Komo presidente di Fundashon Bin Kontra Mi na Banda Ariba, mi a organisá un dia di dominó Na Fried Tire Service. Esaki tabata e mihó fundraising, ku a produsí mas sèn pa nos fundashon, pero e aktividat di mas kompliká ku nos por a organisá tambe.Hopi rabiamentu,mal kontentu i hopi pleitamentu.

Wintertuin resientemente a publiká e buki ‘Sapatu! E arte di dominó na Kòrsou’. E ta un homenahe na un wega hopi stimá. Un resúmen di mas ku 28 grupo di dominó di pariba te pabou. E artistanan a skibi, pinta i saka potrèt inspirá pa e bishitantenan. Te ainda no ta kla pa mi, ku ta egipsio- òf chinesnan a inventá e wega akí.

Na Kòrsou, Aruba i Boneiru wega di dominó ta mashá popular. Nos konosé diferente torneo lokal i internashonal i figurá bo, te poko dia ei, Kòrsou a pone rekòr di hunga dominó bou di awa. Den e pelíkula Double Play, basá riba e buki di Frank Martinus Arion, dominó ta figurá prominentemente. Kòrda tambe ku Fun Miles tabatin su “Fun Domino” i riba tur isla di un òf otro manera wega di dominó a yega trese malkontentu i tabatin biaha ku polis mester a intervení. Tabatin kampeonato anualmente i na 1973 mi a registrá entre otro e siguiente timnan: Scott’s Special, Los Conquistadores, Robba, Los Veteranos, Bienvenido, Union Nueva Ola, Los Luchadores. Na 1979 Klup Robba a gana kopa Antiano di dominó.

Mi tin un grupo di amigu ku mi ta bishitá i nan ta hunga dominó regularmente. Nils de Paula ta un dje hungadó nan di mil kampaña i a bishitá otro islanan di Antia Hulandes i Venezuela varios biaha pa motibu di dominó, Por sierto mi amigunan ta bin huntu pa hunga dominó, pasobra mi ta kontra ku si nos ta sinta ta kòmbersá i nan disidí di bai hunga dominó, pasobra esei ta kibra e ambiente i e 4 hendenan ei so ta dibertí den nan wega.

Wega di dominó ta un wega masha emoshonal, ku hopi gritamentu i tambe hopi mamamentu di gai. Sigur ora sapatu kai, anto sapatu blanku. Bo ta tende konstantemente gritunan di “Seku Seku”,”Blanku Blanku” di esnan ku parti sapatu i ku bo tin ku keda tende pa basta ratu.

Den e grupo di dominó akí ku ami ta bishitá, tin dòktu den dominó, tin ku ta basta bon, tin ku ta pretendé i tin “pegadó di pieda” tambe. Inklusive, tin hungadó ku ta konsiderá ku nan ta asina bon, ku ta pretendé di por gana tur wega. Klaro nan dominó ta un wega basá riba lógika i ami kier pone aserka ku e wega tambe ta enserá un tiki malisia, asina ku esun ku tin bon memoria, bon lógika di dominó i un tiki di astusia, tin chèns di gana hopi wega. Klaro ku ta bin aserka algun otro kos: pensa hopi promé hunga, hunga un bes, dal bo pieda di dominó duru tambe tin su nifikashon, meskos ta konta pa pone énfasis èkstra ora bo ta pone pieda abou. Esaki i mas ta basá riba dominó krioyo di Kòrsou. Tin biaha e hungadónan ta kanta e movidá  ku nan ta bai hasi. Por ehèmpel ora nan ta bai pega dòbel tres nan ta kanta e Hungama: Teresita dans di baile, òf ora ta bai pega un dòbel bo ta tende drumi so.

Bo ta haña tin biaha, ku weganan di dominó ta bai boka ketu, esta ku ta hunga i sigui hunga, te ora un haña sapatu òf libra. Otro biaha bo ta haña bo ku un pareha ta kai sinta i despues di kada wega, tin un análisis di kon nan a pèrdè òf dikon nan a gana e wega. E diskushon aki por sigui bai gol, i asta ku ya nan a shòbel pa e siguiente wega kuminsá, nan ta diskutí ketu bai i ta bai bèk na e wega promé.

Mi a diskutí diferente biaha ku mi amigunan i mi a bisa nan ku ta shefmentu pisá tin den wega di dominó i ku nan a kustumbrá ku otro kiko sierto movementu i sierto kosnan kier men ku nan hasi i kiko ta e pasonan ku mester tuma lugá. Un ehèmpel: na momentu ku otro pareha hunga un sinku, i ami ku mashá furia trapa e sinku ei, mi ta mandando señal pa mi man, ku ami no tin dòbel 5 i ku tin ku yag pa mata dòbel sinku. Personalmente mi ta haña ku dominó a para bira un wega ku hopi shefmentu i parse mi ku e wega a pèrdè su grasia.

Awor imaginá bo: kuater hende sintá ta hunga dominó, kada un den un hòki, sin por mira otro, nan no tin mag di dal pieda, sin komentá hungada, esta tur hende ta steif steif pa no pèrdè punto. Ora bo yega na un wega di klup òf un kampeonato internashonal, por bai asina i bo ta haña impreshon ku ta den santana bo a drenta, ketu ketu.
Na wega di dominó bo mester por tende nan grita: DIES, ku ta pone e persona ku  a gana grita di alegria, i baha un peso, un tenshon enorme for di dje i e gritu ta di legria i pa tur hende ei banda sa, ku sapatu a kai. Mi ta kòrda kon na Tilburg ora ku Wawa nan tabata hunga i sapatu kai, nan tabata habri bentana di flèt i grita SAPATUUUUUUUU!

Tuma nota ku hopi pais tin su mes reglanan di dominó ku den sierto kaso ta totalmente diferente di esnan ku nos ta usa aki. E no ta un wega ku regla universal manera ahedres.

Mi a komprondé di mi amigunan ku stima dominó, ku ta nos na Kòrsou so ta hunga e wega di e manera aki, esta si bo gana bo ta haña un punto i si bo gana changá, dos kabes, bo ta haña dos punto. Esun ku yega dies promé i e otro man no haña sinku punto, esei kier men ta sapatu.

Spera, ku téknika di shefmentu avansá no ta e futuro di dominó.

Anékdota:

Nils ta hungando man ku un amigu i nan ta pèrdiendo. E amigu despues di a pèrdè e wega ta bisa Nils: “Nils mi no ta hunga dominó dje malu ei tòg?” i Nils ta kontestá su man: “Nò, bo no ta hunga dje malu ei, bo no sa hunga dominó mes.

Nils ku Javier na stadion di Miami Marlins, disfrutando di su otro pashon, baseball.