Ku sinku aña di edat ya kaba Nicolas Susana tabata subi kanta tambú den palu parib’i kas di su tanta na Dominguito. Na lenga di mucha e tabata kanta:
“Mama’ parimi boi baranka
Kolebra’ korta mi lombrishi
anto mama’ bebe lechi tigre
ki kuent’i malu mi por tin”.
Den entrevista ku Bernadette Halabi, den Ñapa di 2 di sèptèmber 1983, Shon Cola ta yama su mes kantadó di tambú di rasa i Rene V. Rosalia ta yama Shon Cola den su buki: Shon Cola, Labariano di rasa(mei siglo na kustia di bari).
Ami konosé Shon Cola, bishitando nos Sentro “Bin Kontra mi” na Montaña na Fried Tire service. Dunando Shon Cola man pa sera konosí el a bisa mi: “Shon Cola pa sirbibu”. Mi tabata sa ku Shon Cola su lenga ta skèrpi i mi tabata buska su lenga i tabata haña poko kontesta serka Shon Cola, ku ta solamente Shon Cola por a duna mi.
Su famia tabata kantadó di tambú. Nicolas Susana a nase na Westpunt dia 18 di desèmber 1918. For di dia e tabatin 4 aña su tanta a tum’é bai kria na Dominguito. Despues di ensayá den palu komo mucha chikitu, el a kuminsá pafó di kura di kas ku mas o ménos 16 aña di edat.
Shon Cola ta splika: “Kantamentu di tambú ta kantamentu di kos ku a pasa. Riba dje bo ta saka weis di e kantika pa bo kanta. E hendenan di hanch’i Punda tabata asina bon den tambú, ku apénas bo kuminsá kanta ya nan sa kaba kon pa nan rospondé. Asina bo kuminsá ku weis kòrtiku bo ta duna e koro promé, djei bo ta bini ku e pregon. Ya e ora ei nan sa kaba kon e koro ta pa nan rospondé. Pero ora ta weis largu si, bo ta haña e hendenan ta sinta den pi’e trapi ta dal beter ensayá. Di tur manera e palabranan mester tin nifikashon. Ami semper a kanta kos ku a sosodé.Tin ora ku mi kanta un palabra e por kai na fabor di un hende, pero kontra un otro hende. Pero mi no ta menshoná nòmber.Tin ora hende ta keda poko malkontentu i nan ta bisa mi: “o Cola, ba kanta mi”. Pero mi ta bisa nan ku mi no sa nan bida te pa mi kanta nan”. E tempu ayá no tabatin kestion di kobra pa toka tambú. Pero esun ku gusta e palabranan ta saka sèn buta na bo boka. Asina nan ta pidi bo pa sigui kanta. Shon Cola: “Ta dos kos por duna bo inspirashon. Duele o rabia. Bo ta kanta sentimentu di pueblo. Manera mi a kanta Kodela- Setel. A sosodé ku nan a kòrta mi telefòn i mi mester a bai Santa Maria. Mi a yega haña un kareda largu di hende ta warda, rabiá pafó para. Ami dado momentu a hala sinta un banda mira kon e kos ta bai. E mes anochi mi a graba un disko Kodela – Setel.” (entrevista ku Bernadette Halabi, den Ñapa di 2 di sèptèmber 1983),
Shon Cola a splika tambe, ku ta Hanch’i Punda tabata e lugá kaminda e por a biba tambú, manera e tabata ke. Ta aki tambe ku el a sera konosí ku Stefan Manteka, un tremendo tokadó di barí. Rene Rosalia, “Shon Kola Labariano di rasa”, página 29: Shon Cola ta bisa: …. “Si bo yega Hanch’i Punda tabata manera ta un orkesta tabata toka pasobra ta bon tokadó i bon kantadó tabatin. Si bo no por kanta bon, tokadó no ta toka pa bo.Si bo ta wadjo i si ta Stefans ta toka e ta ninga bo meskos ku el a ninga mi. Si hende chònbòn bin kanta nan ta harié. E no ta haña rospondi i nan ta hasi pantomina di dje”.
Den Shon Cola su tempu aktivo nan tabata invit’é tur kaminda ku tabatin tambú. Shon Cola a pidi Dios pa bini mas kantadó di tambú, pasobra el a kansa di tantu aktividat. Den sierto sentido a kumpli ku su deseo pasobra a bini diferente grupo nobo. Pero tòg Shon Cola a lamentá ku hóbennan a kita for di e idea original di tambú. Ñapa 2 di sèptèmber 1983: “Ta parse ku t’ami so ta kanta sentimentu di pueblo. E forsa di palabra no tei mas den kantika di tambú. Di e hendenan di ántes t’ami ku Petoi so a keda, pero niun di e hendenan di awor no a puntra nos un ke otro pa tene e tambú den su forma original. Awèl ta asina mes nan tin ku keda. Pero mi ta respetá nan punto di bista”.
Na sèptèmber 1983, Sekshon di Kultura a organisá ”Mei siglo di Shon Cola”, 17 di mart 1984 Rene Rosalia a organisá un Festival di tambú na novèmber 1985 Shon Cola ta risibí un rekonosementu di Asosashon di Músiko – na ougùstùs 1986 Shon Cola ta presentá den Festival di añanan 50; na 2002 Shon Cola a representá Kòrsou na Cuba i tambe Shon Cola a biaha pa New York ku Grupo Trinchera. Dia 20 di aprel 2003 e Labariano di rasa, Shon Cola,a bai sosegá. I awe danki na Rene Rosalia i Fundashon Stripan, nos tin Museo di tambú Shon Cola.
