahe pa SEHOS tabata un biahe yen di preokupashon, pero tambe di speransa. Algun famia a keda siman òf luna na Kòrsou pa por ta serka di un ser kerí malu. Dòkter, enfermero i otro profeshonalnan di e islanan tambe a haña eksperensia i konosementu den SEHOS. P’esei historia di SEHOS no ta pertenesé solamente na Kòrsou. E ta parti di historia médiko i sosial komun di e anterior Antia Hulandes. E relashon konstitushonal a kambia, pero e relashon humano a keda.

Patrimonio ta mas ku un fachada

Ora nos ta papia di patrimonio na Kòrsou, hopi biaha nos ta pensa riba un fòrti, lanthùis òf misa bieu. Pero patrimonio kultural ta mas ku un edifisio bieu. UNESCO i organisashonnan internashonal ta splika ku patrimonio ta inkluí historia, memoria, balor sosial i e konekshon entre un lugá i su komunidat.  Mirando SEHOS asina, nos ta mira diferente balor. E tin balor históriko, pasobra e ta konektá na mas ku 170 aña di kuido di salú. E tin balor sosial, pasobra kasi tur famia tin un rekuerdo di dje. E tin balor religioso i moral, pasobra el a nase for di kuido pa hende malu i pober. E tin balor edukativo, pasobra nos hóbennan a siña ei den kon kuido di salú a desaroyá. Pero mas ku tur kos, e tin balor pa nos identidat.
SEHOS ta konta ken nos tabata, kon nos a kuida otro i kua hende a yuda forma nos komunidat. Patrimonio no ta solamente loke ta bieu. Patrimonio ta loke un pueblo ta bisa: Esaki ta konta ken nos ta. Esaki no mag disparsé.

Un destino nobo, pero ku rèspèt

Mi no ta kontra un destino nobo pa e edifisio.Un kompleho históriko no por keda bashí pa semper. Mester mantené, restourá i us’é atrobe. Pero su uso nobo no por nifiká ku e historia bieu ta disparsé.

No ta sufisiente pa laga solamente un fachada òf kapèl para. Sin splikashon, nan por bira un dekòr bashí. P’esei den e kompleho renová mester tin un espasio fiho pa konta historia di SEHOS.
Un eksposishon chikí òf sentro di dokumentashon ku fotografia, instrumento médiko bieu, dokumento i historia personal.
Un lugá digno pa historia di e sùrnan religioso.
Un archivo digital kaminda trahadónan i pashèntnan di Kòrsou i otro isla a laga nan rekuerdo. Skolnan tambe mester por bishitá e lugá. Hóbennan por tende relato di enfermeronan retirá i hasi investigashon i deskubrí kuantu sakrifisio a bai den konstrukshon di nos kuido di salú.
No solamente mester konservá patrimonio, pero mester konta esaki i pasa esaki pa siguiente generashon.

No ta tur kos ta na benta

Benta di SEHOS ta un realidat hurídiko i ekonómiko. Pero esaki no ta pone fin na su nifikashon kultural. E murayanan por kambia di doño. E kambernan por haña un otro funshon. Otro hende por biba, traha òf keda ei den. Pero ningun hende por kita nasementu, sanashon, orashon, lágrima i rekuerdo for di e murayanan. Ningun hende por laga trabou di e sùrnan disparsé.

I ningun hende por kita e konekshon entre SEHOS i famianan di Kòrsou i Antia Hulandes.
A bende e edifisio, pero su alma no. E alma ei ta pertenesé na memoria kolektivo di nos islanan. P’esei SEHOS mester keda loke el a bira: un monumento di kuido, humanidat i nos historia karibense komun.