Na 1969 ainda nos tabata lesa den korant, ki dia i ora ta sera pòst internashonal i tambe ku na pòstkantor tin karta di tal i tal hende ku no a bin tuma nan pòst. Tambe nos tabata lesa den Amigoe di Curaçao un rúbrika “Zijn er brieven van U bij?” Den e rúbrika akí tabata pone nòmber di tur hende ku no a bai buska nan pòst. Promé ku mi tempu, tabata publiká den korant ki dia ta sera pa tuma karta, pasobra e barku ta sali tal i tal fecha i mester a bai ku pòst di Kòrsou. E tempu ei ainda tur kos tabata ku “zeepost”.  Despues a bin “luchtpost” i klaro esei tabata mas karu ku  “zeepost”.

Ta un grupo mashá chikí ta skibi karta ainda. Mi a puntra 21 persona, ki dia tabata e último biaha ku nan a skibi un karta i ningun di nan a kòrda ku den último aña(nan) nan a skibi un karta. Algun di nan a bisa ku nan a yena un formulario pa SVB ku despues nan a bai pòstkantor pa pone stampia. Mi ta kòrda e tempu ainda, ku mi tabata skibi karta, i mi tabata kumpra papel speshal, fini di koló, blou, bèrdè i ros, prinsipalmente pa mi manda Kòrsou, e tempu ei ku “luchtpost”. Bo bishita na pòstkantor tabata indispensabel, pasobra bo mester a pisa e karta pa sa kuantu sèn bo mester a paga na stampia. Otro biaha bo mester a manda e karta “aangetekend” i bo mester a paga èkstra, òf bo mester a bai tuma bo “postwissel” ku a yega for di Kòrsou, òf e paki ku asina tantu bo tabata spera for di Kòrsou. Awor akí, ora mi mira hendenan para den rei pa manda òf risibí sèn via di MoneyGram, mi ta kòrda riba nos “postwissel” di ántes. Un tempu tambe mi tabata hür un “postbus” 2112 na pòstkantor Otrobanda. Bon bisá mi a tuma e “postbus” di mi tata over.

Awor e motibu di e artíkulo akí: Bishitando De Dames na Promenade Shoppinng Center, mi bista a kai riba e brivenbùs kòrá modèl bieu di heru bashá. Mi a saka potrèt mes ora di dje. (wak potrèt di portada). Mi mester bisa ku mi a mira e brivenbùs akí na diferente otro kaminda (Avila Hotèl, Janthiel Beach i dilanti di Mambo Beach. Na Aruba i Isla Ariba tambe tin e brivenbùs aki. Na Boneiru nan tin e brivenbùs aki bou:

Brivenbùs Boneiru – Kortesia Boi Antoine

Ántes tur kolonia di Hulanda tabata disponé di e brivenbùs akí. Na Hulanda na 1850 a kuminsá pone e brivenbùs nan akí. E brivenbùs ta pisa mas o ménos 400 kilo i bo mester pega e brivenbùs akí na muraya, paso nan por ta “topzwaar” i asina nan kai nan ta kibra na pida pida. Na Hulanda e brivenbùs akí ta forma parti di nan patrimonio industrial.

Un señora na e hotèl dilanti Mambo Beach a konta mi, ku fielmente tur dia un trahadó di CPost ta bin hasi e brivenbùs bashí, pero realmente tur dia ta habri i sera e brivenbùs, pasobra kasi nunka tin algu den e brivenbùs. Kasi tur e brivenbùs ta meskos i e fluho di pòst ta realmente morto. Papiando ku un hende ku por sa, ta konta mi ku awor akí ta pakinan di pedido “online” ta loke ta e trabou ku tin na pòstkantor i ku karta kasi a bai for di moda.Un informante a bisa mi ku hopi biaha nan ta bai hasi brivenbùs bashí i kisas pa dia ta haña un 8 karta asina. Por sierto ku e informante a bisa mi ku no tin stampia mas, pero ta un steker bo ta haña riba bo ènvelòp ora bo bai pòst bo karta.

Awen dia nos ta komuniká via ret sosial, tur dia nos ta haña un avalancha di mensahe, e-mail i WhatsApp i nos ta kontestá di biaha, pasobra e ta asina fásil i e komunikashon ta superfisial. Nos a kustumbrá ku esei.

E 21 hendenan ku mi a aserka, tur a bisa mi ku ta pa falta di e-mail, ret sosial i WhatsApp ku nan a stòp di skibi karta. Pakiko nan tin ku kansa nan kurpa buska un pén ku papel, lembe un ènvelòp sera, buska un pòstkantor pa kumpra stampia, kaminda nan por sinta na kas, na nan pata rata grandesa dilanti nan kòmpiuter primi “send” i e mensahe a yega su destinashon, sin ningun kibramentu di kabes. Anto grátis.

Kiko lo bo hasi, si mi mester pidi bo manda mi bo adrès pa mi skibi bo un karta, kaminda ta muchu mas efisiente si mi “message” bo. Mi ta kere ku lo pasa den bo kabes, ku ami a kuminsá varia.