“Sinta un kaminda ku ta bende kòfi i te i kòmbersá. Manera n’e negoshi chikitu di Vi Coco. I manda fla, manda fla, manda fla. Papia kiko ku ta. Laga palabra dal spat den otro manera un bogon grandi den un neshi di ninichi. Laga kreatividat sali i ideanan bula manera para bai kaminda nan ke.” Frank Martinus Arion, Kòrsou, yüli 1985.
Virgilio Coco a nase 17 di febrüari 1927 na Kòrsou. Vi Coco tabata un di e promé hendenan ku a kuminsá ku negoshi di snèk na Kòrsou. Manera e mes a konta, ku e no gusta trabou mashá, pero e mester traha, pasobra e mester a kria su famia. Su snèk tabata e fuente di entrada i e tabata biba di esei. No tabata un snèk masha grandi, mi ta kalkulá di 1 pa 3 meter. E snèk tabata mas un kashi bou di un trapi. Tabata parse manera hendenan tabata bin konfesá serka Vi i tabata interkambiá nan doló, nan legria ku pastor. E lugá tabata karakterisá su mes pa hopi, pero hopi harimentu i Vi Coco tabata number un den esei, ku un hari masha kontagioso. E lema “Komportá bo!”, kreá pa Vi, a kue plaza i bira un yamada pa kambio di komportashon. E tabata embahador di un kampaña di konsientisashon pa mantené Kòrsou limpi i biba, semper ku un sonrisa.
Riba pregunta di periodista hulandes Vi Coco ta kontesta: “mi tin “zwemdiploma i diploma veiligverkeer, i basha su hari kontagioso”.
Serka Vi Coco tabata resolvé tur problema grandi i chikitu, di Kòrsou i di mundu.
Despues di tempu e snèk a haña e nòmber di “Universidat di Pueblo”. Mayoria hende ku tabata yega su snèk tabatin mas gana di papia i skucha Vi Coco, en bes di kumpra algu. Otro punto importante di e “Universidat di Pueblo” tabata ku tur sorto di hende, di tur gremio tabata bin Bakkerstraat, pa papia i diskutí. Diferente ámtenar, trahadónan di den sektor privá komersiante, polítiko, diputado, minister, gezaghèber, religioso, dòkter i abogado, etc. E lugá tabata realmente un lugá pegahoso, i si bo yega einan un biaha, kasi sigur lo bo ripití bo bishita.
Vi Coco tabata un trubadur i tabata den organisashon Ko Afingita di Chin Behilia i di den e ramo akí tabatin diferente produktor, guitarista, kantante, pintor, deklamadó i eskritor ku tabata bishitá “Universidat di Pueblo”. Tur disiplina tabata representá.
Vi Coco tabata blòf sin miserikòrdia i tambe diferente biaha su relatonan no tabata pasa prueba di realidat. Vi Coco su presentashon den Tres Generashon na radio Z-86 tabata un enkanto pa mi. Hopi biaha e otro miembronan di e tim, tabata proboká Vi i tabata yama Vi Coco afó. Tambe e tabatin e programa “Kosnan di Bida”. Den ámbos programa, pero mas den “Kosnan di Bida” na Z-86, e tabatin un públiko grandi, interkambiando ku opservashon i reflekshon riba bida diario na Kòrsou. Tantu su programa na radio, komo su buki “Kosnan di Bida” 1+ 2 tabata prueba di su partisipashon den nos kultura i kustumber di Kòrsou.
E tabata na kuna di e Partido Radikal i tabatin un konsenshi sosial. E tabata un di e proménan ku a hasi hende konsiente di e desigualdat riba e isla, i no a hasi esaki den forma di imponé, sino ku remarke asertá i kombersashon habrí. Su kuenta kon el a kere ku e lo a haña sigur riba dos mil voto i drumi lanta i ripará ku ta solamente 39 hende a vota pe. (Bo por wòrdu eligí, sin bai elekshon – Kosnan di Bida 2- Vi Coco)
E tabata un filósofo di bida outo-proklamá, un orea pa skucha, un konfesor, komediante i mas ku tur kos, pa hopi hende e chispa den nan bida diario.
Vi tabata un “bon vivant” i tabata selebrá bida. Gusta bisti na blanku i kana prònk i broma. Gusta kome bon, hopi biaha kuminda chines i tabata broma semper tokante kome bon i su tipo di kuminda. Kada biaha di nobo ripitiendo ku e tin bon tipo i ku e sekso femenino ta stim’é. Por sierto ku e tabata pela solamente serka hende muhé: “Bo mester komprondé ku ora ku un hende muhé ta kòrta bo kabei, e ta preokupá su mes kon bo ta keda. E ta wak kon bo kara ta keda ku e korte ku bo ta hañando. E ke pa bo keda “handsome”. (mi ta pela serka hende muhé so! – Kosnan di Bida 2 – Vi Coco). Por sierto ku Vi Coco pa broma tabata usa un kantidat di ekspreshon na ingles, pasobra esei ta hasi impreshon, manera e mes tabata bisa: “beautiful – “from the big five to Big Mack”- flus “blue black”- flus Palm beach” i koló Wembley”, tabata algun ekspreshon típiko di Vi Coco.
Vi Coco tabatin algun ekspreshon ku ta típiko di Vi Coco. Televishon ulandes tabatin basta atenshon pa VI. NCRV, Felderhof Overzee Aflevering i otro medio di komunikashon tabata sigui Vi Coco regularmente i tabata entrevistá Vi Coco. Un ekspreshon di Vi Coco ku mi ta kòrda i ku mi a yega di bisa ku Vi Coco tabata e prekursor di energia solar tabata e entrevista ku Showroom pa Hulanda. Den su komentario Vi Coco a splika nan ku e lo ke eksportá solo pa Hulanda. “Hulanda mester di solo i nos tin solo na granèl, pakiko nos no por eksportá solo. “Iran ta eksportá petroli i nos ta eksportá solo. Nos téknikonan lokal ta bobo ku nan no a bin riba e idea ei”. https://www.youtube.com/watch?v=gHAsMlvgWpo
Vi Coco a bisa periodistanan hulandes ku e ta kreando un rasa di muhé nobo pa universo aki na Kòrsou, un muhé “blou kla”. “Hende ta kere ku mi ta loko, pero mi ta trahando riba dje”.
Ora bo pidi Vi Coco un aw’e koko, e tabata yena un kùp ku eis i awa pa bo i ora bo reklamá e ta bisa bo: “Mi nòmber ta Coco, i esei ta mi awa!”
Esnan ku a konosé Vi Coco lo no lubid’é. Humor pa no kaba i hopi lihé ku su kontestanan. Vi Coco tabata hopi gustá den pueblo. Semper e tabatin e último palabra.
Virgilio “Vi”Coco a muri na edat di 68 aña (29 di ougùstùs 1995). Sinembargo, e ta sigui biba pa medio di su anékdotanan su “Kosnan di Bida” i den rekuerdo di esnan ku a konos’é. Vi no a logra eksportá solo, pero sí el a alegrá masha hopi hende su bida.
Manera e mes a bisa un bia: “Nos no ta blanku. Nos no ta pretu. Nos ta bunita.”
“Bo sa, mi amigu? Na Kòrsou tin mas hende ta hode, ku tin hodedó!”
