Mi a drenta un tienda di salú i puntra si nan tin informashon di “Palu Dushi”, i promé kos ku e señora a kontesta mi masha desente ta: “Ku palu dushi no ta bon pa hende ku tin preshon”. Mi a yama e señora danki i sali hariendo for di e tienda di salú. Hariendo, pasobra mi ta kòrda mi hubentut, kon nos tabata kou/chupa palu dushi, ku Dios di ta basta.
Ta bon pa nos ban bèk den pasado pa nos haña informashon i siña di konosementu di formanan di biba di nos antepasadonan. Ta bon pa nos sa mas di nos kultura i tuma nota di konosementu ku nos grandinan tin di naturalesa i di palunan i yerbanan kurativo ku ta krese den naturalesa òf ku nos grandinan tabatin den kurá. Nos forma di biba awendia ta hanshá i kasi nos no tin tempu pa para ketu i reflehá riba nos bida, nos futuro i spesialmente riba nos salú. Ounke hopi hende rònt mundu i nos tambe a kuminsá tuma responsabilidat pa nos salú i nos ta buskando mas informashon kon biba un bida mas saludabel. Ántes nos kasnan tabata rondoná di yerba i palunan di remedi ku nos tabata usa den bida diario òf ora di malesa. Den kurá tabatin yerbanan manera lamungras, yerb’i hole, yerb’i sangura, orégano, mampuritu, basora pretu i welensali. Pero tambe palunan manera sòrsaka, skopapel, papaya, granatapel i diferente otro palu.
Basora Pretu (Komposishon Rignald Recordino)
Doló, esta un doló, e mucha tin un doló, doló, esta un doló, e mucha tin un doló.
He, a dun’ele Suavitex, Pasarex i Aliviex, Dolorin, Elimin i Izatin, Paranol, Kitanol i Friasol, Niun no por a pasa su doló.
Antó rònt di nos tin asina tantu yerba
Yerba-bueno, lamungras, mata-raton
Yerb’i seru, tròmelstòk, orégano
Mamótika, basora pretu.
(Refran) Dale ku basora pretu.
Mi ta kòrda kon Dinah Veeris tabata konta kon nan tabata harié ora e tabata promové su yerbanan. Hopi biaha nos tabata relashoná yerba i spiritualidat ku bruheria. Nos grandinan, nan saber di yerba tabata asina desaroyá ku nan tabatin nan hendenan speshal ku por a kura ku yerba. Nos tabata yama nan kurioso, ku tabata traha remedi pa bebe for di yerba.
Nos hóbennan no a lanta ku e konosementu di uso di yerba, sino di bai dòkter. Nan tabata menospresiá e sabiduria di yerba. Ta awor numa, ku desaroyo mundial riba tereno di yerba, nos a bin haña komprondé ku nos grandinan tabata leu fo’i bobo, al kontrali nan tabata hopi leu den konosementu di yerba pa uzo komo remedi. Mira kon mundu a kambia i bo ta yega un kafetaria i pidi un te di yerba fresku, pagando trankil 10 florin òf mas pa e te.
Pero bèk pa mi introdushon.
Tin kos ku no ta bini bèk. No pasobra nan no por, pero pasobra nos a laga nan bai pèrdí. Mi ta kòrda kon mi tabata pasa botika i pa un plaka bo ta kumpra un pida “palu dushi”. Kualke mucha ku a krese den añanan sesenta bin ariba ta kòrda temporada di palu dushi.
Kòrsou promé ku era di selular i video game ta kòrda e pida palu chikitu ku bo ta kumpra na botika. E no tabata algu speshal, pero e tabata parti di bida di tur dia. Miéntras bo tabata kana bai skol òf kas òf hunga riba kaya “palu dushi” tabata den bo boka. Bo tabata hinka esaki den boka, bo tabata chupa e palu tur dia, sakando e sabor dushi i poko poko e punta ta habri i bira manera un kuashi.
Masha poko hende sa ku “palu dushi” tabata e rais seká di un mata ku yama zoethout (Glycyrrhiza glabra). E sabor dushi ta bin di un sustansia natural ku yama glycyrrhizine, ku ta hopi biaha mas dushi ku suku. P’ esei un pida chikitu por dura largu sin pèrdè su sabor.
Awe, e mesun rais aki ta sirbi komo base pa traha hopi sorto di dròp, te, i asta remedi. E “palu dushi” ku nos tabata chupa ántes, awe ta den hopi produkto ku nos ta mira den rèki di botika i supermerkado.
E promé skeiru di djente!
Hende grandi tambe tabata kou/chupa “palu dushi” i tambe nan tabatin otro pida palu den boka. Ounke e otro pida palu den boka, no tabatin e sabor dushi manera palu dushi. Esei tabata “Stòki”.
Na Kòrsou masha poko biaha bo ta mira un hende ku su “stòki” den boka, miéntras manera mi a komprondé na Boneiru, ainda bo sa mira hende ku su pida “stòki” den boka. Boi Antoin ainda sa tin su pida “stòki” den boka durante su ekskurshonnan.
Ántes no ta tur hende tabatin skeiru i pasta di djente. Nan tabata usa “stòki” na lugá di skeiru di djente. Tabatin dos sorto di “Stòki”: “stòki” dushi i “stòki” pika; oliba (Capparis odoratissima).Stòki tabata un palu konosí ku tabata krese prinsipalmente na Banda Abou, pero tambe den kurá di kas.
Di Banda Abou nan tabata trese un kantidat grandi di stòki, pa bende den plasa. Por ehèmpel pa dos plaka bo por a kumpra un kantidat di pida stòki. Bo tabata haña pida stòki largu, ku bo mes por a kòrta i tabatin blachi na e stòki. Tur hende tabata haña su pida stòki i sobra tabata bai den un kanika ku awa, pa tene e stòki fresku mas tantu posibel. Grandinan tabata kou riba e stòki te ora e bira manera un skeiru i tabata limpia nan djente kuné. Mi ta kòrda algun señora ku na un manera masha artístiko, miéntras nan ta kap piska, por a papia ku e stòki den nan boka ku e blachi tabata sali un tiki for di nan boka.
Pa algun hende e tabata un kustumber; pa otro e tabata pa limpia djente. Awe, e kustumber aki a bira historia. Pero tras di e pida palu dushi i e stòki ei, tin un historia grandi di kultura, salú i memoria kolektivo di Kòrsou.
Material usá: Komposishon : Basora Pretu – Rignald Recordino – Het “Afrikaantje” en 99 andere kruiden – Dinah Veeris, 2006 – Herstel van de inwendige balans – Dinah Veeris – Ñapa 11 di mei 2013 – Foto i mata stòki di Boi Antoin.
Great Percy👍🏾
Sigun mi ainda por kumpra palu dushi na botika.
Stòki tabata krese den kura di kas.
Esei si mi no a mira masha tempu mas