Tin momentu den bida kaminda bo no ta solamente mira loke ta pasa pero bo ta sintié te den bo alma. E siman aki, mi a sinti esaki duru.
Tur kaminda tabatin un vibrashon positivo: Kòrsou ta soña, i ta parse ku e soño a para bira un soño general.
Awe mi tabatin un otro artíkulo pa publiká. Pero meskos ku hopi otro, mi tambe a kai den gara di “Blue Wave”. Patriotismo a hinka mi den un otro rumbo.
Djaweps, mirando mas ku mil hende na Waaigat (Plenchi Blue Wave) i rònt Kòrsou den diferente sitio mi kier sa ku mi tabata sinti mésun kos ku nan tur tabata sinti e momentu ei.
Tur hende ta lanta grita ora un gol kai. Tur hende gritando manera ta den stadion nan ta.
Turista ku no por papia papiamentu ta grita “Kòrsou! Kòrsou!” manera ku “ta mi hendenan”.
I mi mes, mei mei di tur legria, mi a sinti un kos ku mi no a sinti hopi tempu: nos ta biba un momentu di unidat ku no ta pasa tur dia.
E kaminda no tabata fásil
Nos tur sa: e último añanan no tabata fásil pa futbòl di Kòrsou.Tabatin hopi duda, hopi pleitu i hopi bruashon. Nos tabata buska hungadó, nos tabata buska struktura, nos tabata buska speransa. Te dia Gilbert Martina a presentá. Sereno, balente, hopi pasenshi i ku determinashon.
El a haña hende, pero mas importante: e tabatin fe, fe den nos mes, fe den nos isla ku hopi ta supestimá. Momentu ku Gilbert a bisa “Nos ta bai pe”, kosnan a kuminsá move.
I despues Dick Advocaat. Un hòmber ku hopi a bisa ku nos lo no por a haña i otronan a kualifiká komo muchu bieu. Un hulandes ku mundu deportivo ta respetá. Un hende ku por a keda su kas, gosa di su penshon, pero a skohe pa bin aki. Pa bin Kòrsou. Bin djòin nos den nos soño ku hopi hende tabata pensa ku tabata mas grandi ku nos. Awor mi por bisa ku Advocaat no a bin pa pasa tempu, pero huntu ku nos el a bin pa krea historia.
Nos Yu di Kòrsou
Mas ku tur kos mi ta gosa nos Yu di Kòrsou. Mi ta mira nan ku nan bandera manera kapa.
Mi ta tende nan papia di line-up manera ta nan mes ta entrenadó. Mi ta mira e hóben ku ta soña pa bira profeshonal paso awor nan ta mira: Kòrsou por. Mi tambe por. Ainda tin di nan ku ta simpatisá Brasil, Barcelona, Argentina. Awor nan ta mira nos selekshon. Nan ta mira Kòrsou. Nan ta mira un futuro mas kla. Esaki ta algu ku ningun derota por kita.
Un isla den union!
E ola blou no ta palabra so. Mi a sintié i mir’e den tráfiko. Mi a tend’é i mir’e den supermerkado i mi ta asta mir’e den wowo di hende ku mi no konosé. Nos pais ta move den union danki na nos ekipo nashonal di futbòl. I esaki, mi amigu, ta mas poderoso ku kualke gol.
90 minüt pa historia
Awor nos ta aki. Mas serka ku nunka. Falta 90 minüt. Falta un empate, pero un viktoria lo ta mihó. Esaki ta loke ta separá nos di Mundial. Mi ta papia duru. Mi ta soña, kisas lantá.
I mi no ta skonde ku mi ta soña tampoko. Ya m’a wak Kòrsou den poule C huntu ku Brasil, hungando kontra e mas grandinan di mundu. Mi ta wak un pais chikí , pero ku kurason grandi.
Nos por sigui soña?
SÍ. Laga nos sigui soña. Pasobra loke ta pasando awor akí na Kòrsou, e union, nos orguyo i sintimentu ku “nos ta un pueblo” ya kaba ta un viktoria grandi. Si nos gana, empatá òf laga suerte tuma otro rumbo, un kos mi sa: Nos a krese, nos a haña nos sentido di pueblo, nos a deskubrí nos forsa i esaki ta un regalo ku ta dura.
Soña? Si soña, e no ta un ilushon e ta un direkshon, i nos ta na kaminda. Kòrsou nos ta grandi na kurason, grandi den speransa, i grandi den union. Laga nos keda para huntu pasobra ora nos ta un, nada no por stòp nos.”
Hóben e momentu aki ta di bo tambe. Sigui soña grandi, sigui traha duru, sigui kere den bo mes. Tur gran kampion a kuminsá manera un mucha ku un bala den bario. E futuro ta di bo, lanta, hunga, studia, traha, soña i hasi bo pais orguyoso.