Tin biaha tin kos ta pasa ku bo no por midi solamente ku sifra, tabla òf skor. Bo por bisa: Kòrsou a hunga mundial, nos no a pasa pa siguiente buèlta, nos a pèrdè kontra Alemania, nos a saka un empate kontra Ecuador, i nos a kai kontra Kosta di Marfil. Pero si bo bisa solamente esaki, bo ta bisa poko di loke realmente a pasa.

Pasobra mundial 2026 no a trese solamente tres partido pa Kòrsou. Mundial a pone un spil grandi nos dilanti, i a bisa nos: “Mama wak, esaki ta ken boso por ta ora boso ta huntu.”

Un isla chikí, ku hopi hende no tabata konosé, a subi e podio mas grandi di deporte mundial. Kòrsou a para meimei di paisnan grandi. Nos bandera a bula den stadionnan. Nos himno a zona pa hende ku nunka promé a tende papiamentu. Nos nòmber a pasa na televishon, radio, website, korant i medionan sosial di tur parti di mundu. Hende a kuminsá puntra: Unda Kòrsou ta? Kiko ta papiamentu? Pakiko nan ta yama nan selekshon Blue Wave? Kon un isla asina chikí por a yega Mundial? Kada un dje preguntanan ei ta un bentana ku a habri, pa nos turismo, pa nos kultura, pa nos idioma, pa nos historia pa nos pueblo.

Nos a drenta historia komo e pais mas chikí segun poblashon ku a logra klasifiká pa un mundial di FIFA. Esaki no ta solamente un dato bunita. Esaki ta algu ku lo keda skirbí den buki. Un dia, ora nos yunan òf nietunan wak bèk, nan lo bisa: “Na 2026 Kòrsou a hasi mundu wak nos.” Pero loke a pasa akí na kas, tabata mas grandi ainda.

Mama wak kiko deporte por hasi.

Pa algun siman, no tabatin pueblo di banda ariba ni di banda bou. No tabatin partido polítiko A kontra partido polítiko B. No tabatin palabranan ku tur dia ta parti nos den dos, tres òf kuater grupo. Pa algun siman, nos tabata un pueblo. Na kas, den bar, den restorant, na skol, na trabou, na aeropuerto, na Hulanda i otro islanan hende tabata bisti blou. E bandera tabata riba outo, den balkon, den bentana, riba muraya, den man di tur hende.

Nos diáspora a lanta. Hende ku ta biba añanan largu rònt mundu a sinti su mes atrobe konektá ku su isla. Aruba i Boneiru a grita pa Kòrsou. Otro islanan di nos region a sinti ku esaki tabata un tiki di nan triunfo tambe.

I Kòrsou mes?

Pa algun siman, no tabatin haitiano, dominikano, venezolano, kolombiano òf makamba manera nos ta kustumbrá separá hende.Tabatin hende ku ta biba akí i ku a bisa: “Awe mi tambe ta Kòrsou.” Pasobra un pais no ta solamente hendenan ku a nase ei nan. Un pais ta hendenan ku ta kere den e pais, ku ta yuda karga e pais i ta yora ora pais ta sufri i grita ora e pais ta gana.

Nos no a gana mundial. Pero nos a gana rèspèt. Nos no a yega final. Pero nos a mishi ku kurason di nos pueblo. Nos no a trese kopa kas. Pero nos a trese un kos ku ta mas grandi ku un kopa: nos a trese union. Pero awor ta bin e pregunta mas importante: kiko nos ta hasi ku esaki? Nos ta laga e sentimentu aki muri awor ku nos a kai for di mundial? Òf nos ta planta e sentimentu aki manera simia? Pasobra Blue Wave no mester keda solamente un rekuerdo bunita. E no mester keda solamente na T-shirt, potrèt i video. Blue Wave mester bira un manera nobo pa nos mira nos mes.

Gobièrnu, FFK, skol, empresa, fundashon, bario por hasi esaki. Nos mes por hasi esaki. No ku diskurso grandi, pero ku kosnan práktiko.

Pakiko no tin un Blue Wave Cleanup Day, un dia kaminda tur bario ta sali den T-shirt blou pa limpia nan propio ambiente? No pa saka potrèt. No pa minister òf polítikonan para dilanti. Pero pa nos mes mira ku e mesun energia ku a yena “fan zone” por limpia kaya, playa, Otrobanda, Seru Fortuna, Buena Vista, Montaña, Barber, Julianadorp, Souax, Koraalspecht i tur otro bario.

Pakiko no tin un Blue Wave Volunteer Day, kaminda deportista, skol, empresa, iglesia i organisashon ta yuda den kas di hende grandi, sentro di bario, skol òf tereno di deporte?

Pakiko no tin un Blue Wave School Week, kaminda muchanan no solamente ta papia di futbòl, pero di disiplina, trabou di ekipo, identidat, idioma, historia i e pregunta: “Kiko mi por hasi pa mi pais?”

Pakiko no tin un Blue Wave den bario, kaminda kada bario skohe un proyekto chikí: pinta un muraya, limpia un tereno, drecha un kancha, planta mata, kumpra material pa mucha hunga, òf organisá un atardi pa hende grandi konta historia di e bario? No mester ta algu grandi. E no mester kosta un mion. Tin biaha algu chikí ku nos ta hasi huntu ta bal mas tantu ku un proyekto grandi ku ningun hende ta sinti di nan. Blue Wave a siña nos ku nos pueblo ta respondé ora e tin algu pa kere aden.

E pregunta ta: nos ta duna e pueblo algu pa kere aden despues di mundial?

Sindikato, polítiko i lidernan di komunidat por siña for di esaki. Nos tur por siña for di esaki. Nos no mester ta di akuerdo ku otro tur ora. Un pueblo sano mester por diskutí. Pero diskushon no mester ta destrukshon. Diferensia no mester ta enemistat. Blue Wave a mustra ku nos por tin diferente opinion, diferente orígen, papia diferente idioma na kas, simpatisá diferente partido polítiko, diferente religion, pero tòg grita pa mesun pais: Kòrsou!

E mucha ku a wak Mundial 2026 lo no lubidá esaki. E mucha ku a mira nos bandera riba e pantaya mundial, a haña un otro sorto di soño. E no ta soña solamente di bira Messi, Ronaldo òf Mbappé. E por soña di bira e siguiente hungadó di Blue Wave. E por soña di representá Kòrsou. E por soña di hasi algu ku ta pone su isla riba mapa. Pero pa e soño ei no muri, nos mester traha. Nos mester drecha nos tereno di deporte. Nos mester sostené nos klupnan. Nos mester forma entrenadónan. Nos mester tin skol ku no ta mira deporte komo pèrdida di tempu, pero komo formashon di karakter. Nos mester tin empresanan ku ta spònser no solamente ora nos ta den mundial, pero tambe ora nos ta bringa duru pa yega mundial.

Mundial a kaba. Blue Wave no a kaba. Pasobra Blue Wave no ta solamente un torneo. Blue Wave mester bira un manera nobo di kere den Kòrsou.

Talbes e último flùit di rèfri a kaba mundial pa Kòrsou. Pero mi ta spera ku e no a sera e kapítulo. Pasobra si nos laga e sentimentu aki muri awor, lo ta manera kumpra un saka di simia i nunka planta nan. Pero si nos planta nan, dies aña for di awor, nos yunan no solamente lo papia di Mundial 2026. Nan lo papia di e aña ku Kòrsou a deskubrí ku ora nos uni, no tin nada ku ta imposibel.