Kibra  glas, kibra kas. Kibrament’i Kos.

Título di un piesa ku ta parse inosente di Kimo Candelaria ku Típiko Sta. Rosa. Pero nunka ami a wak e piesa akí komo un piesa asina inosente. Ningun kaminda mi a haña un splikashon ku e piesa aki tin di aber ku e promé biaha ku un dama tin relashon seksual den su bida, pero kasi tur hende ku mi a puntra, hendenan di ántes i tambe konosedónan di nos kultura tin e mesun pensamentu ku mi, ku e piesa akí ta relashoná ku e promé anochi seksual di un pareha, kaminda e dama ta bírgen ainda. E tema delikado akí, ántes tabata biba muchu mas i komunidat tabata kontrolá(kòntròl sosial) e pareha muchu mas tantu. Elis Juliana a deskribí e akto akí di un manera úniko: “E anochi kaminda e hòmber ta desflorá e esposa hóben durante nan promé relashon seksual”.
E promé anochi di e pareha no tabata algu ku tabata keda den privasidat, pero ku regularmente tabata bira tema di kòmbersashon, rumor, komentario i asta kantika popular.

Kimo Candelaria a kanta: “Kibra muebelnan, kibra stulnan tur, kuidou ku mi balk’i lomba si, kibra muebelnan kibra stulnan tur, kuidou ku mi balk’i lomba si,: Ora e lampi ta sende muchu kla, awe nochi tin kibrament’i glas, ora e lampi ta sende muchu kla, awe nochi tin kibrament’i glas.

Kasamentu

Generalmente tabata kasa mainta na “Raad”i anochi na misa. “Raad” ta nifiká den e kaso akí “Kranshi”. Pa kasa na “Raad” mester tabatin dos testigu pa firma e akta di matrimonio ku e pareha. E testigunan pa “Raad”no tabata haña mes tantu importansia ku e madrina i padrino di kasamentu na misa, kendenan mester tabatin asta aprobashon di pastor di parokia. Nan mester tabata hende di karakter ehemplar i ku tabata kumpli debidamente ku reglanan di katolisismo. Tantu e pareha komo madrina i padrino tabata bisti di gala i ku hanskun.

Despues di kasa na “Raad”, tabata bai kas di e dams pa bai kome, hopi biaha bestia chikí, sòpi i stoba di karni. Despues di komementu tabata bai prepará pa e gran momentu, ku kasi ta pone bo kere, ku kasamentu na “Raad” no tabata masha kos, pero ta kasamentu na misa ta é kos.

For di atardi ta kuminsá ku un tarea, na mi pareser, masha difísil, pa regla e ehérsito di hende ku mester kompañá e pareha pa yega misa i despues regresá kas pa selebrashon. Yaya di stroisto tabata sali den outo fiá di un amigu òf outo di hür, bai buska tur “bruidsjongen” ku “bruidsmeisje”, damita kargadó di renchi bistí “shik pòmpòlòi” ku tabata asta stroba nan di move.

Saka Breit!

E brèit mes tabata bai kas di e kosedó di su bisti di breit pa prepará kompletamente, den su bisti largu, ku su krans i wal. Kustumber tabata ku ora e breit tabata kompletamente bistí, e tabata keda pará manera un estatua den e kamber, sperando pa ora yega pa nan bin busk’e. Generalmente ta henter un fila di outo tabata yega pa bin buska e breit pa nan bai misa.
E padrino ta baha for di outo  i drenta kas i tata di e breit tabata drenta den kamber i guia breit hib’e den sala i entregá su yu muhé na e padrino. Pues e tata di brèit tabatin deber di “saka breit”. Despues di lidia ku e kola largu nan ta logra sera porta di outo i padrino ta bai sinta patras, huntu ku breit.

Pafó di kas tin un aglomerashon di hende pa mira kon e brit a keda. I manera semper ora e promé outonan yega, bo tabata haña e chikitinnan tin biaha bou di yoramentu, pasobra ta e ora ei un di nan tin di bai oriná etc.

Djei outonan ta sali pa misa, kaminda aki tambe tin basta hende ku a bin pa wak e pareha i kon nan ta kasa. Den misa pastor ta lesa algun pregunta ku e pareha mester respondé i tambe den misa pastor ta laga e pareha bisti otro renchi kasamentu.
Na final di e seremonia generalmente e breit tabata bai pone su bukèt na imágen di su patrono Bírgen Maria, pa despues tuma e bukèt di reserva ku ya tabatin prepará.
Poko poko e breit tabata kana na man di su esposo sali misa riba tono di “Riba olanan di bida”. E potrèt den e artíkulo akí, ta un seremonia den misa di Coromoto, ku seremonia di kasamentu di pareha Cova i Fraai. Wak ku bo ta rekonosé e sirbidó di misa ei.

Yaya di stroisto tabatin su mannan yen den guia chikitinnan, kon pa tira stroisto den direkshon di e pareha. Algun hóben miéntras tantu a mara algun bleki bashí na bùmper di outo di e pareha i asina e outonan kuminsá kore e blekinan tabata zona duru.

Blekinan mará na bùmper di outo, ora un pareha kaba di sali e seremonia di kasamentu na misa òf sala di matrimonio, ta algu masha normal. Den diferente pais europeo òf merikano, e tradishon akí tabata simbolisá abundansia, fertilidat, felisidat i tambe segun historia tabata un manera pa spanta mal spiritu pa alehá di e pareha. Awe te ainda e tradishon aki tei, pero mas bien pa dibirtimentu.

Despues, mayoria biaha tabata bai kas, kaminda na entrada di kas, tabata stroi pipita di aros (pa yama abundansia) riba suela i e pareha ta bai para (sinta) riba talmu pa risibí felisitashon i regalo.

Den tur selebrashon, dado momentu tabata sinti falta di e pareha, ku a sali pushi-pushi di porta patras i bai nan kas nobo.

Kita laken

Su siguiente dia mainta tempran, mama di e mucha hòmber tabata bai bishitá e pareha pa, entre otro konta kon nèchi tur kos a bai. Pero e motibu prinsipal di su bishita tabata pa kita laken di e kama ku e pareha a drumi ariba i ku “supuestamente lo mester tabata manchá ku “lágrima birginal”. E mancha ei mester tabata prueba pa mama di e hòmber ku su yu a desflorá e esposa hóben durante nan promé relashon seksual”. Despues di pone un laken limpi riba e kama, e mama di e hòmber tabata hiba e laken manchá pa mama di e mucha muhé. E tabata tuma e laken ku orguyo i kontentu ku tur kos a bai manera tabata di spera.”

Otro siman: Kasamentu ku hanskun!
Material usá: Matrimonio i parto – Elis Juliana desèmber 1988 – AAINA – Erquimides (Kimu) Candelaria Típiko Santa Rosa – Kibramentí kos.