Mi no a nase di un famia riku, pero evaluando mi hubentut mi mester bisa ku mi tabatin un hubentut tremendo. Kaminda famia a hunga un ròl mashá importante. Mi a biba den un kas di 8 ruman i nos tabata biba den un kas ku 3 kamber i nos tabata riba otro. Mi mama a hasi tur kos ku tabata na su alkanse pa a duna nos edukashon apropiá i a lanta nos na un manera severo i ku mashá rèspèt.
Hopi biaha mi tabata keda serka mi wela, mama di mi tata i su ruman Madushi (Carmen Bislik). Mi mama tabata stima mi inmensamente i mi tabata su “prens”. I mi wela tabata malkriá mi ku Dios di ta basta. Mi dos ruman muhénan mi mayor, Maria i Lucille tabata keda tambe serka mi wela i Madushi. Pa straño ku ta parse, Papa Max, kasá di Madushi no tabatin mashá di bisa, òf no tabata bisa mashá den nos edukashon. Tabata mi wela Tan Lu i Madushi ku tabata dirigí nos na Kortijnweg 38. Mi wela, parti di mi mama, Julia Salustiana mi no a konosé, ya ku el a muri promé ku mi a nase(mei 1926).
Por lo general, un hende muhé ta parti su mes den dos kas, esun dje mes i esun di su mama. Ora su yunan forma famia i haña yu, e yunan ei tambe ta bira parti di su kas. Komo mama, mama di kriansa, tin biaha komo madrina i komo wela e ta hasi su trabou i kumpli ku su mishon.
Manera e proverbio mes ta bisa: ‘Mama ta keda mama te ora laker hala tapa’. E relashon entre mama i yu, nietu etsera ta hopi fuerte. E relashon akí ta duru pa largu tempu i te ora ku e por, e ta keda duna konseho. Yudansa tabata hopi biaha di parti di famia mes i ora esaki no ta posibel, bisiña tabata kai aden. E proverbio: ‘Un bon bisiña bal mas ku un famia’ ta ekspresá esaki.
Hopi biaha e relashon aki ta bin dilanti den proverbionan i kansionnan bieu. Mayoria biaha nan ta relashoná ku e figura di mama i wela i kasi nunka di tata i abuelo. Bo kas kaminda bo a nase yama ‘kas di mama’, asta ora tur dos mayor ta biba den e kas. “Yu di mama” ta tekstualmente yu di mama, pero ta nifiká tambe un hende. Djis kòrda riba ekspreshonnan: ‘ta mama mes ta mama’ i ‘tata tin hopi ma mama ta unu so tin’, ‘yu sin mama ta kuminda di warawara’, ‘for di ora un muhé bira mama ta doló’(unabes bo ta mama semper bo tin preokupashon); ‘kurason di un mama ta krese bira mas grandi ku kada yu’(un mama ta stima tur su yunan no ta importá kuantu nan ta); ‘si bo no tin mama, lo bo mama wela’; ( si bo no por haña mihó, bo mester keda kontentu ku algu ménos); ‘mama wela’ kier men bebe lechi serka wela; ‘ta mama so ta muri pa su yu’; (mama semper ta defendé su yu); ‘un yu muda, su mama so ta komprend’é ’(nada no por superá amor di mama).
Bo ta kòrda e kansion: ‘ku mi mama na bida mi’n ta kana bebe ròm’? Òf e eterno kansion di Popo Ricardo: ‘dilanti hues….?
Anto kòrda semper: ‘tur muhé por pari, ma tur no ta mama’!(Bira mama no ta meskos ku ta mama).
Hopi biaha tambe ora tin problema den relashon familiar, ta ekspresá esaki ku ekspreshon/proverbio manera: ‘Esun ku Dios no duna yu, diabel ta duna sobrino’; ‘kas di bo tia no ta tur dia’; ‘un mama no tin wea pa stoba yu maluku’(kon malu un yu por ta, su mama lo defendé semper); ‘e parse yu ku a dal su mama’(e tin mashá mala suerte); ‘e yu ku no tende di su mama. Até den boka di kolebra’; ‘manera mama kalakuna’(manera un mama ku no ta kuida su yunan); ‘manera yu sin mama’(bandoná, solitario); mihó na man di mama, ku na man di menchi’; (si bo no regla bo asuntunan, bo ta sufri daño); ‘mihó su mama a parié na palu di horka’(ningun hende no por evitá su destino); ‘mihó un yu yora ku su mama yora’; (mihó kastigá un yu ora e ta meresé esei, ku lag’é lanta pa su kuenta); ‘ora bo ta di malu, bo mama defuntu ta nenga bo pa su yu’;(ora bo ta di malu, tur kos ta bai robes); ‘no por pik man di piedra, sin pik su mama’; ( loke bo hasi ku un yu, bo ta hasi ku su mama); ‘rosea di mama, ta desgrasia di mal yu’; ( un mama ku ke lanta su yu bon mester disiplin’é for di chikitu); ‘tur mama tin di paga tera’; (tur mama por pèrdè un yu na ora di parto); ‘yu sin mama ta kachó di kaya’; (yu sin mama ta pasa trabou den e mundu akí).
Na Kòrsou nos konosé tambe e figura di kompader, komader, pepe, madrina, etsera. Na okashon di boutismo, risibimentu i konformashon i na kasamentu, di kua esun di boutismo ta esun di mas importante. Den e kaso akí tin tres persona enbolbí, padrinu, madrina òf pepe i e ihá. Tata ku mama di e mucha, padrinu i madrina ta komader i kompader di otro. Por lo general tabata buska padrinu ku madrina den seno familiar mes i di konosí. Trabou di padrinu ku madrina tabata di sòru pa e bienestar spiritual di nan ihá, si mayornan deskuidá esaki. Tambe si tabatin problema familiar, e madrina tabata esun ku mester a sali na defensa di su ihá i asta tuma e ihá den kas i kuida i eduká esaki. Padrinu su ròl tabata ménos i tabata mas di sòru pa na fiesta di boutismo tin tur kos di kome i bebe.
Por último nos tin tambe ‘yu di kriansa’. Ami konosé un kaso, kaminda e ‘yu di kriansa’ tabata (ta) biba den un tremendo relashon ku su tata di kriansa i ta yama e tata ‘papa’ i e tata ta akseptá esaki mashá normal i tambe e relashon di oma ku opa ta mashá normal. E yu biológiko di e tata i e yu di kriansa ta haña mesún edukashon i tur kos mesún kos, sin ku tin deskriminashon di ningun di dos. Den otro kasonan ta yama e mama di kriansa ‘madrasa’ i e tata ‘padrasa’. Pa straño ku por parse den e kaso ku mi konosé, nunka mi no a tende e palabra di ‘tata di kriansa” kai refiriendo na e persona ku ta e figura tata pa e yu di kriansa.
Ku amor pa Niah, Noah, Isaiah i Zackery.1Sapaté, na bo sapatu! Reginald V. Römer
